Juan.
4.
Dummad-Jesús wisguar, Fariseomar itoarmarye dulemar sogdimarye: “Jesús, Juan-Bautistaba bur-bule dulemar-Bab-Dummad-digi-ogleged-imakdiiye, degi, bur-bule sapingan-nikbarye.” 
(Ar Jesús Bab-Dummad-digi-ogleged-igar imakdisulindo, e-sapingan imakdiinad.) 
A-ular, Jesús Judeagi bangudsunnad, gannar Galilease nade-gusad. 
Ase naegala, Samaria-yargi naer-gebed. 
Samaria-yalase, neggwebur-Sicar-nugad-dikarse Jesús nonisun, bia dad-Jacob na e-machi-Joséga nainu-uksad-walik. 
Agine Jacob-dia-akwisad siid. Jesús nanaedba yegussoggu, a-dia-dikarba sigisad, obunnogegar. Deun bato yoruku gusad. 
Ome-wargwen, Samariagined, a-diase nonikid, dii suegar. Jesús a-omega sogded: —Anga be dii-gobed wis udage. 
Ar ade Jesús-sapingan neggweburse naded, mas-bakegar. 
Judiomar, degi, Samaria-dorgan na geg sunmakmarsoggu, ome-Samariagined, Jesús-abin sogded: —¿Ibiga bede Judio-duledde, andi ome-Samariaginedidde, anse be dii-gobed egise? 
Jesús, abin-imakdegu, ega sogded: —Ar Bab-Dummad-ibmar-uked be wisina, degine, doa-dule bega soge: ‘Anga dii-gobed be udaye,’ be ese dii egisoenad, degine, na e bega ukoenad, dii-burba-nikad. 
Ome, Jesús-abin sogded: —Dummad, be dii-weed-ibmar sated, degine, dia-yaa matusurbalid, degite ¿igi be dii-burba-nikadi onogosunna? 
¿Ar bede anmar-dad-Jacobba bur dummadsi? Anmar-dad we-dia anmarga uksad, we-dii na gobsad, e-mimmigan, degi, e-molimar, we-dii gobsamarmogad. 
Jesús, ome-abin imakde, sogded: —Ar doa-dule we-dii-gobsa-dibe, gannar uku-uku itobaloed. 
Ar dii-an-ega-ukoed gobsardi, bar gannar uku-uku itogosulid. Ar dii-an-ega-ukoeddi, dii napa-urba aryomaiyobi, e-ulubgi megoed, adi burba-geg-bergued nikuegar. 
Ome Jesúsga sogded: —Dummad, we-dii be anga udage, adi melle gannar bar uku-uku an itogegar, degine, adi melle gannar bar wese dii an wedagegarbar. 
Jesús, abin-sogded: —Be nae, be-suise be gornae, degi, gannar be dagbaloed. 
Ome, abin-imakde, sogded: —An sui sated. Jesús, abin-imakded: —Nabir be soged: ‘An sui sateye.’ 
Ar sui walatargus be nikued, emi sui be nikumaidi be-sui-sulid. Ar nabir be-sogsad. 
Ome, Jesús-abin sogded: —Dummad, an be-dakgua, be Bab-Dummad-gaya-burba-berbeged an be-dakdo. 
Anmar-dadgan, Samaria-dulemar we-yargi Bab Dummadse gochamalad, e-nug odummogegar. Ar bemar-Judiomardi soged, Jerusaléngi, agi Bab Dummadse goler-gebye e-nug odummogegar. 
Jesús omega sogded: —Omegwa, napira an bega soged, mer be an-bengu, ibagan dani, we-yarginsur, degine, Jerusalénginsurbar, be Bab Dummadse goloed e-nug odummogegar. 
Bemar-Samaria-dulemar wichurmalad, doase gornai e-nug odummogegar, anmar-Judiomardi wismalad, ar doase gornai e-nug odummogegar, ar ade dulemar-abonoleged Judiomargi danikid. 
Ar ibagan danikoed, emigindi ibagan nonisunnad, dulemar Bab Dummadse gollalile, nue burbar, degi, napiragwadgi ese gormaloed e-nug odummogegar. Ar Bab Dummad dulemar-degi-ese-goled amidimogad. 
Bab Dummad, burbaled. Ar dule Bab Dummadse goledi, burbar, degi, napiragwadgi ese gormogar-gebed. 
Ome, Jesúsga sogded: —An wisi, yoedse Mesías, dule-wargwen barmiledagoye soglesad, Cristo-nugad nonikoed. A-Cristo nonikile, a anmarga bela ibmar sognonikoed. 
Jesús, ome-abin sogded: —Ani an a-duled, bebo sunmaksiid. 
Agi e-sapingan nonikid, amar geger dakdemalad, Jesús, ome-ebo sunmaksiid, degi-inigwele, gwen ega sogsasurmalad: “¿Ibu omese be egissii? ¿Ibiga ome bebo sunmaksii?” 
Degi ome e-gwidu-mete neggweburse nadsunnad. Neggweburse modapgu, macherganga sogdapid: 
—Be dagmar, dule-wargwen bela-an-ibmar-imaksad-anga-sogsad be dakdamar, ¿abakalegi we-dule Cristo-sua? 
Degi dulemar neggweburgi ainiarmargu, bela Jesússe nonimalad. 
Degi-gunaigua, e-sapingan Jesúsgi wilenai-gusmalad, ega sognai-guarmalad: —Odurdaked-saila, wis mas be gungwele. 
Jesús, abin-sogded: —Andi mas-gunned an nikad, ar a-mas-gunnedi bemar wichurmalad. 
Degi e-sapingan na ega muchub-muchub sokarmalad: —¿Ar dule-wargwen mas-gunned ega senoni-sua? 
Jesús, abin-sogded: “Dule-an-barmialidba ibmar-imaked, degi, a-e-arbaed-obeloged, a an-mas-gunnedid. 
¿Ar bemarde sogsursi: ‘Amba nii-walabake napye ibmar-gwag-weed-iba?’ Andi an bemarga sogdo, nue be atakmar, nainu be dakmar, dulemar-bukidar-duurmakdanimalad, we-dulemar ibmar-gwagyobdo, weegala bato guagwar naid. 
“Ar dule ibmar-gwag-weedgi arbaedi bennukledo, degine, ibmar-gwag-weoedi burba-geg-berguedga weoed, adi dule-ibmar-gwag-digedi, dule-ibmar-gwag-weed-ebo na wergumalagar. 
“Ar we-ibmar-sogleged nue-napira sogleged: ‘Dule-gwensak ibmar-gwag-diged, dule-baid, ibmar-gwag-wee-daed.’ 
An bemar-barminanaid, bemar ibmar-gwaggi-arbassurmalad weega. Dule-baigan arbasmalad, bemar a-arbasadgi dogdemalad.” 
Bukidar Samaria-dorgan, Sicar-neggweburginmalad Jesús-bengussurmalad, ar ade ome Jesúsgi sogdiid: “Bela an-ibmar-imaksad anga sogsaye.” 
Degine, bukidar Jesússe Samaria-dorgan duurmaknonimalad, egi wilenagusmalad: “Anmar-walik be beeye.” Amar-walik Jesús ibabo megissunnad, dulemar-odurdakegar. 
Jesús-ibmar-sogsadgi bur-ichesur Jesúsgi bengussurmalad, ome-ibmar-sogsadba. 
A-ulale omega sokarmalad: —Anmar-Jesúsgi-bensulidi unnila be anmarga ibmar sogedginsulid. Ar anmar-sunnad itosmarmogad. Anmar nue-wisid, we-dule napneggi dule-iskubukmalad-abonoged-sunnadid, we-dule Bab-Dummad-dule-wargwen-barmiledagoye-sogsad-duled. 
Jesús Sicar-neggweburgi ibabo megisad-sorbali, Samaria-yargi node-gusad, Galilease naegar. 
Ar Jesús na e-sunnad sogsa-gusmogad: “Bab-Dummad-gaya-burba-berbegedi na e-neggweburgi geg e-nug odummoleye.” 
Jesús Galilease nonigu, Galilea-dorgan nued abingasmalad, ar ade ibase arbimarmosoggu, agi daksamalad, igi Jesús Jerusaléngi ibmar imaksad. 
Degisoggu, Jesús gannar Galilea-yarse nonigu, Caná-neggweburse nade-gusad, bia dii vinoga obinnisadse. Deun Capernaum-neggweburgi dule-dummad, Reyga-arbaed-e-machi uelemaid. 
We-dule itoargu, Jesús Judea-yarba-gudiid Galilea-yarse noniye, Jesússe nade-gusad. Jesúsgi wilenai-guar, adi e-machi ega nudaknaegar, ar ade e-machi burgwedani maid. 
Jesús, abin-sogded: —Ibmar-wilubgan-dakledisurmalad, degi, ibmar-geger-daklemalad bemar daksasulina, be an-benmalanad. 
Dule-dummad, Reyga-arbaed, sogded: —Dummad, an-machi-burgwed-idu gwae anba be dage. 
Jesús, abin-sogded: —Be nae, be-machi dula gudiid. Reyga-arbaed Jesús-degi-ega-sogsad gwen bengussulid. Degisoggu, na e-negse nade-gusad. 
Negse monadapgu, e-maigan abin-noarmalad. E-dummad-abingusmargu, ega sogdemalad: —Be-machi bato nugus. 
Degi, dummad e-maiganse egichiar, igi-wachigi e-machi nuguarye. Abin-sogdemar: —Sae, wachi-irgwengi ueleged gichaye. 
Machigwa-e-bab mag itosad, a-wachigi Jesús ega sogsa-gusad: “Be-machi dula gudiiye.” Machigwa-e-bab, degine, bela e-negginmalad, Jesúsgi bensuli-gunonimarsunnad. 
Jesús Judea-yargi-gudiid Galilea-yarse nonigu, we-ibmar-wilubgan-dakledisulid ilabogus wegi-imaknonido.