4
Drim blanga det lempsten
1 Wal det einjul hubin toktok langa mi bin kambek en imbin weikimap mi jis laik aibin silip. 2 En imbin tok langa mi, “Wanim yu gin luk?” Aibin ensim im, “Ai gin luk golwan lempsten en deya ontop im garram det boul garram oil. En ontop langa det lempsten sebenbala lemp, en insaid langa ebri lemp detlot pleis blanga laidim sebenbala lait. 3 Dubala olibtri bin jandap langa det lempsten, wan tri langa det raidensaid en najawan tri lefthensaid.”✡ Reb 11:4 4 Afta aibin askim det einjul, “Wanim dislot ting min, bos?”
5 Imbin askim mi “Yu nomo sabi wanim olabat min?” En aibin ensim im, “Yuwai bos, ai nomo sabi wanim olabat min.”
6 Det einjul bin dalim mi dijan wed brom YAWEI det trubala God blanga Serababal. Imbin tok, “Langa yu ronselp yu nomo brabli strongwan men blanga bildimap dis bigwan Serramoni Pleis. Yu nomo garram loda pawa, bat main spirit im brabli strongwan en im garra meigim yu brabli strongbala blanga binij bildimap det Serramoni Pleis.✡ Esra 5:2 7 Nomeda yu garram bigwan wek, en nomeda yu garra abum loda trabul, bat detlot trabul kaan stapam yu Serababal, yu garra kipgon, nomo enijing kaan stapam yu. Yu garra pudum det laswan ston ontop langa det Serramoni Pleis, en ola pipul garra jingat, ‘God yu lukaftum dis Serramoni Pleis! God yu lukaftum dis Serramoni Pleis!’ ”
8 En YAWEI bin gibit mi mowa blanga dijan wed. Imbin tok, 9 “Serababal bin stadimap det wek langa dis Serramoni Pleis garram im bingga en im garra pudum det laswan ston garram im ronwan bingga blanga binijim dis Serramoni Pleis. Langa det taim na main pipul olabat garra sabi mi na, YAWEI, bin jandim yu langa olabat. 10 Detlot pipul kaan nogudbinji wen imbin bildimap oni lilbit. Dumaji wen dei kipgon bildimap, ola wol garra gowap mowa haiwan en detlot pipul garra luk Serababal, olabat bos garram det streitwan lain langa im bingga blanga kipum detlot wol streitbala, en dei garra gudbinji.”✡ Reb 5:6
Afta det einjul bin tok langa mi, “Detlot sebenbala lemp yubin luk, olabat detlot sebenbala ai blanga YAWEI weya luk ebrijing langa hebin en langa dijan graun.”
11 Afta aibin tok langa im, “Det dubala tri weya jandap langa det raidensaid en lefthensaid blanga det lempsten, wanim dubala min?✡ Reb 11:4 12 En ai gin luk dubala tri garram olib daga, en oil brom detlot olib daga randan thru dubala golwan paip langa detlot lemp. Wanim ol dislot ting min?”
13 Imbin askim mi, “Yu nomo sabi wanim olabat min?” En aibin ensim im, “Yuwai bos, ai nomo sabi.”
14 Imbin tok langa mi, “Dijan na, det dubala men weya God bin pikimat. Imbin spilim oil langa dubala blanga meigim dubala im ronwan wekinmen, en im na bos blanga ebrijing langa dijan wel.”