1 Ba ene yegl pirkan eratnga: Dumo makan dundinagledi erambuka engemo yumbun kinde kanekane plau dinambuka. 2 Yomba ye yene pre pirmbi mitna eran, te moni pre munduno pond panan, yene kangino dimitna ende, karaugl engre, yomba kenatnosi tendre, neno mano kanno sende, yomba diwakai yeitekre, ana mambuno wakai mina mokono tenaglkwa. 3 Te ye yene bormai suwara kan wakai yeikraglkwa, te yaglkumba tandaglmeno kinde kondo tekre, yomba kenatno site, yene embriyeno sugl wakai moglkre, yomba ere sindre ana mambuno wakai eraglkwa prapra pamara i kankinde yenaglkwa. 4 Ama yene yombano sigoraglmedi pre yaglkumba onguno mina yenaglkwa, te nomano kinde unambere oglandi ertre, yene yomba kande mounedi pirmbi mitna eran, nangino mina gun yenaglkwa mambuno kanekane pangwa ipre munduno panan, ana God pre munduno paikrambuka. 5 Ye nangino tembe kamambuno singigle pamere ere wanmoraglkwa, ba nomano mina God yombuglomo ya blesingmo wakai i ta suna paikrukwa. Yomba kinde koyeglmere ene kanwinge ere mogl eglke endo.

6 Yomba tau yeglmere konbo ta doko indre, ende ambu nomano wakai paikrukwa, kinano paglwagl era pre yungunomugl eingo, ana ye ka wakai dite nomane sikugl ende, ye ta pirmere i eraglme dingwa. Ambumo wagle i tandaglme merkinde erikwa pre nomano mina yumbun dongwa. Te deno munduno mina taragl kinde kanekane yombuglo ere gundo i-bange bange ongwa. 7 Ambumo wagle i engenge ka beke pirkwa, ba ka kaima i pir inaglkwa mere manga. 8 Okuna Janis ya Jambris,* Juda yomba ka boglo yegl kiglkwa. Janis ya Jambris ye suwo niglminman ake Isip king moglkwa i kongunmo gigl giyai eurika i ana Moses engemo igle eurika. Kisim Bek 7:22 ya 9:11 mina kanamga. ye eremogl Moses kamo sende mane ditembrika, kuno yeglmere yomba i ama ka kaima sendingwa. Ye nomano kinde kau sungwa ana ka kaima mambuno i ta pirngi dikrikwa. 9 Ana ye mambuno erikwa i kanane tau ere inde pikraglkwa, sraglpre ye ka pre ekriye bogl du erikwa mambuno i wu nongugl enan yomba prapra kanaglkwa. I okuna yagl suwo Janis ya Jambris mambuno kinde du eriko yomba prapra kan-kondingwa.

10 Timoti, nono okuna akiye wanmouglko i ene pirkan etngra, na sraglmere ere yomba ka beke teinga, ya te moglpai erika, ya te taragl eragledi pir wanmoglka ya te pirngi diga, ya te nomana argan ere yongwa ya te yomba pre munduna pangwa ya te na giglendi mogltre ana yumbun iga, 11 ya te yomba na ere sigo ana giu merkinde goglka te Antiok ya Aikoniam ya te Listra kamun na yumbun kanekane iga i ama ene pirkan etnga. Ba Yaglkande yumbun i mina na ere yungwa. 12 Kaima yene, yomba ta Yesus Krais mina sidakagl mogl God mambunomo pamere eramnedi erimbi ana yomba sikasi eresinaglkwa. 13 Yomba kinde ya kakimbi dingwa yomba eremogl yomba merkinde kakimbi ditenaglkwa. Ba yomba i ama kakimbi ditenaglkwa ana ye mambunono wu kinde kaima enambuka. 14 Ba ene ka beke indre te pirngi dinga ikra aimande ake gidi moglo, sraglpre no mina ka beke inga i ene pirkan dime dinga. 15 Te ene gak kembra motnga enge kamambuno pepa mina okuna pangwa ka i beke teingo pirpogl singa. Ana ka i akeple ditenan nomano audinan te Yesus Krais wedi pirngi dimbi ana God ene ere-inambuka. 16 Ka mambuno pepa mina okuna prapra pangwa i God Spiritmo akeple dungo beglkwa. I ka wakai kaima beke norambuka, te tandaglmeno ombunodi noro, te konbo du wanamga ombuno dinoro ana mambuno du-yene eramga pre beke norambuka. 17 Yegl ere noran ana nono God yombama wakai mogltre, yombro panan kande ye kongunmo wakai kanekane eramga.