1 YAWEI, yubin luk insaid main hat,

en yu sabi ebrijing weya mi dum en jinggabat.

2 Yu sabi ebrijing.

Wen mi jidan en wen mi jandap, yu sabi.

Nomeda yu longwei, bat stil yu sabi wanim mi jinggabat.

3 Yu sabi weya mi go en weya mi leidan.

Yu sabi ebrijing blanga mi brabliwei.

4 Wen mi stil jinggabat wanim ai garra tok,

YAWEI, yu sabi tharran du.

5 Yu lida langa mi,

en yu biyain langa mi,

en yu holdim mi garram yu bingga.

6 Yu sabi mi brabliwei!

Ai kaan sabi hau yu sabi mi lagijat.

7 If ai wandi gowei brom yu, weya ai garra go?

Nomo eniweya! Ai kaan gowei eniweya brom yu.

8 If ai gowap langa hebin, yu deya.

If ai godan langa det pleis weya ola dedbala pipul go, yu deya.

9 If ai flaiwei langa weya det san gidap,

o if ai jidan weya det solwoda binij weya det san godan,

10 wal yu deya du blanga lidim mi en album mi.

Yu bingga gin holdim mi langa ebri pleis.

11 If ai tok miselp, “Ai garra blandim miselp langa dakbala.

If nomo lait deya maitbi YAWEI kaan luk langa mi.”

12 Bat nomo eni dakbala jidan langa yu.

Yu gin luk naitaim jis laik yu luk deitaim.

Dakbala en lait jidan seim langa yu.

13 Trubala, wen aibin insaid langa main mami binji,

yubin meigim mi brabliwei.

Yubin joinimap mi deya insaid.

14 Ai preisim yu dumaji yubin meigim mi klebabalawei.

Mi hatjamp wen mi jinggabat tharran.

Yu sabi mi brabliwei.

15 Yubin luk mi wen main bodi bin grogro,

en wen yubin joinimap mi gudwei deya insaid langa main mami.

16 Yubin luk mi deya wen ai nomo bin brabli beibi,

en det taim na yubin sabi blanga mi brabliwei.

Yubin sabi wotaim ai garra bon,

en wotaim ai garra dai,

en yubin raidimdan tharran langa yu buk bifo aibin bon.

17 Main God, ebrijing weya yu jinggabat,

olabat gudwan langa mi, mowa den enijing.

Ai kaan kaundimap ola difrin ting weya yu jinggabat.

18 Ai kaan kaundim olabat,

dumaji dei jidan mowa den ola sengraun.

Bat wen ai go silip en wen ai gidap mi stil garram yu.

19 Bat God, ai wandim yu garra binijimap detlot brabli nogud pipul,

ol detlot hu oldei meigimbat plen blanga medrimbat pipul.

Yu andimwei olabat brom mi!

20 Olabat nomo rispek yu, najing!

Olabat tokabat yu brabli nogudwei.

21 Ai heidim detlot pipul hu heidim yu, YAWEI.

Ai nomo laigim detlot hu gibit yu bekboun.

22 Ai nomo laigim detlot pipul,

Dumaji olabat main enami.

23 Luk insaid langa main hat, YAWEI,

en faindat if mi nogud insaid langa main hat.

Luk if mi nogud wen mi jinggabat enijing.

24 Faindat if ai bulurrum nogudwei lagijat.

Lidim mi en ai garra wok langa det olagijawanwei.