1 Sarah imin iyenon ndre krismas puken sangat-rungeh-pe-ondrotoloh (127). 2 Iy imet imin Hebron, ise lon lok mandra-an Kenan, pe Abraham ikarndrum ile mo-on pe ideng mbrulun.

3 Inum oh ti pe Abraham itlang iyeu odo koson mbrulun pe ile ilndre-et su lau Hit, pe ipe ihpa, 4 “Yu ndramat hokor yi pe umwin lenga’ oduu, use usehndremte oduu upwe kusih hombrul poi, kile we kudoni mbrulu kidu eriy.”

5 Ile pe su hapa ihpa, 6 “Ohrung odu lau il, ou kakah homou tadu. Odu we etpehre sih ngat odo lok kerti, kile we ou odoni mbrulum ti kile eriy. Hombrul lok iy ndre huyen lakopwi eri odu we atpahran kile tadam.”

7 Abraham idu eleng pe ipu ruru ile ta su 8 pe ipe ihpa, “Ipe ye ndre ndrokene oduu atpa yu we kudoni mbrulu kidu kede, eri yu uhwasu-u upwe oduu edehndremte Efron, nedun Sohar, 9 pe kipahran pehliy Makpelah ilso mukehe ngerin lok tadan ti kise todo pe yu kusihnen. Edehndremte iy uh, pe iy ipe yu kusihnen, eri iy kidehepuse mbrunen kolwii. Oduu ede-en pe yu kuduwe rehen poi ti kile tadan kihpa ndre iy irih ti, kile we lok erti we kile ndruhun tunton ndramat todo.”

10 Efron, eri iy lapan Hit pe imin ndre lenga’ su lewen hodo ndruhun sohou ise pohngkuwen siti. Ile pe iy isohou ile ndralngan ndramat ndre sulo-on ndre he-en eriy ti ihpah, 11 “Ohrung lau il, we kindrehpa ndre ou ereh ti pwi. Yu we kuduwe lok ndre mandra-an ndrodan ndre pehliy. Ile pe mahkele idu madan lau ndre sulo-on todo kudu, eri yu uduwe tadam, kile we ou odoni mbrulum kile eriy.”

12 Ile pe Abraham ipu ruru petsih yi ile ta su Hit 13 pe ipe ile tan Efron, kile we sa ndramat hohrungii, “Yu uhndremte ou, ipe ye ou apahran ndre ndrokene kise todo eri yu we kusihnen pe kudoni mbrulu kile eriy.”

14 Efron ihpa, 15 “Ohrung oh, lau il, rehen poi eri ndralahan silwa ke hangat (400). Yu we kuduwe kile poyim. Ou esihnen kolwii. Odoni mbrulum kile eriy.”

16 Efron idu lenga’ su Hit ndre sulo-on hantahrung ti pe ipahran mbrunen poi. Abraham ihwaso-on tawene tadan, ile pe isihnen poi ti ile ndralahan silwa ndre hangat (400). Pede-en tadan ihpa ndre sa bisnis ndramat odo kalmene-en erti henesihsih ihpa eriy tih.

17 Ile pe sane ndre sulo-on tan Efron he-en Makpelah, ise rai odo Mamre, eri ke ile tan Abraham. Poi ndre mandra-an ilto ndre kapetne-et, ndrodan pehliy sih pe kei ndre sulo-on he-en eriy ti Abraham ke indresihnen pe kah tadan. 18 Su Hit ndre sulo-on ndre hala sohou idu rang eriy, eri hohtuno su ihpa ndre lok eri ke inna lonen Abraham.

19 Inum ti pe Abraham idoni mbrulun ke Sarah ile lon pehliy odo Makpelah, rai odo Mamre, ise pule-en poi odo Kenan. 20 Ile pe lok ta su Hit kudu eri ke ile lonen tunton ndramat tan Abraham.