1 YAWEI, yu na det strongbalawan hu gin kipum mi seif.

Seibum mi brom ol main enami olabat hu oldei ranimap mi.

Album mi en kipum mi seif.

2 Det laiyan gajim enimul,

en im pulumwei im en baidim im,

en ola bifpat jidan ebriweya.

Wal lagijat na dei wandi deigimwei mi weya nobodi gin seibum mi.

3 Dei tok aibin dum nogud ting,

bat det stori im nomo trubala.

YAWEI, main God, if aibin dum wanim deibin tok,

4 if aibin ardim main fren hubin album mi,

en if aibin stilim enijing brom main enami eniweya,

5 wal yu larram detlot enamimob ranimap mi en deigim main laif.

Dei gin pudumbut mi,

en dei gin kilim mi ded,

en libum mi langa graun.

6 Gidap, YAWEI!

Kaman en gitwail langa main enami olabat!

Kaman en stapam detlot hu wail langa mi,

dumaji yubin tok blanga det dei wen yu garra jadjim pipul.

7 Yu dalim ola pipul blanga majurrumap miselp langa yu,

en yu jidan langa yu tjeya langa det haibala pleis redibala blanga jadjim pipul.

8 Yu na, YAWEI,

yu bos blanga det kot.

Wal yu jadjim mi, YAWEI!

Yu jadjim mi en shoum detlot pipul mi gudbala.

Yu shoum olabat aibin jidanbat gudbalawei.

9 God, yu oldei dum wanim rait.

Yu sabi wanim melabat jinggabat en wanim melabat filim.

Yu stapam detlot nogudbala pipul brom dumbat krulbala ting langa najalot pipul.

Yu gibit ola gudbala ting langa detlot pipul hu jidan raitwei.✡ Reb 2:23

10 God, yu jis laiga shild blanga mi.

Yu kipum mi seif wen trabul kaman,

Yu lukaftum ol yu pipul hu teiknodis langa yu.

11 Wen yu jadjim pipul yu oldei gibit olabat feyago.

Ebridei yu luk detlot pipul hu dumbat ola nogudbala ting,

en yu tok, “Ai garra panishim olabat blanga tharran.”

12-13 If dei nomo sori blanga olabat nogudbalawei,

en if dei nomo libum,

wal yu redi blanga panishim olabat.

Wen wanbala men wandi panishim im enami,

im shapinimap im naif.

Im meigim im bo en erro redibala garram faiya,

en im poindim langa im enami.

Wal lagijat na yu redibala blanga panishim pipul blanga olabat nogudbalawei.

14 YAWEI yu sabi detlot nogudbala pipul.

Dei oldei jinggabat wotkain nogud ting dei gin dum.

Olabat tok miselp, “Hau wi garra trikim sambala pipul tudei?”

“Weya wi garra go blanga trikim olabat?”

“Wi garra meigim diskain trabul tudei na.”

Lagijat na dei jinggabat.

15-16 Bat dei ardim olabat ronselp langa det trabul wen deibin jinggabat blanga ardim najalot pipul,

jis laik det men weya grajim bigwan hol blanga gajim enimul,

en im buldan insaid langa det hol imselp,

en jis laik imbin meigim trep blanga wailwan enimul,

en afta im pudum im ronwan fut insaid langa im ronwan trep.

17 Ai garra kipgon preisimbat yu, YAWEI,

dumaji yu tridimbat ebribodi raitwei.

Ai garra preisim yu garram ola song.

YAWEI, yu brabli haibala.