1 “Wal main biginini, yu jinggabat wanim aibin dalimbat yu, en yu nomo fogedabat wanim aibin dalimbat yu blanga dum. 2 Yu dum ebrijing aibin dalim yu en yu garra jidan laibala. Yu teiknodis langa detlot wed weya aibin titjimbat langa yu jis laik yu lukaftumbat yu ai dubala. 3 Yu kipgon jinggabat detlot wed en yu kipum insaid langa yu hat. 4 Yu garra laigim det sabibalawei brabliwei jis laik im yu ronwan sista, en det streitbala main jis laik yu ronwan fren. 5 Dei garra album yu blanga kipawei brom detlot gel hu nomo jidan trubalawei garram olabat hasbin en hu oldei tok garram ola switwan wed blanga meigim eni men gudbinji.”

6 Wal det sabibala bin kipgon tok, “Wandei aibin lukinatbat atsaid thru langa main windo brom main haus, 7 en aibin luk bigismob yangboi hu nomo sabi matj, en aibin luk wanbala deya hu nomo bin sabi eni klebabalawei. 8 Imbin wokwokbat langa det kona langa det roud weya bin go gulijap langa det haus blanga wanbala gel. 9 Imbin go gulijap langa det haus wen imbin naitaim na.

10 “Wal det wanbala gel bin kaman langa det men na. Imbin dresap wulijim gel hu oldei silipsilipbat garram eni men blanga mani en imbin meigimbat plen blanga trikim im. 11 Det gel bin brabli nogudbala gel en im nomo bin abum eni sheim. Imbin oldei wokwokbat langa detlot roud. 12 Det gel bin oldei weidabat blanga eni yangmen langa eni roud o langa makit pleis.

13 “Wal det gel bin grebum det yangmen en kis langa im, en im nomo bin sheim, najing. Imbin luk im streit langa im ai en imbin tok, 14 ‘Ai garram det bifpat brom det sekrifais ofring langa main kemp, 15 en aibin kamat iya blanga lukabat yu, en aibin faindim yu iya. 16 Aibin gaburrumap main sweig garram det brabli purdiwan matiriyal brom Ijip. 17 Aibin meigim main sweig smel brabli gudwan garram detlot gudsmelwan medisin. 18 Yu kaman en yunmi go en silipsilip deya raidap ailibala. Yunmi meigim miselp gudbinji en abum gudtaim. 19 Main hasbin im nomo iya. Imbin gowei longwei langa najawan kantri. 20 Imbin gowei fo dubala wik, en imbin deigim loda mani.’ 21 Lagijat na det gel bin tok garram switbala wed en imbin meigim det yangmen gudbinji, en imbin lidim det yangmen blanga dum rong ting.

22 “Wal streidawei det yangmen bin bulurrum det gel jis laik det buligi wen dei lidim im langa det pleis weya dei garra kilim im, o jis laik det enimul wen im git trep, 23 en sambodi shudum det erro thru langa im hat. Imbin git trep jis laik bard weya gowin langa det net. Im nomo bin sabi im laif langa deinja.

24 “Wal main san, yu lisin langa mi. Yu lisin en teiknodis wanim ai dalim yu. 25 Yu nomo larram detkain wuman trikimbat en teikoba yu. Yu nomo go en bulurrum im. 26 Imbin ardim loda gudbala men en imbin meigim bigismob men dai du. 27 If yu go langa im haus wal im jis laik yu go deya blanga dai. Det roud im det shotkat blanga dai en go langa det pleis weya ola dedbala pipul jidan.” Lagijat na det sabibala bin tok.