KA TEKE PANGWA
Ka i Yesus Krais dipene ende Jon tongwa
Ka mongo yegl ende okuna ongwa
Rom yomba eremogl Juda sutno meglkwa enge pepa i muno beglkwa. Enge i Rom yomba eremogl Yesus Krais wedi pirngi dungwa yomba ere singo teke ende pere pere eingwa.
Pepa Ka Teke Pangwa i muno boglkwa yagle kangiye Jon, sraglpre, pepa i mina Jon yene kangiye enge 4 suna igle boglkwa. Yomba tau pirkwa buglayungu A.D. 95 mina pepa i muno boglkwa.
Ka mem tau mere pepa i mina pangwa i yegl: Taragl kane kane okuwo plau dinambuka pre ka diboglkwa merkinde pepa i mina pangwa. Te Yesus Krais Yaglkande moglkwa ana ye ongo mina God eremogl kundamo ikine prapra engre atne ende te Satan ama engre atne endinambuka. Ana pirngi dingwa yomba andigl giglendi moraglkwa ye God bogl meglmbi ana okuwo God taragl ere i kor endinan ana ye yumbun ta ikraglkwa.
1
Ka teke pangwa i Yesus Krais dipene ende Jon tongwa
1 Okuna ka i teke pango Yesus Krais i-pene endungwa. Taragl tambre kana plau dinambuka ipre Yesus Krais nigl kongunmo yomba ditenambuka pre God di Yesus tongwa. Ana Yesus ka i ere i-nongugl kaima endina pre angelomo ta di endungo wu kongunmo yomba Jon ditongwa. 2 Ana na Jon taragl prapra ta kaninga i pepa muno boglka, i God kamo ya te Yesus Krais ka dungwa ya te kongun orkwa i ama akiye dipene end-iwa. 3 Propet ka pandum dungo pepa i mina bogl pandiglka kerambuka yomba ya, te pir i-nomano suna endinaglkwa yomba prapra gun yenaglkwa. Sraglpre, taragl i prapra plau dinaglkwa enge ende magl ungwa.
Jon pepa muno bogl God yombama yungu ombuno 7 tongwa
4 Na Jon, Esia Provins God yombama yungu ombuno 7 suna yeingwa i na pepa muno bogl teinga,
God erme moglkwa, okuna imbo moglkwa te okuwo unambuka, ana ye wakaimo ya dem munduwo pokndungwa i ene tenambuka, te God king boglmo mina nongagle spirit 7 meglkwa, ye ombugl arganno ya deno munduno pokndungwa ene tenaglkwa. 5 Te Yesus Krais ye God kamo pamere dindre, te geglkwa mina ye komnaiye andigl ukor pindre ana makandle king prapra ye sutno moglkwa. Ye ama arganmo ya dem munduwo pokndungwa ene tenambiwo.
Ye nono wakai kandre ana bormaimo mina tandaglmeno koko endungo nono wu wakai omga. 6 Ana ye ere endungo nono ye yombamo mogltre ana ye Nem God kongunmo eramga pre pris kongun norkwa. Ana Yesus yombuglomo pai kuno orkwa ya kangiye kande aimande aimande panambuka. I kaima.
7 Kaniyo, ye kamun kua mina
suna mogl una orkwa, ana
yomba prapra ongumutno
mina ye kanaglkwa, te
kuglange mina ya buglo-nil
mina singwa yomba ikra ama
kanaglkwa. Te makandle
yomba prapra ye pre kinano
suwo gundo piutno tagla
sindre kai giglange sinaglkwa.
I kaima yene, yegl panambuka.
8 Yaglkande God yegl dungwa, “Na mambuno boglmara kaima mogl te dundumara kaima moglka.” Ana God i yombuglo pond pangwa ye erme moglkwa okuna imbo moglkwa te okuwo unambuka.
Jon ye Krais kangwa
9 Na Jon, ene angro, nono Yesus bogl wu suwara pi ye kingdomo mina i yumbun ya giugl indre pirwinge ere wanmounga. Na God kamo dipene ende te Yesus wedi pirngi diga i dinongugl endiga pre na sendigo ailan Patmos moglka.* Rom yomba eremogl yomba ta mambuno kinde erikwa i ana kane panaglme di pirkwa i di endigo ana ye ende ailan Patmos pipi erikwa. Ailan Patmos i kane paingwa angai. 10 Ana Yaglkande engemo mina Holi Spirit na ake wu dinarko ana na mokonamugl ka kande ta dungo pirka. Nungo embriye biukul bendumere yegl dungwa. 11 Ana ka i yegl dungwa, “Taragl prapra kanga i pepa mina suna bogltre ana God yombama yungu ombuno 7 meglmara endinatnga: I Efesus kamun ya, Smena kamun ya, Pergamam kamun ya, Taiataira kamun ya, Sadis kamun ya, Piladelpia kamun ya te Leodisia kamun.”
12 Ana yomba ka dinarkwa i kanagledi pre kan aketeinga. Na kan aketendre ken-lam 7 gol pagl bekingwa i botno mina tengo kaninga. 13 Te ken-lam botno yeimara pukamugl i yomba ta moglko kaniga. Ye Yomba Wam mereyegl.✡ Daniel 7:13 Ye gagl suna olto endungo wu kagle mina sitorwa orkwa, te piuriye mina kumagl gol pagl bekingwa i ta dongo pangwa. 14 Ye bre ya bre yungo kruwo sipsip yungo ya kamun kua kruwo mereyegl, te ye ongumuglo suwo-akiye endi donga bauglo mereyegl ambuglange giglendi sungwa. 15 Ye kagle suwo-akiye bras endi donga mina suna de gogl ere wangigldi pamere yeglmere, te nungo embriye nigl muglkumdi kuglosi mu dumere yegl. 16 Ye ongo wokra kugl-kuri 7 ake moglkwa, te dikumba prak ta drambiye ya gon mina akiye nongwa i ye dra mina ende menda wu pangwa. Ana ye gumadra ande ambuglange kande giglendi sumere yegl ambuglange sungwa.
17 Na ye kandre ana ukandi yange kagle mina si, geglkwa mereyegl du painga. Ana ye ongo wokra na nangina ake yegl dungwa, “Ene kundugl goglkro! Na gumamugl moglka te pundunomugl moglka. 18 Na kor-moglka yagle! Na okuna goglkra, ba kano, na kor aimande moglka, te aimande aimande mogl enaglka. Te na geglkwa ki ya geglkwa yomba dumono i ki suwo-akiye na ake moglka.
19 “Yeglpre, taragl erme plau dungwa ya okuwo plau dinambuka ene kan-kondinga i pepa mina muno boglo. 20 Ana kugl-kuri 7 na onguna wokra yongwa i ya ken-lam gol 7 ene kanga i mambuno kaima teke pangwa i yegl. Kugl-kuri 7 i angelo 7 ye God yombama yungu ombuno suwara suwarandi yomara i sugl meglkwa. Te ken-lam gol 7 i God yombama yungu ombuno 7 yeingwa.