1 YAWEI det trubala God im Boswan.

Im jidan brabli haibalawan en brabli strongwan.

Dijan wel im jidan langa im rait pleis en nomo enijing kaan mubum im.

2 YAWEI, yubin oldei jidan boswan bifo enijing bin jidan.

3 YAWEI, det solwoda jinginat adbalawei jis laik thanda.

Im jinginat nomo lilbit.

4 YAWEI, im jidan langa hebin en im na det Brabli Haibalawan Bos blanga ebrijing.

Im mowa strongbala langa det solwoda weya im jingat,

en im mowa strongbala langa ola bigwan weib langa solwoda.

5 YAWEI, ola lowa blanga yu jidan olagijawan,

en yu Serramoni Pleis im jidan brabli seikridwan olagijawan.