1 Ailibala neksdei na detlot haibala serramonimen bin majurrumap ola lowamen en ola kaunsala, en deibin meigim plen blanga kilim Jisas, en deibin taiyimap im, en deibin deigim im en hendimoba im langa det gabman bos neim Pailat.

2 Wal Pailat bin askim Jisas, “Yu det king blanga ola Juwish pipul?”

En Jisas bin tok, “Wal hu yu reken mi?”

3 En wen Jisas bin tok lagijat, detlot serramonimen bin tok olkain blanga im.

4 Wal Pailat bin askim Jisas mowa na, “Dislot serramonimen bin tok olkain blanga yu. Yu garra ensimbek olabat?”

5 Bat Jisas nomo bin ensimbek olabat, en Pailat bin hatjamp blanga tharran.

6-7 Wal ebritaim wen deibin abum det Pasoba Serramoni, Pailat bin oldei larramgo wanbala prisana fri, en imbin oldei larram ola pipul pikimat wujan prisana deibin wandim go fri.

8 Wal bigmob pipul bin hipapbat na, en deibin stat askimbat Pailat blanga larramgo det prisana, 9 en Pailat bin askim olabat, “Yumob wandim mi larramgo dijan king blanga ola Juwish pipul?” 10 Lagijat na imbin askimbat olabat, dumaji imbin sabi detlot haibala serramonimen bin jelas langa Jisas, en blanga tharran na deibin hendimoba Jisas langa im. 11 Bat detlot haibala serramonimen bin dalimbat ola pipul blanga askim Pailat blanga larramgo det najawan prisana neim Barebas. Wal Barebas bin deya langa det jeil, dumaji imbin medrim sambodi wen imbin joinin blanga fait langa det gabman.

12 Wal Pailat bin askim olabat, “Wal wanim ai garra dum langa dijan men weya yumob gulum king blanga ola Juwish pipul?”

13 Wal detlot pipul bin jingat adbala, “Kilim im ded!”

14 En Pailat bin tok, “Wal wanim nogudbala ting imbin dum?”

Bat detlot pipul nomo bin ensim im. Deibin kipgon jinginatbat adbala, en deibin kipgon tok, “Kilim im! Kilim im ded!”

15 Wal Pailat bin lafta duwit langa detlot pipul blanga meigim olabat sedisfaid. Imbin larramgo Barebas fri, en imbin hendimoba Jisas langa detlot solja blanga beldimbat im en blanga neilimap im langa kros.

16 Brom deya detlot solja bin deigim Jisas langa det boswan gabman kemp, en deibin majurrumap ola najalot solja, en deibin ol mokimbat im na. 17 Deibin meigim Jisas werrimon speshalwan pepulwan klos, en deibin meigim im werrimon het weya deibin meigim garram jigininbala stik, 18 en deibin kipgon mokimbat im en deibin jinginat, “Haibala bos! Yu haibala king blanga ola Juwish pipul!” 19 En deibin hitimbat im garram longwan stik langa im hed, en deibin spit langa im, en deibin nildan langa im blanga tisimbat im.

20 Afta na wen deibin binij mokimbat im, deibin deigimat det pepulwan klos brom im, en deibin meigim im werrimon im ronwan klos, en deibin deigimwei im blanga neilimap im langa det kros blanga kilim im ded.

21 Afta na wen detlot solja bin deigimwei Jisas blanga kilim im, deibin grebum wanbala men deya langa roud, en deibin meigim im garrimap det kros blanga Jisas. Det men bin neim Saiman, en imbin dedi blanga Eliksenda en Rufas, en imbin growap langa det longweiwan kantri gulum Sairini. Imbin jis wokwokpas langa det roud blanga gowin langa Jerusalem wen detlot solja bin grebum im.✡ Rom 16:13

22 Wal deibin deigim Jisas langa det pleis gulum Hed Boun. Bat garram olabat langgus dei gulum det pleis Golgatha. 23 En deya na deibin trai en gibit im wain miksap garram medisin gulum mera blanga nomo filim det pein. Bat Jisas nomo bin dringgim det medisin.

24-25 Wal wen imbin gulijap kabaditaim, deibin neilimap Jisas langa det kros,✡ Saam 22:18 26-27 en deibin pudum dubala stilinbala men langa kros du, wanbala raidensaid langa Jisas en wanbala lefthensaid langa im, en detlot solja bin gembul blanga win ola klos blanga Jisas, en deibin pudum lilwan sainbod ontop langa det kros. 28 Det sainbod bin tok, “Dijan na king blanga ola Juwish pipul.”✡ Aisai 53:12

29 Wal loda pipul bin lukinatbat langa Jisas, en deibin jinginat en meigimbat fan langa im, “Hoi! Yubin tok yu garra meigim buldan det Serramoni Pleis, en yubin tok thrideistaim yu garra bildimbek det haus igin.✡ Saam 22:7; 109:25; Mak 14:58; Jon 2:19 30 Wal yu kamdan brom det kros en seibum miselp.”

31 Wal detlot haibala serramonimen en lowamen bin mokimbat Jisas lagijat du. Deibin tok gija lagijat, “Imbin oldei album najalot pipul. Bat im kaan album im ronselp. 32 Dijan iya im gulum miselp Krais. Im reken im det Masaiya, det king blanga ola Isreil pipul. Wal larram im kamdan brom det kros na en wi gin luk en bilib langa im.”

Wal det dubala men hubin heinginap said en said langa Jisas, dubala bin tok nogudbalawei langa im du.

33 Bambai na wen imbin dinataim, det san bin go dakbala, en det kantri bin jidan dakbala raidap aftanun kabaditaim, 34 en wen imbin aftanun kabaditaim, Jisas bin jingat adbala garram im ron langgus, “Ilai, Ilai, lama sabaktani?” Detlot wed im tok, “Main God, main God, wotfo yubin libum mi?”✡ Saam 22:1

35 Wal sambala pipul hubin jandap gulijap langa det kros bin irrim Jisas jingat lagijat, en deibin tok, “Yumob irrim im. Im jinginat blanga det speshalwan mesinja neim Ilaija hubin wokaran iya longtaim.”

36 Wal wan men bin ran garram reig, en imbin sokum det reig langa wain, en imbin pudum det reig langa longwan stik, en imbin gibit langa Jisas na, en imbin tok, “Wi garra luk na if Ilaija garra kaman blanga deigimat im brom det kros.”✡ Saam 69:21

37 Wal Jisas bin jingat adbala wanmo, en afta imbin dai. 38 En seimtaim wen Jisas bin dai, det bigwan ketin insaid langa det seikridwan rum deya langa det Serramoni Pleis bin breik brom top raitdan langa bodam.✡ Eksa 26:31-33

39 Wal det boswan solja hubin jandapbat deya wotjimbat detlot kros bin luk hau Jisas bin dai, en imbin tok, “Trubala dijan im San blanga God!”

40 Wal sambala gel bin deya du wotjimbat brom lilbit longwei. Meri Megdalin en det mami blanga Jeims en Josef neim Meri en det najawan gel neim Salomi, deibin ol jandapbat deya wen Jisas bin dai. 41 Detlot gel na bin oldei bulurrumbat en maindimbat Jisas wen imbin deya langa Gelali bifo imbin dai. En bigmob gel hubin kaman langa Jerusalem garram Jisas bin deya du.✡ Luk 8:2,3

42-43 Bambai na wen imbin gulijap sangodan, wan men neim Josef bin go langa Pailat, en imbin askim im blanga det bodi blanga Jisas. Det men Josef bin growap langa det taun gulum Eramathiya, en imbin haibala kaunsala en ola pipul bin rispek im, en imbin bilib langa God trubalawei.

Wal Josef bin askim Pailat blanga Jisas bodi, dumaji imbin wandi berrim det bodi bifo imbin Sebathdei, 44 en wen Pailat bin irrim Jisas bin dai streidawei, imbin hatjamp, en imbin jingat langa det boswan solja, en imbin askim im, “Trubala Jisas bin dai?” 45 En det boswan solja bin tok, “Imbin dai na.” En Pailat bin dalim Josef blanga gajim im bodi brom det kros.

46 Wal Josef bin gajim sambala speshalwan bendij, en imbin pulumdan det bodi brom det kros, en imbin repdimap det bodi garram detlot bendij, en imbin pudum det bodi insaid langa nyuwan keib weya deibin grajim wansaid langa det hil, en imbin jadimap det greib garram bigwan ston.

47 Wal det dubala gel neim Meri Megdalin en det najawan Meri hubin mami blanga Josef, dubala bin luk weya Josef bin pudum det bodi blanga Jisas.