15
Sebenbala einjul garram sebenbala trabul
1 Brom deya langa main drim aibin luk najawan brabliwan sain bin kamat langa hebin. Aibin luk 7 einjul garram sebenbala trabul. Detlot trabul bin ola laswan trabul, dumaji garram detlot trabul na God garra binij panishimbat ola nogudbala pipul.
2 Brom deya aibin luk samting jis laiga shainiwan woda, jis laiga bilibong garram faiya, en aibin luk deya wansaid langa det woda bigmob pipul bin jandap. Deibin detlot pipul hu nomo bin bulurrum det enimul en buldan langa det sheip blanga im. Dei nomo bin pudum det namba bren blanga im neim langa olabat forid, dumaji olabat bin win.
Wal God bin gibit detkain gita gulum hap langa detlot pipul, 3 en deibin sing blanga det yangwan ship, det song weya Mosis det wekinmen blanga God bin lenim olabat blanga sing,
“God, yu brabli haibala.
Yu na det Brabli Bos.
Ebrijing weya yu dumbat, yu dumbat brabli gudwan.
Yu oldei jidan trubalawei. Yu nomo laiyawan.
En yu oldei gibit feyago langa ebribodi.
Yu na king blanga olkain pipul.✡ Eksa 15:1
4 Nobodi kaan tenawei brom yu olagija, dumaji ebribodi garra jinggabat yu.
Dei garra lukbek langa yu en weship langa yu.
Nobodi jidan brabli gudwan. Oni yu na.
En ola traib langa ebri kantri garra kaman langa yu,
en dei garra baudan en tok gudwei langa yu,
dumaji yu na bin dumbat ola gudwan wek,
en ebribodi bin luk.”
Lagijat na detlot pipul bin tok.✡ Saam 86:9; Jera 10:7
5 Brom deya aibin luk det serramoni pleis langa hebin bin opin, en aibin luk rait insaid langa det Seikridwan Haus weya God imselp oldei jidan.✡ Eksa 38:21 6 Detlot 7 einjul garram detlot sebenbala trabul bin kamat brom det serramoni pleis na. Deibin ol werrimon brabli shainiwan waitwan klos, en deibin abum goldinwan belt langa olabat briskit.
7 Brom deya wan enimul brom det fobala najakain enimulmob bin gibit detlot 7 einjul 7 goldinwan dish. God bin wail brabli langa ola nogudbala pipul, en imbin bilimap detlot dish garram olkain trabul.
Wal God im jidan olagijawan brabli. Im kaan neba dai. 8 En im garram pawa nomo lilbit, en im shainiwan jis laik det san.
Wal God bin shain detmatj, en garram smok imbin bilimap det serramoni pleis. Nobodi bin gowin langa det pleis na raidap detlot 7 einjul bin spilim ola trabul brom detlot 7 dish en detlot trabul bin binij.✡ Eksa 40:34; 1 King 8:10,11; 2 Kran 5:13,14; Aisai 6:4