1 Mndewa Mulungu kawalongela Musa na Haluni muna iisi ya Misili, 2 “Mwezi uno wizakuwa mwezi wa mwanduso wa mwaka kumwenu. 3 Walongele wanhu wose wa Isilaili kuwa muna isiku ya longo ya mwezi uno, chila munhu kolondeka yasole mwanang'hondolo imwe, kwa chila kaye imwe. 4 Yahawa kaye ina wanhu wadodo ng'hani, yolondeka kuilumba na wanhu wa kaye ya mkaya miyage kuja inyama ya kuwafaya wanhu wake, maabaho wezasagula nyama chila munhu iyodaha kuja. 5 Sagula bebelu kulawa mwa ng'hondolo hebu mwa luti. Diwe da mwaka umwe na dilibule chilema chochose. 6 Mwizamwika mbaka siku ya longo na nne ya mwezi uno, maabaho Waisilaili wose wezachinja wanyama wawo ichigulogulo nguku zikwingila. 7  Wanhu wezasola damu ya mnyama wawo na kuhaka mibiki yamhilile ulwivi lwa ikaye yondawaje ng'hondolo. 8 Wezakuja nyama ichilo icho vondawayoke, wezakuja hamwe na gate hadigumigwe lusu na mboga zili usungu. 9 Sekemuje nyama mbisi hebu itogosigwe, mbali yolondeka yokigwe yose, hamwe na ditwi na migulu na nyama zake za mgati. 10 Sekemusigaze nyama yoyose mbaka imitondo, one ihasigala mbaka imitondo, molondeka muisome moto. 11 Vino ivo vondamuje nyama iyo. Mwizakuwa mufunga mikwiji muna ivigudi venu na muyawala vilatu na mwamha mhome muna yamakono yenu kuisasala na mwanza, kaidi mwizakuja himahima. Iyo ni * Pasaka fambulo jake “Kufosa uchanyha ya kaye.”Pasaka ya Mndewa Mulungu.

12 “Chilo icho nizafosela muna iisi ya Misili, nizawakoma welekwa wa udele wose muna iisi ya Misili, wanhu na wanyama. Nizaitagusa milungu yose ya Misili. Niye iyo Mndewa Mulungu. 13 Lelo damu ija izakuwa chilaguso chenu cha kulagusa kaye zondamuwe. Niye vondaniwone damu iyo, nizawafosani na hamwizapatigwa na dihile jojose lusita vondaniwataguse Wamisili. 14 Siku ino izakuwa ya lukumbuso kumwenu, mwizaitenda iwe dugila kwa Mndewa Mulungu, hata nyelesi zenu zose kwa lagilizo da siku zose kumwenu.”

15 “Mndewa Mulungu kalonga, ‘Kwa siku saba, mwizakuja magate hayagumigwe lusu. Siku ya mwanduso ya siku saba izo, mwizasegeza lusu muna zikaye zenu. Munhu yoyose yahaja chinhu chigumigwe lusu muna zisiku saba izo, kolondeka yawingigwe na Waisilaili.’ ”

16 “Siku ya mwanduso na siku ya saba ni mting'hano wa kutosa kwa Mndewa Mulungu, mwizakuwa na dugila. Muna zisiku izo mbili hamulondeka kusang'hana usang'hano wowose, ila usang'hano wa kusasala ndiya. 17 Mwizatenda dugila dino da magate hayagumigwe lusu fana lukumbuso lwa siku vonimulavileni mweye vibumbila va Waisilaili muna iisi ya Misili. Dugila ijo dizatendigwa siku ino na nyelesi zenu zose zikwiza fana lagilizo da siku zose. 18 Mwezi wa mwanduso mwizakuja magate hayagumigwe lusu, kwandusila ichigulogulo cha siku ya longo na nne mbaka siku ya malongo maidi na imwe ichigulogulo. 19 Muna zisiku izo saba, sekemuwe na lusu jojose muna zikaye zenu. Munhu yoyose yawe mfosanzila hebu mkaya, yahaja chinhu chigumigwe lusu kezawingigwa na Waisilaili. 20 Hanhu hohose homukala, sekemuje chinhu chigumigwe lusu. Molondeka muje magate hayagumigwe lusu.”

21 Musa kawatanga walala wose wa Waisilaili na kuwalongela, “Chila imwe wenu yawasagulile wanhu wa ng'holo zake mwanang'hondolo wa chilume na kumchinja kwa ichimu cha Pasaka. 22 Mwizasola mayani ya hisopo na kuyachofa muna idamu mgati ya diziga na kuihaka muna imibiki yamhilile ulwivi lwa kaye zenu. Munhu yeyose sekeyalawe kunze ya kaye ichilo icho mbaka imitondo. 23 Mana Mndewa Mulungu kezafosa kuwakoma Wamisili, one yahawona damu yoihakigwe muna imibiki yamhilile ulwivi lwa kaye zenu, kezafosa. Wala hezamuleka mdanganyi yengile muna zikaye zenu na kumkomani. 24 Mweye mwizaika mbuli ino kuwa lagilizo kumwenu na wanenu siku zose. 25 Vondamwingile muna iisi ija Mndewa Mulungu yoyawalaganileni kumwing'hani, mwizatenda dugila dino. 26 Wanenu vondawawauze, ‘Dugila dino fambulo jake choni?’ 27 Mwizawedika, ‘Ino ni nhambiko ya Mndewa Mulungu ya Pasaka, kwaviya kafosa uchanyha ya kaye za Waisilaili muna iisi ya Misili viyawakomile Wamisili, mbali cheye hachikomile.’ ”

Maabaho Waisilaili waidulika matwi yawo na kumtambikila Mndewa Mulungu. 28 Maabaho Waisilaili wahita, watenda fana Mndewa Mulungu viyawalagilize Musa na Haluni.

29 Chilo chikulu Mndewa Mulungu kawakoma wana chaudele wa muna iisi ya Misili, kwandusila chaudele wa mfalume wa Misili yoyakalile muna ichigoda cha chifalume, mbaka chaudele wa mfungwa na waudele wose wa wanyama. 30 Ichilo chiya, mfalume wa Misili na wasang'hani wake na wanhu wose wa Misili, walamka. Kukala na ndilo ng'hulu muna iisi yose ya Misili, mana hakukalile na kaye hata imwe munhu hadanganike. 31 Ichilo icho mfalume wa Misili kawatanga Musa na Haluni na kawalongela, “Lamkeni! Segeleni muna iwanhu wangu. Segeleni mweye hamwe na Waisilaili muladi mukamtosele Mndewa Mulungu, fana vimulongile. 32 Soleni ng'hondolo wenu na luti wenu na ng'ombe wenu, musegele. Na niye iviya munitemele mate.”

33 Wamisili wawahimiza Waisilaili wasegele himahima kuna iisi yawo, walonga, “One hamusegele, wose chizadanganika.” 34 Ivo Waisilaili wausola usage wawo haugumigwe lusu na mahamha yawo ya kubulugila, waviguma muna yamawalo yawo mmayega. 35 Waisilaili watenda fana Musa viyawalongele, wawapula Wamisili via va zahabu na hela na viwalo. 36 Mndewa Mulungu kamala kuwatenda Waisilaili wanogelwe na Wamisili, Wamisili waweng'ha Waisilaili chila chinhu chowapulile. Vino niivo Waisilaili viwasolile vinhu va Wamisili.

37 Waisilaili wasegela kulawa bululu da Lamasesi wahita Sukosi. Wakala walume laki sita, wanaake na wana hawapetigwe bule. 38 Wanhu wamwenga wengi wahita hamwe nawo, ng'hondolo na luti na ng'ombe iviya wahita hamwe nawo. 39 Kwaviya wakala wasegele Misili himahima, hawadahile kusasala ndiya ya kuja muna inzila, ila usage uja ubulugigwe bila kugumigwa lusu, ivo woka magate hayagumigwe lusu. 40 Waisilaili wakala Misili miyaka magana mane na malongo matatu. 41 Viifikile siku ya uhelelo ya mwaka wa magana mane na malongo matatu, mabumbila yose ya wanhu wa Mndewa Mulungu wasegela Misili. 42 Ikala ichilo Mndewa Mulungu viyawakalize Waisilaili muladi yawalave muna iisi ya Misili, chilo chino yolondeka chikumbukigwe na Waisilaili wose na nyelesi zawo, fana chilo cha hishima kwa Mndewa Mulungu.

43 Mndewa Mulungu kawalongela Musa na Haluni, “Malagilizo ya Pasaka ni yayo yano, nyambenyambe yoyose hezakuja ndiya ya Pasaka. 44 Mbali mtumwa yoyose yaguligwe, yahengizigwa ulungwana kodaha kuja. 45 Nyambenyambe yofosa nzila hebu msang'hani yolihigwa, halondeka kuja ndiya iyo.

46 “Ndiya yose yolondeka kudigwa muna ikaye yoisasaligwe, sekemulawe nayo kunze hebu sekemubene hata vuha dimwe da mnyama wa Pasaka. 47 Wanhu wose wa Isilaili wolondeka watende dugila ijo. 48 Nyambenyambe yoyose yokala kumwenu yahalonda kutenda Dugila da Pasaka da Mndewa Mulungu, teng'hu walume wose wokala muna ikaye yake wolondeka wengizigwe ulungwana, baho kezapeteka kuwa mkaya na kutogoleligwa kutenda dugila. Mulume yoyose hengizigwe ulungwana, sekeyaje ndiya ya Pasaka. 49 Malagilizo yayo yayo yomsonhela mkaya Muisilaili na nyambenyambe yokala na mweye.” 50 Waisilaili wose watenda fana Mndewa Mulungu viyawalagilize Musa na Haluni. 51 Muna isiku iyo iyo Mndewa Mulungu kawalava Waisilaili muna iisi ya Misili kwa mabumbila.