Godungku nyungu kuku prophetanda Joelanda dajin, bamanda Israel-warranda bubungu Judah balkanka. Nyulu yalaman, “Yinja-yinja wubul bajaku kaday bubungu Judah. Jana mayi wubulku paddockmunbu nukal; mayi corn, wheat yamba-kari, bamangka nukanka. Jikan yamba-kari, bulkingka, sheepangka, nanny goatungku nukanka, yinja-yinjangka wubulku nukanya. Yurra binga-bingangka yala kari nyajin jakalbaku. Godungku yinja-yinja kari kiril. Nyulu Israel-warra punishim-bunganka, jana nyungundumun jurrkijinya. Godungku balkal, ‘Milka-bujarmaka yurrawunku buyun-buyunku; jurrkijika baja ngaykunduku. Ngayu manun-manunmal yurranka, juma yurranda kaday. Juma ngayu ngayku wawu dajil bamanda wubulimbaku. Yinyamun jana warru-warrungku, and maral-maralangka ngayku kuku yirrkay yiringkurrku. Jana binga-bingangka bijarr bijarril, ngayu nguwimal milbiji dingkar-dingkaranda. Yala-yala ngayu ngayku wawu yungal ngaykuwunbu workingmananda, jalbu-jalbundu, dingkar-dingkaranda. Kaki bama ngaykundu mambarriji, and babaji ngayu buyun-buyun kidanka janandamun wawumun, ngayu jananin juran-bungal baja.’ ” Yinya kuku Godungku Joelanda balkan, Israel-warranda balkanka.