1 YAWEI det trubala God im gudbala langa wi.

Dumaji im gudbala langa wi, blanga tharran na wi garra gibit im theingks.

Trubala, im laigim wi tudei en olagijawan.✡ 1 Kran 16:34; 2 Kran 5:13; 7:3; Esra 3:11; Saam 100:5; 106:1; 107:1; 118:1; Jera 33:11

2 Im na det brabli haibala God.

Blanga tharran na, wi garra gibit im theingks.

Trubala, im laigim wi tudei en olagijawan.

3 Im na det bos.

Dumaji im bos, wal wi garra gibit im theingks.

Trubala, im laigim wi tudei en olagijawan.

4 Im dum ola brabli klebabala ting weya nobodi iya kaan dum.

Trubala, im laigim wi tudei en olagijawan.

5 Im na sabi ebrijing brabliwei.

Lagijat na imbin meigim det skai.

Trubala, im laigim wi tudei en olagijawan.✡ Jen 1:1

6 Imbin meigim det graun jidan ontop langa det solwoda.

Trubala, im laigim wi tudei en olagijawan.✡ Jen 1:2

7 Imbin meigim ola lait.

Trubala, im laigim wi tudei en olagijawan.

8 Imbin meigim det san shain deitaim.

Trubala, im laigim wi tudei en olagijawan.

9 Imbin meigim det mun en ola sta shain naitaim.

Trubala, im laigim wi tudei en olagijawan.✡ Jen 1:16

10-12 God bin panishim detlot pipul langa Ijip,

en imbin kilim ded ola feswan san blanga olabat.

Trubala, im laigim wi tudei en olagijawan.

Garram im strongwan pawa, imbin seibum ola Isreil pipul brom Ijip.

Trubala, im laigim wi tudei en olagijawan.✡ Eksa 12:29,51

13 Imbin kadimat det solwoda gulum Redsi.

Trubala, im laigim wi tudei en olagijawan.

14 Imbin deigim detlot Isreil pipul thru langa midul.

Trubala, im laigim wi tudei en olagijawan.

15 Bat imbin draundim Fero en im solja olabat deya langa det Redsi.

Trubala, im laigim wi tudei en olagijawan.✡ Eksa 14:21-29

16 Imbin deigim im pipul thru langa det bush kantri.

Trubala, im laigim wi tudei en olagijawan.

17 Imbin kilim ded ola strongbala boswan.

Trubala, im laigim wi tudei en olagijawan.

18 Imbin kilim ded detlot boswan weya ebribodi sabi.

Trubala, im laigim wi tudei en olagijawan.

19 Imbin kilim ded Saihan, det boswan blanga ola Emarait pipul.

Trubala, im laigim wi tudei en olagijawan.✡ Nam 21:21-30

20 Imbin kilim ded Og, det king blanga ola Beishan pipul.

Trubala, im laigim wi tudei en olagijawan.✡ Nam 21:31-35

21-22 Imbin pulumat olabat kantri,

en imbin gibit langa ola Isreil pipul friwan.

Trubala, im laigim wi tudei en olagijawan.

23 Imbin jinggabat wi wen wibin jidan brabli nogudbinji.

Trubala, im laigim wi tudei en olagijawan.

24 Imbin seibum wi brom wi enami olabat.

Trubala, im laigim wi tudei en olagijawan.

25 Im gibit daga langa ebribodi en langa ola enimul du.

Trubala, im laigim wi tudei en olagijawan.

26 Gibit theingks langa YAWEI.

Im deya langa hebin.

Trubala, im laigim wi tudei en olagijawan.