1 (Legic galeŋawac; Dawidiac legic ʒéra, Legic.) Anutu yaru, haʒéchéra héndéŋ énécmiyu tuidacmu. Héŋara meanʒu ionac waŋ énécmiyu mocʒoŋ iwac murunec néŋgacma kendacmu. 2 Luhucnéŋ hofac mihilaŋgéyu keŋanʒac ésécnec nesi énécmiyu kendacmu. Gericiguc kendolnéŋ pépélima maanʒac ésécnec ic biria eneŋ Anutuac wésiaiguc humu qai wandacmu. 3 Ic solaŋa eneŋ ségiségi wamma Anutuac wésiaiguc técgéma aria mema ewa hia nimma ségiségi wammu. 4 Anutuac muru legic héimima iwac qara mepésimimu. Hosusuiguc tacma baec kéra kérasiaiguc keŋha waŋaŋec i meyacmigic.* Kiwi tosaraiguc; ‘meyacmigic’ ménda oma ‘héna yanda haimigic’ ooyawac hezac. Iwac qara imi Yawe, wésiaiguc técgéma aria memu.

5 Rara téréyaiguc kecanʒac Anutu iminéŋ gupaŋ merac onac maŋgoc ʒéma embac malé onac ʒégésigési ic kiwa wanʒac. 6 Anutunéŋ niŋgumbi niŋguŋ kecʒu imi ama géséhéra mihicŋi énécmima hésa amaiguc kecʒu imi metecgé énécmima kekecgina mébéréŋgé énécmianʒac. Néŋ acqeqe ic ionac tacyacac buŋa imi baec kérakérasia waŋanʒac.

7 Anutu, ic embachécga wéséginaiguc walac keŋnec nalé imuaru, baec kéra kérasia qericma keŋec nalé imuaru, (Ohec) 8 baecnéŋ hiriyu kurumeŋnéŋ mayec.† Anutunéŋ Mose héna ac mimaŋ ʒé mayec nalé imuaru gururu mericma parandaŋ pilitic qeyu hosusu ʒapéla mayec imuac niŋɋelima ʒézac. Waŋu Sinai baec boŋa acguc Israelac Anutu guac wéségaiguc hiriyec. 9 Anutu geŋ kia sécya haina mayec. Guac mératéc buŋahécganéŋ météqététaŋ waŋgic meseli énécminec. 10 Imuhuc wamma guac hénaoriŋ hécga imuaru onopocna kecgic. O Anutu, geŋga hiaga niŋac maqeqeya ionac imi iwawai mihicŋi énécminec.

11 Geŋ ackuaʒéc nénézéna embac gezac qéʒéŋ ac ʒéauanʒu imi tuŋ yandaguc wanʒac. 12 Téŋgiŋ ic tuŋa tuŋa ionac ic kewu hécginanéŋ ichéra iniguc néŋgacma kendacgic, embac amaiguc kecgic ieneŋ‡ Hebiraio aciguc; embac méŋ amaiguc kerec. acguc téŋgiŋ ic onac ama baec saocyaiguc iwawai mema hama méndéŋ énécmiyec. 13 Ini rama demiŋ qeriaiguc hegic tanera imi kembo nei qeŋgaŋa siliwanéŋ oso osoya, nei ʒucya goli ɋaoranéŋ oso osoya ésécnec waŋec.

14 Wandac wandac medac medac miŋinanéŋ ic kewu héndéŋ énécmiyu Zalmoniguc komboc efefia luhucnéŋ mihilaŋgéyu sicsaoc maanʒac tanec waŋgic.

15 Basanac baec boŋa imi Anutuac buŋa. Basanac baec imi eŋeŋa yanda. 16 Baec boŋa eŋeŋa eŋeŋa ini némac niŋa baec boŋa§ Zion baec boŋa niŋac ʒézac. Anutunéŋ tacyac wammaŋ ʒé wanʒac imuac nimbupuc wamma héŋ sosolizu? Hélacnec Yawenéŋ baec boŋa imuaru hémbénaŋa kecmac.

17 Anutuac yaré qeqeac becosicac karesi imi ʒaŋgégina tauseŋa tauseŋa wanʒu. Miŋ Kewunéŋ sucginaiguc keru héŋni Sinai baec boŋa tacyacac buŋa téréyaiguc kecʒac ésécnec wanʒac. 18 Gi ou eŋeŋaiguc eŋnec nalé imuaru hésa ic énépésinec imi héré énécmima kemma ic onac murunec me acqeqe ic ionarunec acguc momacnec sese menec. Mema Yawe Anutunéŋ imuaru tacyac wammaŋ ʒé eŋec.** Zion baec boŋaiguc eŋec.

19 Kaiweya kaiweya yéwérinina nonagicma bisianʒac Miŋ Kewu Anutunina imi mepésimimu. (Ohec) 20 Anutu imi aŋgéŋ titi miŋina. Humuc igucnec qiʒiʒiŋgéma keŋkeŋa imi Anutuac murunec.

21 Haʒéchéra ionac orucgina, nalé séc képésicac héna tima keŋha waŋanʒu imi onac oruc ʒuc ic kewuac opoc tanec meʒericgic heheya imi Anutunéŋ qésémma unumac. 22 Miŋ Kewunéŋ ʒézac; Neŋ waŋ énécmiwa ieneŋ Basan igucnec liliŋgéma hamu. Waŋu konduŋ hiŋgac hiŋgara igucnec muŋguc liliŋgéma érému.†† Hénia imi Anutuac haʒéchéra eneŋ néŋgacma kemmuac séc qahac waŋu baec boŋa ʒuŋ igucnec me Konduŋ Humumia imuacnec liliŋgéma hamuac hezac. 23 Hagic eneŋ humumia unuma sacginaiguc hénagina tinduŋgégic kazugina acguc sacgina nemu.

24 Anutuna, ic kewuna gi ocmuŋ téréyaiguc kereŋna ieneŋ géŋgic. 25 Walac legic héihéi ic eneŋ hocma keŋgic imuac andiaiguc waŋgoŋ ic eneŋ embac seraŋa tambariŋ ginaguc ionac sucginaiguc méndac énécmima keŋgic. 26 Israel hénaoriŋ sucginaiguc Miŋ Kewu Anutu mériaŋ ac wammigic. Israelac doku hogocya igucnec hicŋihicŋiya ini imuhuc wammigic. 27 Imuaru imi ʒiagina Benʒaminac sac taséhéra ieneŋ kiwa waŋ énécmima kecgic. Waŋu Yudawac galeŋhéra ʒéma Sebulonac galeŋhéra ʒéma Naftaliac galeŋhéra ieneŋ momacnec kecgic.

28 Anutunéŋ kucgina ʒéhiaru énécmizac. O, Anutu neŋaŋ niŋac waŋ nénéc minec imi meseligina. 29 Ocmuŋga Yerusalem tacʒac imuac niŋac wamma ic kewu eneŋ guac sese mema hamu.

30 Ʒéléŋ baeciguc haséŋ yaŋ ʒéma burumakao iwa tuŋaguc ʒéma baera baera imuac burumakao merawa imi ac geriwaguc waŋ énécmina. Anutunéŋ ic yaréac siŋa niŋanʒu imi héndéŋ énécmima siliwagina tidacgéyec. 31 Ic kuneŋ eneŋ Iʒipte baeciguc érégic, Etiopia ic eneŋ focdac méragina meyacma Anutuaru opocamumu.

32 Baecac héŋgaleŋ ama areŋa yanda mocʒoŋ Anutu legic héimimu. Miŋ Kewu mepésimimu. (Ohec) 33 Inéŋ kurumeŋ kerecac kecʒac imuac qahaiguc tacma parandaŋ ésécnec ac ʒéanʒac.

34 Anutuac kuha ʒéau énécmigic. Iwac eeya yéwérianéŋ Israel qacginaiguc hezac. Iwac kuhanéŋ kurumeŋiguc hezac. 35 O Anutu ocmuŋgaiguc kecanʒaŋ gi imi welic welicgiaguc. Israelac Anutu imi eŋeya ic embachéra ionac kuc énécmima meseli énécmianʒac. Anutu mepésimigic!