16
Yesus gogltre andigl ukor ongwa
(Matyu 28:1-8; Luk 24:1-12; Jon 20:1-10)
1 Sabat enge dundungo, Maria Makdala kamun mam ya, te Maria Jems mam ya, te Salume ye kungo demine wakai orkwa ipi, Yesus nangiye mina kungo ere tenamnedi pre topo erikwa. 2 Ana Sande enge tangina kinde kaima ande koragle sungo, ye ende Yesus pandiglmara dumo enamunedi pindre, 3 ana ye yene krapogl imboriya endingwa, “Yomba ira kombuglo giglpene maugl dra mina kombuglo sipegl dingwa ikra egla pagl eglke endinambu da?”
4 Ba ye kan mitna ende kaningo, ana kombuglo kandekinde kaima maugl dra mina okuna kana egla pagl ikorugl endingwa pangwa. 5 Yeglpre ye ende kombuglo dra pandiglmara dumo suna pindre, igle ye kaningo yagl gakmugl suwarata gagl suna kruwo olto ta ende pandigl onguno wokra amedi moglko, ana ye waikiglkwa.
6 Ana ye ditongwa, “Waikuglkriyo, na pirka ene Yesus Nasaret kamun nem endi-prak mina singura i kanamnedi pre wingwa. Ye yawagle ta pai moglkrukwa. Ye okuna kana andigl ukor ongwa! Kaniyo, dumo igle okuna ye nangiye yengura. 7 Erme ene ende pindre disaipelmo wagle ya Pita akiye ka diteiyo. Ana erme ye ene pre okuna yeite ende Galili kamun ongwa. Igle ene ye kanaglkwa. Okuna ye ene dite kondungura.”
8 Yeglpre ye onguno katno si nomano sikugl endungo ana ye kombuglo dra kondo ende menda pindre, ana mukundi endpi yomba suwara ta ditekrikwa. Sraglpre ye kundugl geglkwa.
Yesus wu pene ongo Maria Makdala kamun mam kangwa
(Matyu 28:9-10; Jon 20:11-18)
9 Yesus Sande enge tangina kinde kaima andigl ukor pindre, ye okuna kana Maria Makdala kamun mam moglmara plau dungwa, ambumo i okuna spirit kinde 7 suna meglko Yesus simenda endungura. 10 Ambumo i ende pi Yesus bogl akiye waningwa yomba kango, ye pre miriye gogl kaimo ere meglkwa. 11 Ana ambumo i Yesus kor-moglko kaniwo dungo ye pirtre ana ye ambu dungwa i pirngi dikrikwa.
Disaipel suwo embirara Yesus plaudi tongwa
(Luk 24:13-35)
12 Ana okuwo disaipel wagle ye mina suwo dumo kande enambugledi, konbauna ende pi miurko, konbauna bange Yesus wu kane ta pindre plaudi tongwa. 13 Ye ende ikine pindre ana disaipel wagle tau ditembrika. Ba ye ka i pirngi dikrikwa.
Disaipel 11 meglmara Yesus plaudi tongwa
(Matyu 28:16-20; Luk 24:36-44; Jon 20:19-23)
14 Okuwo Yesus disaipel 11 ye kaiya mokna ne meglmara plau dindre, ye ka-tongwa. Sraglpre, ye pirngino paikrukwa, te nomano sikugl endungo, ana yomba okuna kana Yesus kor-moglko kanmuniwo dingwa i ye pirngi dikrikwa.
15 Ana ye ditongwa, “Ene ende makan uglomugl koglkoglo pindre ana kamambuno wakai yomba kanekane prapra dipene ende teiyo. 16 Yomba ta ye pirngi dindre baptais eran, God ere-inambuka. Ba ye ta pirngi dikrambuka ye okuwo kot mina guglo kamun enambuka. 17 Pirngi dingwa yomba ye God yombuglomo tenan kimagl i eraglkwa. Na kangina mina ye spirit kinde simenda endinaglkwa. Te ye ka kor ungwa kanekane dinaglkwa. 18 Ana ye yomba sigoglkwa toki onguno mina ake yende, ana ne geglkwa nigl kinde kanekane nembi, i prapra ye ta sigoglkrambuka. Ye onguno duglosi kinde sungwa yomba mina tembe yei tembi ana ye kindeno argan erambuka.
God eremogl Yesus yend heven ongwa
(Luk 24:50-53; Aposel 1:9-11)
19 Yaglkande Yesus eremogl disaipelmo 11 wagle ka dite kondungo, okuwo God auro yend imbo heven suna ongo ana ye God ongo wokra amedi moglkwa. 20 Ana disaipel wagle ende koglkoglo pindre kamambuno dipene endingo ana Yaglkande ye bogl kongun orko ana ye ka dingwa i kaima pango te ye kimagl erikwa i kamambuno dingwa bogl akiye wu suwara ongwa.* Epigl 9-20 i erme pirpogl singwa yomba tau eremogl Mak yene muno boglkrukwa. Ana okuwo yomba ta boglme dingwa. Ana erme pirpogl singwa yomba tau Mak ka sungagle keme boglme dingwa. Kamo i yegl, “Ba ambu wagle pi Pita ya yomba tau meglmara ka diteingwa. Yagl gakmugl ta ka di ambu wagle tongwa ikra boglo kugl Pita ya yomba tau akiye meglkwa i teingwa. Te okuwo Yesus yene eremogl ye kongun ere ende makan koglkoglo enaglmere ditongwa. Ye kongun i ande umara yei ere endpi ande beimara enaglkwa, kongun i God eremogl yomba prapra ikine ende ana kor aimande moraglkwa tenambuka kamo i di yomba tenaglkwa. Ka i God yene kamo ana ka i ta wau boglkrambuka.”
*16:20: Epigl 9-20 i erme pirpogl singwa yomba tau eremogl Mak yene muno boglkrukwa. Ana okuwo yomba ta boglme dingwa. Ana erme pirpogl singwa yomba tau Mak ka sungagle keme boglme dingwa. Kamo i yegl, “Ba ambu wagle pi Pita ya yomba tau meglmara ka diteingwa. Yagl gakmugl ta ka di ambu wagle tongwa ikra boglo kugl Pita ya yomba tau akiye meglkwa i teingwa. Te okuwo Yesus yene eremogl ye kongun ere ende makan koglkoglo enaglmere ditongwa. Ye kongun i ande umara yei ere endpi ande beimara enaglkwa, kongun i God eremogl yomba prapra ikine ende ana kor aimande moraglkwa tenambuka kamo i di yomba tenaglkwa. Ka i God yene kamo ana ka i ta wau boglkrambuka.”