1 Ana angelo ikra nigl kande ta ombunodi narkwa, i kor aimande moraglkwa niglmo, te niglmo i kuglmuna yei glas mereyegl yongwa. Niglmo i God ya Sipsip Nangigle siano king botno mina undre ana 2 siti konbauna sunawom wopi pangwa. Ana niglmo womara bina koglkoglo kor aimande endi pangwa, endimo i buglayungu suwara mina mongo enge 12 koglkwa, i ba gere yomere yomere mongo koglkwa. Te endimo yaundo i makandle yomba erewakai erambuka pre pangwa. 3 Ana igle taragl God ta prukrumere i suna igle ta yeikrambuka. God ya Sipsip Nangigle ye siano king i keunde siti suna i yenan ana ye God kongunmo yombamo prapra ye dembiye karaugl erete moraglkwa. 4 Yegl ere ye God gumadra kanimbi ana ye kangiye ye mamburo wagle bogl pandrambuka. 5 Kamun igle mim aglketa paikrambuka. Te yomba ye ken-lam ambuglangemo ya ande ambuglangeno i wedi ta pirkraglkwa. Sraglpre, Yaglkande God ambuglange sitenan ana yomba ye king aimande aimande moraglkwa.

6 Ana angelo yegl di narkwa, “Ka i prapra ka kaima, ana yomba pirngi kaima dinaglkwa. Yaglkande God ye propet wagle spiritno akeple dungo ana ye kamo dingwa. Te ye taragl tambre kana plau dinambuka i yene niglmo kongunmo yomba ombuno ditenambuka pre angelomo diendungwa.”

7 Yesus yegl dungwa, “Ana piryo! Na tambre kana ene meglmara unaglka. Ye dungwa ipre, yomba ta ka propet dingwa buk i mina pangwa pir akegidi i-wan moraglkwa ye gun yenaglkwa.”

8 Na Jon, na ka i pirtre te taragl i prapra kaniga. Na pirkondo te taragl i kan-kondo ana goglkuna bondugl angelo taragl ombuno dinarkwa ye kagle mina dembiye karaugl eretenagledi erika. 9 Ba angelo yegl di narkwa, “Ene yegl erekro! Ene ya angitnma propet wagle bogl nono kongun suwara ounga. Te na ama yomba tau pepa i mina ka pangwa i pir i-wan meglkwa ye bogl kongun suwara ounga. Ene God suwara dembiye karaugl ereto.”

10 Te ka ta ama yegl di narkwa, “Ka propet buk i mina pangwa i ake teke yeikro. Sraglpre, taragl i plau dinambuka engemo magl orkwa. 11 Ipre yomba taragl ere yewe yeingwa ye aimande ere yewe yei wanmoraglkwa; te yomba ta mambuno deglmbi yongwa erikwa ye aimande mambuno deglmbi yongwa eremoraglkwa. Te yomba mambuno du-wakai erikwa ye aimande du-wakai eremoraglkwa. Te God yombama holi meglkwa ye aimande holi mogl-enaglkwa.”

12 Yesus yegl di narkwa, “Pro! Na tambre kaima unaglka, te yomba prapra topono indre unaglka, te yomba suwara suwarandi yene mambunono erumere erumere yegl topono tenaglka. 13 Na Gumamugl moglka te Yaglemugl moglka, te Taragl Mambuno Boglmara moglka te Dundumara moglka.

14 “Yomba gatno suna nigl endingwa ye gun yenaglkwa, ye pra kor aimande moraglkwa endi mongo nendre te siti i toglmo konbo dra yemara ye ende suna enaglkwa. 15 Te agl mere erikwa yomba ya kumo ere nimbine kirai erikwa yembi, yagl ya ambu kunogl gundingwa, ya yomba sigeglkwa, ya god kimbi dembiye karaugl erikwa yomba, ya te kakimbi pre munduno pango ka di wanmeglkwa, ya ye prapra siti igle mendakra moraglkwa.

16 “Na Yesus, na angelona okuna ene mina diendigo ye ka i di God yombama tongwa. Na iwe, Devit nangiglma gawamo mogl wimara i mina na dire-kane ta moglka, te tangina kana kugl-kuri ambuglange pond sungwa i na moglka.”

17 Ana Holi Spirit ya Sipsip Nangigle embiye, ye yegl di ikine endimbrika, “Yesus, ene wo!” Te yomba ka i pirkwa ye ama yegl dinaglkwa, “Yesus, ene wo!”

Ana yomba ta nigl gorambuka, wo do, te yomba ta ama nigl ninamnedi piraglkwa ye ukor aimande nigl ninaglkwa, i God munduwo argan pre yoko tongwa.

18 Ka propet buk i mina pangwa pirkwa yomba prapra na ka giglendi di teinga. Yomba ta ka pamara ta di ainan ana God ere kinde ere tongwa buk i mina dipanduglkwa i ye mina aine tenambuka. 19 Te ka propet buk i mina pangwa i yomba ta i-bina endinan ana ye mina taragl wakai i God ama i-eglke endinambuka. Te kor-moraglkwa endi mongo i ye nekrambuka te God sitimo holi buk i mina dumara igle suna moglkrambuka.”

20 Yomba taragl i prapra dinongugl endungwa yagle yegl dungwa, “Kaima yene, na oglandi unaglka!”

I kaima, Yaglkande Yesus, ene wo!

21 Yaglkande Yesus wakaimo i God yombamo prapra ene mina yenano. I kaima.