1 Wal dislot na detlot wed weya det mami blanga King Lemyuwel bin oldei titjimbat im, 2 “Lemyuwel, yu na main ronwan san en yu jidan det ensa blanga main preya. Wal yu irrim gudwei wanim ai garra dalimbat yu. 3 Yu nomo weistimbat yu taim en silipsilip garram detlot wuman hubin binijimap laif blanga loda king. 4 Lisin Lemyuwel! Ola king kaan dringgimbat loda wain en jidan drangginbala en dei kaan wandimbat grog olataim. 5 Dumaji if yu dringgimbat tumatj im meigim yu fogedabat wanim yu garra dumbat en yu garra ardimbat ola po pipul. 6 Grog im blanga detlot pipul hu gulijap dai en detlot hu oldei jidan sedwan. 7 Larram olabat dringgimbat en fogedabat ola trabul dei abumbat.

8 “Bat yu garra lukaftumbat detlot pipul hu nomo garram enibodi blanga albumbat olabat en hu nomo garram enijing. 9 Yu garra oldei gibit feyago en album detlot po pipul en detlot pipul hu nomo garram enibodi.”

10 Im brabli ad blanga faindim brabli gudwan waif. Det gudwan waif im mobeda den ola purdiwan ston.

11 Im hasbin trastimbat im brabliwei en im oldei album im blanga gajim ola gudwan ting.

12 Im jidan gudbalawei langa im hasbin ebridei, 13 en gudbinjiwei im oldei meigimbat klos garram im bingga blanga ol im femili.

14 Im gajim daga brom loda difrinwan pleis jis laik det bigwan bout weya oldei bringimap daga brom longweiwan pleis.

15 Im oldei gidap ailibala en meigim daga redibala blanga im femili en im oldei dalim ola wekingel wanim dei garra dumbat.

16 Im sabi hau blanga lukaran blanga baiyim len blanga growimap greip fam.

17 Im brabli strongwan en im oldei dumbat adwek.

18 Im sabi det rait taim blanga baiyim o selim enijing en im oldei dumbat wek raidap leitbala.

19 Im oldei meigimbat im ronwan matiriyal, 20 en im oldei albumbat detlot po pipul en detlot hu nomo garram enibodi blanga albumbat olabat.

21 Im nomo wori blanga im femili wen im brabli kolwethataim, dumaji olabat garram womwan klos weya imbin meigim.

22 Im oldei meigim ola purdiwan bleingkit blanga im femili, en im ronwan klos brabli purdiwan.

23 Ebribodi sabi en rispek im hasbin hu jidan wanbala lida langa det taun.

24 Det gudwan waif oldei meigimbat klos blanga selimbat langa ola shopmenija.

25 Im brabli strongbala en kainbala, en ebribodi rispek langa im en im nomo bradin langa det taim weya garra kaman bambai.

26 Im oldei tok garram gudwan wed en im oldei tok ola wed blanga meigim najalot pipul jinggabat ebrijing gudwei.

27 Im oldei lukaftumbat im femili en im nomo jidan leisibala.

28 Blanga im biginini olabat oldei shoum rispek langa im. En im hasbin oldei preisimbat im wen im tok, 29 “Loda gudwan wuman jidan langa dijan wel, bat yu mobedawan langa olabat.”

30 Detlot switbala wed gin trikimbat yu en det brabli purdiwan feis garra tjeinj, bat pipul garra oldei preisimbat det wuman hu oldei rispek langa YAWEI.

31 Ebribodi garra shoum rispek langa det gudwan waif, dumaji imbin wek brabli gudwei, en olabat garra tok gudwei blanga im.

Binij na.