1 Oni langa yu na YAWEI, oni langa yu melabat garra preisimbat,

dumaji yu kipgon laigimbat yu pipul olabat,

en yu jidan brabli trubalawan langa olabat.

Melabat kaan preisim miselp.

2 Wotfo ola pipul brom najalot kantri askim melabat,

“Wujei yumob God?”

3 Blanga melabat God im jidan langa hebin.

Im gin dum enijing im wandim blanga dum.

4 Ola drimin blanga najalot pipul, olabat bin meigim brom silba en gol.

Garram olabat ronwan bingga olabat bin meigim detlot drimin.

5 Detlot drimin garram mawus bat olabat kaan tok, najing.

Olabat garram ai, bat olabat kaan luk, najing.

6 Olabat garram irriwol bat olabat kaan lisin enijing,

en blanga olabat nos kaan smelim enijing.

7 Blanga olabat bingga kaan filim enijing.

Blanga olabat leig kaan mubabat blanga wok, najing.

Olabat kaan tok du, najing.

8 Larram ol detlot pipul hubin meigimbat olabat en hu trastim olabat jidan jis laik detlot drimin sheip weya deibin meigim.✡ Saam 135:15-18; Reb 9:20

9 Ola Isreil pipul, yumob garra trastim langa YAWEI.

Im na oldei albumbat en maindimbat yumob.

10 Ola femili blanga Eran, hu jidan detlot serramonimen blanga YAWEI,

yumob garra trastim langa YAWEI.

Im na oldei albumbat en maindimbat yumob.

11 Ebribodi hu weship langa YAWEI, yumob garra trastim langa YAWEI.

Im na oldei albumbat en maindimbat yumob.

12 YAWEI kaan fogedabat langa wi.

Im garra albumbat ola Isreil pipul,

en ola serramonimen blanga God.

13 YAWEI garra albumbat ol detlot hu oldei weshipbat langa im,

nomeda im haibala o lobala.✡ Reb 11:18; 19:5

14 Mi prei langa YAWEI blanga meigim yumob femili en blanga olabat femilimob blanga jidan bigmob.

15 Larram YAWEI gibit ol gudwan ting langa yumob.

Im na bin meigim ebrijing langa skai en dijan kantri.

16 Det haibala hebin im jidan blanga YAWEI,

bat imbin gibit ola kantri langa dijan wel langa wi.

17 Ol detlot hubin binijap kaan preisim YAWEI enimo.

18 Oni wi na hu jidan laibala garra gibit im theingks olagijawan.

Aleiluya! Preisim YAWEI!