5
Poi ang sipsip la uaro non babam la maialu na gamura ma napup a kendel wax
1 Tie, nam ara sasangip maiam ga tubiat agimarung irio migana la unama bo luaga ang orong na kilan ila lamige ga uario non babam. Urio babam la are babam ula laklago la maialu ga ovismeng. Ga urio babam la umirmeng iro na narain napupien o: Una ga lavie. Ga maialu ma gamura ma napup ga ovismeng maranit a ailu a kendel. 2 Ga agimarung non angelo ila mamarani la kupong maranit gare ro, “Aga migana ila mumuri la puoong meba madukdukang mirie ailup a kendel la maialu babam a ga menavang urio babam?” 3 Pa karuk kan a noba la puoong meba anavang urio babam ga ueng una na panbinim, o na kimanam, o upat kimanam, o na pianam maiong inamaniap mila mevara. 4 Tira karuk kan a migana ba la puoong meba anavang urio babam ga ueng una. Are ratmat ga mitara tuliba. Memani, titot la tale puorung meba arera man paga leba betang tubiat. 5 Man tuliba ga man tunama, pa non migana ila uke la toulo gare ro, “Buat gat nuliba. Agimanang! Non migana la meiva laion la muo na gar Iudaia, irie ea ila kakani ang orong Devit. Irie la akurupin karorama ang na danunumiap. Are ratmat ga puoong meba madukdukang gamura ma mirie ailup a kendel ga anavang uriro babam.”
6 Tiesong gare tiro, tie agimarung non Poi ang sipsip la man dusong kabirana a luaga ang orong, akalimeng miriro nagala ma pagap la man meinim ga teip mila uke. Ui gare la menamua ga uvara ra. Ga ame gamura ma kudirap ga gamura ma irap, ga mirier irap la mavuomeng miriro gamura ma muranap am Morowa. Irie la masagaong ga mela na urier kimanam. 7 Tie, iriro Poi ang sipsip la ula uaro uriro babam la iot na kilan ila lamige ang Morowa la unama bo luaga ang orong. 8 Ga na tara la uaro uriro babam, tie miriro nagala ma pagap la man meinim ga mirio 24 ma teip mila uke la kumumeng ai iriro Poi ang sipsip. Ga ut narit narit migana ila uke la maiaria non paga a musik la are gita, ga non dis a gol la dakieng ma urup o bonat ula kukufieng ga suamong. Miriro urup o bonat la mavuoong marikiap maiam inamaniap am Morowa. 9 Ga pumaiara o non sasang ula nou la igama:
“Nunuot, puonung maset meba narang babam ga maduknang mirier ailup ma kendelip ganam la maialu. Muana la nomenam ga nuvara ra ga ina masaunung teip ga magaulap a olabuan nuo meba ina nalam aun Morowa. Eva, ina masaunung inamaniap onim na mirier garip ganam, ga ma mirier tiesiap ganam ga ma mirier non ara neip ga mirie inamaniap na mirier kantrip ganam onim na urio kimanam gano. 10 Ga makosarnung ga betmeng gare miridaip am iriro Morowa buang, ga betong gare orong maiang. Ga eba umaialeng mabuo teip ga magaulap onim na kimanam.”
Avienmeng Poi ang sipsip
11 Tie, inagat uri, ga tuptam nivunap ma papot ma angelop. Uvas ma la mitara papot gare tausan milion. Mirie garip la man dusmeng ga akalimeng luaga ang orong ga pagap mila meinim ga teip mila uke. 12 Ga pumaiara maranit o sasang gare ro, “Iriro Poi ang sipsip, tinan la menamua ga uvara, la puoong maset meba arang kaguma ga mirier pagap ganam mila mumurum ga agat ula mumuru ga kukunim ula kanu gano. Puoieng maset me mirier inamaniap ganam le maiaving bonim a ga temeba aime, ga meiva temaieng aime.”
13 Ga tupto ties maiong mirier pagap la makosarong Morowa, la maiot na panbinim ga maiot na kimanam, ga mirie la maiot tatang upat kimanam na pianam la maionama teip mila mevara una, ga na pirom. Eva, mirier pagap ganam la maiot na mirier napup ganam la pumaiara gare ro,
“Morowa la unama bo luaga ang orong ga Poi ang sipsip gat, eba liarang urier temaieng gano ga tenubap o uvien ga bonim ula kakanu ga urier kukunim gano, puoieng atatan makin.”
14 Tara la okosarmeng gare tiro, miriro nagala ma pagap la man meinim la megama, “Amen!” Ga teip mila uke la kumumeng ga lotumeng me ai Morowa ga Poi ang sipsip.