1 Pipul brom ebriweya, klep yumob bingga gudbinjiwei.

Sing ola song brabli adbala blanga preisim YAWEI.

2 YAWEI na det brabli haibalawan God en wi garra rispek oni langa im.

Im na det brabli nambawan king, en im jidan bos blanga ebrijing langa dijan wel.

3 Imbin meigim wi win langa ola pipul.

Imbin meigim wi jidan bos blanga ola kantri.

4 YAWEI laigim wi detmatj.

Imbin pikimat blanga wi dijan kantri Isreil weya wi jidan na.

Im brabli gudwan kantri.

5 Wen God im gowap langa im speshalwan tjeya,

ola pipul jingat gudbinjiwei, en olabat blowim ola hon adbala.

6 Sing song blanga preisim God!

Sing song blanga preisim wi king!

7 God im jidan king ebriweya langa dijan wel.

Preisim im garram ola song.

8 God jidan langa im seikridwan tjeya.

Im jidan bos blanga ola pipul langa ebri kantri.

9 Ola boswan blanga ola kantri majurrumap miselp dumaji olabat holot na ola pipul blanga det God blanga Eibrahem.

Im mowa strongbala langa ola ami,

en im na brabli boswan blanga ebrijing.