Iblu
Pepa, Iblu ezoqam-te
Megeat Manqat-qase
Nqanek pepa, Zu Klisten ezoqam-té ginø-peaomém. Nginik Zu bawan-ak, iz nøme, Iblu ezoqam zø-akhaemám. Zapa ndǿgo, ndigu Iblu manqat ndømanqatám.
Ni kopømba mbaín uni tizi꞉nøten, gekha ezoqām ndego, nqanek pepa gepeawam. Ezoqa nøme āv gini-mataváp nqǽgo: Pol ategó. Geté ni ùni zi꞉nøtenák.
Nqanek pepa-qa manqat, taqa yaq-te nqánek qanegó: Bugukhokhof khøuwa, Mbumbukiam nakhoa ndømboqoá, ezoqa te-te āv kindīzav. Ta nakhoa nqánek qagoám: Ezoqa Mozes-qá guguna manqat bembopáev, neka Mbumbukiam-te søvakha gigiap bembō-løvusam. Geté ta mokho-te ndøgo, ezoqa kopømba mbaín, Mbumbukiam-qa bøi-te uni ti꞉-eqeieqei-ez. Geté ndakin, Mbumbukiam nakhoa ndakinak ndømboqoá. Yesu genanim neka teqa kouk vø̄wa, nakhoa nqánek, Mbumbukiam niqa manqa-zapazapa te꞉-evøzam. Nakhoa nøme mbaín. Yesu ndego Mbumbukiam-gé iziz ezoqam kandambaqapé. Ndego Mbumbukiam-qá nakeamo zenda-té geyá neka ni zapaya oskia vø̄guligulimatun. Yaq nakémbá, ni awenege nakhoa bìzi-ivøvém, neka Yesu uni bizī꞉-unimanqatinim.
1
Keliso ndego até kopó, av Mbumbukiam ekezan nde꞉go
1 Ibugukhokhof, Mbumbukiam nigi atanakha-zapazapa-za, manqat, manqa vevezam ezoqam mokho-té genøzø-manqatám. Khøuwa vinivinimbá neka nakhoa vinivinimbá. 2 1:2 Zion 1:3Geté ndakin vaev khøuwa-te, ndego ni ekeza Yo mokho-té ginindu-manqatám. Yan neka manqei-qape, Mbumbukiam te mokho-te ndégo tenø-khakheinám neka āv gene-veatáv nqǽgo: Gigiap ate ndægo, ndégo téndáp. 3 1:3 Zion 14:9; Kol 1:20; Iblu 8:1Ndego Yo, Mbumbukiam-qá waev mo꞉gamewáp, neka ndego até kopó, av Mbumbukiam ekezan nde꞉go. Gigiap ate ndægo, ndégo tegeawát. Ekeza manqat bazaføgakh-qapé genegeawát. Ezoqam-qa manqa-zapazapa sunguzam nonqo, nakhoa gumu-mboqoa, yaq yan manqei-te nqo꞉go, Kawa ezoqam kandambaqape-qá nakeamo zenda-té gemøqóm, ndego Mbumbukiam.
Mbumbukiam-ge Yo, enzol ezoqam, ùnime꞉-løvúb
4 1:4 Filip 2:9Ndego Mbumbukiam-ge Yo, enzol ezoqam, ùnime꞉-løvúb. Iz ndøgo gendap, kandamba tantáv. Āv taoká, av enzol ezoqam, iz ndøzømbe꞉go. 5 1:5 Psa 2:7; Kel 13:33; 2 Sam 7:14; 1 Chr 17:13Gê, Mbumbukiam enzol ezoqa kopo, manqat møndømbó-ein, av nqægo,
“Qo nogē yō. No nqægo khaiya, nø̀taqa-qave-ēn”?
O gê, ndego enzol ezoqam kopo-qa yaq-te, møndǽ-ein, av nqægo,
“No tegē eve nōgoāt,
neka ndego nogē yo ndø̄goāt”?
Āv taoká. 6 1:6 Deut 32:43; Lom 8:29Geté Mbumbukiam ekeza yo-khøuwa, manqei-qape-te gendo-khofotav, ndego āv gene-eín nqǽgo,
“Mbumbukiam-gi enzol ezoqam ate ndi꞉gu, bèmbovizáp, ndego.”
7 1:7 Psa 104:4Geté enzol ezoqam-qa yaq-te, Mbumbukiam-qa Manqat, āv qane-eín nqǽgo,
“Mbumbukiam ekeza enzol ezoqam,
andé khamøe me me꞉khofotumatún. Nakhamas-té.
Ndigu tegi sasae ezoqam,
andé gøina wageap me me꞉gó.”
8 1:8-9 Psa 45:6-7Geté Mbumbukiam ekeza Yo, āv gembøe-eín nqǽgo,
“Mbumbúkiam!
Qoqa megeat matev, oskia ndǿgoát. Miavmiáv.
Qo ezoqa matev eqeieqeí qozømbe-kawaeqát.”
9 Qo poev, matev eqeieqei-té qaqagó.
Geté manqa-zapa matanam matev, qo qòsanqawé.
Mbumbúkiam!
Yaq nakémbá, qoge Mbumbukiam, qo oil qamboqóuz,
iz kandambaqape neka khanakhanakh vøqā-etoam.
Ndøgo ùnime꞉-løvú, av qogi qafuap gi꞉-upøgim.
10 1:10-12 Psa 102:25-27Mbumbukiam-qa Manqat, Keliso-qa yaq-te, nøme āv qane-eín nqǽgo,
“Evézøza!
Ibugukhokhof, manqei-qape-qa zapa, qo qové,
neka yan qakeza zenda voqotē-khakheinam.
11 Yan neka manqei-qape, ndø̀mø-navøém.
Andé ndabua pakha me mé꞉mbevøém.
Geté qo oskia qógót.
12 Yan neka manqei-qape,
andé ndabua me qoté-putøgím
neka andé ndabua khavim-us me qoté-enénd.
Geté qo qakezan, qó-enendák,
neka qoqa yage, gemǿ-navøemák.”
13 1:13 Psa 110:1Neka, gê, Mbumbukiam ekeza enzol ezoqa nøme, møndømbó-ein, av nqægo,
“Noqá nakeamo zenda-té qanøqóm.
Até qóqotát, atema no qogi qaqa ezoqam,
kopømba ande av zenda tokhotapak awam nonqo,
qoqa zenda tokhotapak mokho-te vøtaqambú-āb.”?
Āv taoká. Mbumbukiam nqanek manqat, ekeza yo mba mbo-eín.
14 1:14 Psa 34:7; 91:11Yaq gê, enzol ezoqam, ndigu gekhâm? Ndigu nqová. Mbumbukiam-qá sasae ndøgoatún, ndego ezoqa tøkeam-qa vøndō-khofosumatun, ndigu khandi miavmiav tindapem.