1 YAWEI, oni langa yu mi prei en weship.

2 Mi trastimbat yu na, main God.

Nomo larram main bedfren olabat bidim mi.

If olabat bidim mi,

olabat garra tisimbat mi,

en ai garra jidan garram sheim.

3 Nobodi gin bidim ol detlot pipul na hu trastimbat yu,

Bat yu, YAWEI, garra bidim detlot pipul hu gibit yu bekboun.

4 Shoum mi YAWEI wujei yu wandim mi blanga jidan.

Shoum mi blanga wok langa det rait roud.

5 Shoum mi det trubalawei blanga jidan.

Yu na det wanbala God mi oldei bulurrumbat.

Yu na det God weya yu oldei seibum mi.

Mi oldei trastimbat yu.

6 YAWEI, jinggabat ol dislot ting na.

Brom longtaim yubin oldei jidan kainbalawan,

en yubin oldei kipgon laigimbat pipul.

7 Wen aibin yangbala, YAWEI,

aibin dum loda nogudbala ting.

Wal yu sori langa mi en fogedabat ol detlot ting na.

Yu oldei kipgon laigimbat pipul olataim en yu gud langa ola pipul.

Wal mi askim yu blanga dum lagijat langa mi du.

8 Dumaji YAWEI det trubala God oldei dum ebrijing raitwei en im gudwan,

wal im shoum detlot nogudbala pipul hau blanga jidan raitwei.

9 Im shoum ol lobala pipul wujei blanga go langa det raitwan wei,

en im lenimbat olabat ebrijing im wandim olabat blanga dum.

10 Dumaji im trubalawan en im oldei laigimbat pipul,

wal im shoum detlot pipul hu laigim im det raitwei blanga kipum im strongwan pramis.

11 Yubin pramisim langa yu neim blanga sori langa ola pipul blanga olabat nogudbalawei.

Wal yu sori langa mi na blanga ol main nogudwan ting.

12 Ol detlot pipul hu teiknodis langa wanim YAWEI wandim olabat blanga dum,

wal olabat garra len brom im na blanga bulurrum det rait roud.

13 Olabat garra oldei abum detmatj ebrijing.

Blanga olabat ola bigininimob garra jidan boswan blanga olabat ronwan kantri.

14 Ol detlot pipul hu dum ebrijing weya God wandim olabat blanga dum,

wal im gudfren blanga olabat.

Im kaan nokambek im strongwan pramis langa olabat.

15 Mi weit olataim langa yu YAWEI blanga album mi.

Oni yu oldei seibum mi brom ola brabli nogudwan trep.

16 Kaman en album mi YAWEI.

Yu kain langa mi.

Mi jidan miselp kantri en mi garram loda trabul.

17 Album mi nomo blanga woribat en blanga jinggabat main trabul olataim.

Yu deigidawei ol main trabul.

18 Luk haumatj trabul ai garram.

Yu sori langa mi blanga ola nogudwan ting aibin dum.

19 Ai garram loda bedfren.

Yu gin luk olabat detmatj na.

Brabliwei na olabat nomo laigim mi.

Yu gin luk, YAWEI.

20 Nomo larram olabat bidim mi en meigim mi sheim.

Yu maindim mi,

en yu kipum mi seifwan du.

Langa yu mi askim yu blanga lukinatbat mi olataim.

21 Ai dum ola raitwan ting,

en mi trastim yu.

Wal yu meigim mi jidan laibalawan.

22 God, yu seibum blanga yu ola Isreil pipul brom detlot nogudbala ting.