53
Det nogudwanwei blanga pipul* Luk langa Saam 14.
Song blanga Deibid.
1 Siliwan pipul reken, “God nomo iya!”
Olabat holot brabli nogudwan, en olabat bin dumbat ola brabli nogud ting.
Nobodi iya dum enijing rait.
2 God im lukdan brom hebin blanga luk if enibodi jidan raitwei,
en if enibodi weship im du.
3 Bat deibin ol tenawei brom God,
en holot na jidan nogudwan.
Nobodi dum rait ting enimo.✡ Rom 3:10-12
4 God im tok, “Maitbi dei nomo sabi.
Wotfo dei kaan len, dislot nogud pipul?
Detlot nogudbala pipul oldei deigimwei ebrijing brom main pipulmob.
Detlot nogudbala pipul nomo jingat langa mi.”
5 Olabat garra bradin nomo lilbit weya dei nomo bin bradin bifo.
God na garra binijimap detlot enamimob,
en libum olabat boun leidan ebriweya.
Olabat garra sheim miselp,
dumaji God bin gibit bekboun langa olabat.
6 Mi prei adbalawei langa God weya im jidan langa Saiyan, blanga seibum ola pipul langa Isreil.
Olabat garra jidan gudbinji brabliwei wen God garra meigim olabat abum ebrijing igin.