1 Urie, non lap malonim, inagat betong Iesu mai lop o usingnualap u kin Galili. Non bonim o uriro kin Tiberias. Tevaikong mai gare ro. 2 Simon Petro, Tomas, non bonim a Didimas, Natanael onim na taun Kana na provins Galili, narain lopien angan Sebedaio, ga non narain kulen o usingnualap angan Iesu, la maionama. 3 Ga Maulo Simon Petro gare ro, “Eba tala nabirarang.” Are ratmat ga amelo, “Atabo pava gat leba pala ga nunuo.” Tie tegomeng bo non obinam ga mela. Pa na uriro arubu tale kan mamela abulap ba. 4 Tara la namo betieng muabari, agimameng Iesu labinim la man dusong. Pa tale ameit lop o usingnualap la irie Iesu. 5 Are ratmat ga marikong Iesu ga ugama, “Ei lop tuam, atabo miaram abulap ba?” Pa mepulo ties gare ro, “Karuk.” 6 Ga maulo, “Agoming ubianama bo kilan ila lamige o obinam, ga eba miaram noba abulap.” Are ratmat ga agomeng ubianama ga ula lourup, ga maiaram papot ma abulap, ga tale puomeng meba meranang ubianama me nakap. 7 Iriro kulot o usingnualap la mitara naong Iesu aime, la aulo Petro gare ro, “Iriro migana, irie Ila Kakani.” Simon Petro la avikong saket ga okosarong ubi. Pa tara la upta la tiesong Ioanes gare ro, “Irie Ila Kakani.” Ina una saket ang ga tegoong me lourup na burunam ga kagaiong ga ula labinim. 8 Pa non lop o usingnualap la mumaio bo obinam, ga merana ubianama ma abulap. Tale kan maionama kakaliat u labinim. Maionamat gare 100 meta. 9 Tara la betmeng ara labinim, ogimameng kit la iot. Ga non abuluma la ut na kit ma figabip ga non purun gat la iot. 10 Ga maulo Iesu gare ro, “Mirie abulap la miaram titot, miaram noba me ro.” 11 Tiesong gare tiro ga tegoong Simon Petro bo obinam ga urana ubianama me na ubiem. Abulap mila kakanim la dakmeng na ubianama, puomeng gare 153 ma abulap ganam. Papot migat! Pa iriro ubianama maiang la tale kan giritong. 12 Tie, maulo Iesu gare ro, “Mumiong parakming.” Pa merau ga karuk kan a kulot ba o usingnualap la amarikong, “Nunuo aga?” Memani, ameit it irie Ila Kakani. 13 Are ratmat ga uaro Iesu purun ga abuluma ga ualam maun. 14 Lama naien tara la betong Iesu mai lop o usingnualap, tubiat la inar teuara na una.

15 Urie, parakong ara Iesu ga lop o usingnualap, tie ugama aime Simon Petro, “Simon, poi ang Ioanes, atabo makurupnin miriro inamaniap ga mitara nanung me rulam, a?” Petro la aulo, “Eva, Ila Kakani. Tonit ara narung me nulam are papa.” Tie, aulo Iesu, “Nalang parak maun tatak sipsipup tuam.” 16 Lama naraen tara la ina amarikong Iesu, “Simon, poi ang Ioanes, atabo nanung me rulam, o karuk?” Pa ugama Petro, “Eva, Ila Kakani, tonit la narung me nulam are papa.” Ga inagat aulo Iesu, “Unaleng bo sipsipup tuam.” 17 Tie, lama naien tara la inagat amarikong Iesu, “Simon, poi ang Ioanes, atabo nanung me rulam, a?” Giginam dalap a Petro me Iesu la amarikong ma naien ma taraiap ot uriro namurit umarik, “Nanung me rulam?” Are ratmat ga aulo Iesu, “Ila Kakani manit mirier pagap ganam. Tonit la narung me nulam gare papa.” Tie, inagat ugama Iesu, “Unaleng bo sipsipup tuam. 18 Mirulo migat: Tara la nokubama, nume ovis kanam nung ga nume nunum me na pianam la nuga nala una. Pa tubiat leba lainang, eba navingan kilalapien nuo me nakap ga non kan migana leba ovisang kanam ira nuo ga nolagiang me na pianam la tale nuga nala una.” 19 Uaramo Iesu uriro ties meba asingala man tavuk leba aving Petro ga alang bonim ula kakanu aun Morowa. Ga tubiat ga aulo Petro gare ro, “Tonouluan.”

20 Urie, terigiong Petro ga agimaong iriro kulot o usingnualap la mitara naong Iesu aime, la leuluan ga muo. Iriro migana la unama kagarat ai Iesu tinan na tara la nebolameng ga iat parakmeng. Ga uabu bugam a ira a aroma a Iesu ga amarikong, “Ila Kakani, aga irie leba noabung na kilalap ma karorap?” 21 Are ratmat ga agimaong Petro ga amarikong Iesu gare ro, “Ila Kakani, are mani me iriro migana? Eba aving gare mani?” 22 Pa upulo Iesu ties gare ro, “Leba narang meba onang puoieng na tara la eba ina murang, miriro la tale pagap nuam. Munang tonouluan it.” 23 Are ratmat ga ila ties tapmat mai pavailup gare ro, “Iriro kulot la tala kan uvara. Pa tale kan tiesong Iesu aime leba tale aving. Karuk. Tiesong gare ro, ‘Leba narang le onang puoieng na tara leba ina murang, atabo irie la paga nuang, a?’ ”

24 Iriro kulot o usingnualap, iriet la baisong ma miriro pagap ga omirong uriro ties. Ga obit, uriro ties la baisong o la migat.

25 Ame papot non pagap gat la makosarong Iesu. Pa leba mamirtang babap la ame tiesiap ma mirie pagap ganam la makosarong Iesu na tara la unama na uro kimanam, atabo kimanam buong la tale imaning pialap la puomeng meba miabung miriro babap mana.