Apocalipsis.
19.
Tegin an-immal-takchad-cholbal an itosdo, tule-ichejul-oimabukwadyob Pab-neggin sapejul kolmakalmal, chogalmal: Pab-otummomaloye. Imi anmal-Pab-Tummad, tule-abonoged, tegin kannaleged-nikad, tegin yer-takleged-nikadye. 
Imi Pab Tummad napírra tegin inniki igal-itogedbal sapejul tule-oturda. Al Pab Tummad e-chogzhadbal Babilonia-neg-kwebur-ome-macherganbi-wijiidyobid oturdanoni. Tenal Babilonia-neg-kweburginmalad e-iskuedbal pel-kwapa iti-napkin-pukmalad-egwasmal, tegin tule-Pabga-arpamalad-mechamalbal. Al Pab Tummad Babilonia-tolgan-abin-imasmo, tar-opelononi. 
Tegin tulemal kannan sapejul chogalmalbal: ¡Pab-Tummad-otummomaloye! Imi Babilonia-neg-kwebur-kummamaid-wadin, ilagwen-nadguo pal kwen-pelguojulye. 
Tegin chelegan-tummagan-wala-tulagwen-kakabakegwad tegin immal-tulgan-walbakegwad, Pab-ol-kangin-chiid-assapin napche tullu-imasmal, Pab-otummoedgin Pabzhe kolalmal, chogalmal: Teobdo, Pab Tummad-otummomaloye. 
Tegin Pab-ol-kan-chiid-akar an tuleyob tule-kakapurwa itosbal, chogal: Pemal-Pabga-arpamalad, tegin Pab-tobe-nanemalad, tegin tule-tummagan tegin tule-polgan-ugakche, pemal-pel-kwapa Pab-otummomaloye. 
Tegin an itosbaldo, chuked-ariokwichidyob oimabukmal, tegin tulemal mar-koledyob sapejul kote, chogalmal: ¡Pab-otummomaloye! Anmal-Pab-Pul-Tummad, pel-kwapa neg-takmaiye. 
Imi Oveja-chapini-ome-nikuneed e-wilub pato noni. Tenal ome-Oveja-chapini-nikuoed pato kuakwa chii-choggu machered-nikugal, al anmal welgunanimal, tegin anmal yer itonanimal, tegin anmal Pab-Tummad-otummonanimalbal. 
Tegin Oveja-chapini-e-omega mol-nued-chipúgwad-yer-kaed ukles yogal. (Imi mol-chibudin chogle, tule-Pab-Jesúsbak-akenanimalad-immal-nuegan-imajad.) 
Tegin angel anka chogal: “Imisgin pe nermado: ‘Imi Pab tulemalzhe kochal Oveja-chapini-ome-nikuneedgin mas-ichejul-imalejiid kunkal, we tulega ib-nuedga kunoniko.’ ” Tegin angel anka chogalbal: “Imi we kaka an pega chogzhiiddin, Pab-Tummad-kakapurwa chunchunnaddo.” 
Tegidgin antin ilgwen angel-nabal chimtis, Pab Tummadyob angel-otummogal. Tenal angel anka chogal: “Pe melle Pab Tummadyob an-otummoma. Imi antin ampa pe-yopímo Pabga-pinche-arpaged-tulemo. Imi antin Jesucristogin pe-kwenad, Pab-Jesús-chogzhadbal-nued-naigusmalad, e-pakadmo. Tenal pedin, pe Pab Tummadzhebi pe kolo. ¿Ibiga an teob chog? Nabir. Imi Jesús-chunmadiidbal, Pab-kaka-palchogmalad okannolenonimal.” 
Tegin an taktegu an takal, nikpa-neg arkatku, moli-caballo-chibubi noal, tegin tule-askin-chiid nug: TULE-INNIKIGWAD-KEG-KAKANZHEED. Tenal we tule napírragwadgin chabzhul tule-oturda, tegin we tule nabiridbal pila-onobal. 
Tenal tule-moli-pirgin-chiid-e-imiadin cho-turmagwichidyob ka, tegin e-nonogin ichejul olo-kurkin chiji-nadbal. Tenal tule-moli-pirgin-chiid nug-abi-wijiid nermakal naibal, 
tenal we tule-mol-yowid abegin-odogaled. Tegin tule-moli-pirgin-chiid nugbal: PAB-TUMMAD-KAKAPURWA. 
Tegin tule-moli-chibu-askin-chiid-cholbal, e-chulubmal-pilachemalad-Pab-negginmalad, moli-caballo-chibugangin-askin chiji-irmadanimalmo. Tenal we chulubmal mol-chibu-nuegan-chwilidikid-chipúgwad yoyomal. 
Tenal tule-olo-kurkin-chijiid e-kaka-yabal-akar es-pilacheed-nugal-nikad yowi, tule-chog-akal-akal-pukmalad naklichegal. Tegin we tule kabaston-ezhagad kanikidyob kantikidgin neg-tako. Tegin Pab-Pul-Tummad urwed-kin-nakwedbal tule-olo-kurkin-chijiid-palmine peyedzhe chabzhul tulemal-oturdagal, tule uva-chan-ekurnaidgin, e-nis ariomaidyob. 
Tenal tule-moli-pirgin-chiid molgin tegin tuwagin, e-nug nermakal nai, chognai: ERREYMAL-E-TUMMAD, TEGIN TULE-TUMMAGAN-E-TUMMAD. 
Tegin an takchabal, angel tadgwagin kwichi, tegin angel sapejul neg-magadbal mulamalzhe kocha, ka chogal: “Tagmalma itije, Pab pemalga ichejul mas-kunned ukchiid kunmalgal. 
Tenal we mas-kunneddin, erreymal-e-chan, tegin wag-chulub-tummagan-e-chan, tegin tule-kal-ibgan-e-chan, tegin moli-caballo-e-chan, tegin tule-moligin-chijiid-e-chan, tegin tule-pinche-arpamalad-e-chan, tegin tule-ololchalmalad-e-chan, tegin tule-polgana-e-chan, tegin tule-tummagan-e-chanbal, pel-kwapa.” 
Tegin an takchabal, pinas-nono-maklejad-kannan-nugujad tegin erreymal-iti-napkinmalad aga e-chulubmalbak mes pulakwa pukwamal, tule-tummad-moli-caballo-chibu-pirgin-chijiid tegin e-chulubmalbak pila-onogal. 
Tegin pila-imanonimaladgin, pinas-walbo kalenonimal. Kwéntin pinas-nono-maklejad-kannan-nugujad, kwéntin. Pab-kaka-palchoged-pinchegad. Tenal we pinas moli-pid-anal immal-taktijulmalad-imajadbal, tulemal-pinas-kinnid-wilub-abingasmalad, tegin Pab-Tummadyob-immal-pinasyob-chobaled-takchamalad-yardaged. Tegin we pinas-walbogid kalesmalgu, azufre-kamaid cho-matagin tulachá tar-metemal. 
Tenal pinas-e-chulubmal tule-moli-caballo-chibu-askin-chiid kaka-yabal-akar es-pilacheedgin purkwismal. Tegin mulamal-pel-kwapa wilub-okpis immedzhe tule-mui-chan kuchamal.