1 Ol yumob pipul hu jidan raitwei langa YAWEI, jingat adbala gudbinjiwei blanga ebrijing imbin dum.

Preisim im ol yumob pipul hu teiknodis langa im.

2 Preisim YAWEI garram ol kain gita,

en sing song langa im.

3 Sing nyuwan song langa im.

Plei det gita gudbalawei en jingat adbala gudbinjiwei.

4 Ola wed blanga YAWEI im trubalawan,

en yu gin trastim ebrijing im dum blanga album yu.

5 YAWEI laigim wanim gudwan en wanim feyagowan.

Im garram det olagijawan filing blanga laigim ebrijing langa dijan wel.

6 YAWEI bin meigim ebrijing langa hebin garram im wed.

Imbin jis tok en det san, mun, en ola sta bin kamat.

7 Imbin hipimap ola solwoda langa wan pleis.

Imbin lokimap ola woda raitdan andanith langa det solwoda langa im ron stowahaus.

8 Ebribodi hu jidan langa dijan wel garra weship langa YAWEI.

Shoum rispek langa im ol yumob pipul hu jidan ebriweya langa dijan wel.

9 Wen imbin tok dijan wel bin kamat.

Wen imbin gibit oda ebrijing bin kamat.

10 Langa detlot kantri weya pipul nomo bulurrum YAWEI, im nomo larram eni nogudbala plen hepin.

11 Bat ebrijing weya imbin plenim oldei hepin,

en ebrijing blanga im jidan olagijawan du.

12 Ola pipul langa det kantri weya weship langa YAWEI det trubala God, jidan gudbinjiwei,

detlot pipul na weya imbin pikimat blanga imselp, jidan gudbinjiwei.

13 YAWEI im lukdan brom hebin en im luk ola pipul.

14 Brom weya im jidan bos, im lukdan langa ebribodi hu jidan langa dijan wel.

15 Im na meigim ebribodi hat en main,

en im sabi ebrijing dei dum.

16 Nomo eni king win dumaji im garram strongbala ami.

Nomo eni solja win dumaji im strongbala.

17 Ola hosis dei yusum langa wo kaan win.

Detlot strongbala hosis kaan seibum enibodi.

18 YAWEI lukaftumbat ol detlot pipul hu teiknodis langa im,

ol detlot na hu trastimbat im olagijawan filing blanga laigimbat.

19 Im seibum olabat brom daidaibat,

en im nomo larram olabat dai wen nomo eni daga jidan langa olabat kantri.

20 Wi trastim langa YAWEI.

Im na maindimbat en albumbat wi.

21 Im na meigim wi jidan gudbinjiwei,

en wi trastimbat im holiwan neim.

22 YAWEI, larram yu filing blanga laigimbat olagijawan jidan garram melabat.

Melabat trastimbat yu blanga ebrijing.