1 Mndewa Mulungu kamulongela Musa, 2 “Walongele Waisilaili wanilavile nhosa. Nihokelele nhosa zangu kulawa kwa munhu yoyose yolonda kuning'ha. 3 Zino niizo nhosa zondauzihokele kulawa kumwawo, zahabu na hela na shaba 4 na langi ya buluu na langi ya zambalau na langi ndung'hu na viwalo vinogile na mazoya ya luti 5 na mbende za mabebelu ya ng'hondolo zihakigwe langi ndung'hu, na mbende za wanyama wa mwiibahali na mibiki ya mkenge, 6 na mavuta ya chitasa cha hema da Mulungu, vilungo kwa mavuta yelile na ubani, 7 na mabwe yokwaka ya salidoniki na mabwe yokwaka yamwenga kwa ichimu cha mahambo, chifuko cha muimhambaga na chizibawo cha mkulu wa nhambiko. 8 Leka wanhu wanizengele hanhu helile, muladi nidahe kukala hamwe nawo. 9 Zenga hema da Mulungu na vinhu vake vose kuilinga na viya vondanikulaguse.

10  “Nawo watende sanduku da mbiki wa mkenge, utali wake uwe sentimita gana na longo, ugalamu wake sentimita malongo sita na sita na chimo chake iwe sentimita malongo sita na sita. 11 Na weye udihake zahabu yelile mgati na kunze, uditendele lukingilo lwa zahabu banzi zose. 12 Maabaho utende mhete nne za zahabu na uzivaze muna imigulu yake mine, mhete mbili banzi imwe na banzi imwenga mhete mbili. 13 Na utende mibiki ya kupapila ya mkenge na uihake zahabu. 14 Ingiza mibiki iyo muna zimhete zili banzi mbili za sanduku, kwa ichimu cha kudipapa. 15 Mibiki iyo ya kupapila izasigala muna zimhete, sekeisegezigwe. 16 Muna disanduku ijo, kwizakwika vibawo va mabwe va ukalangama vondanikwing'he.

17 “Tenda ngubiko ya zahabu hanhu ha kuilumba, utali wake wizakuwa sentimita gana na longo na ugalamu wake sentimita malongo sita na sita. 18 Tenda vilumbe vidi va zahabu vovilingile fana wasenga wa kuulanga, tenda usang'hano wa kuhonda muna imihelelo ya ingubiko iyo. 19 Tenda vilumbe ivo vidi, chimwe uhelelo umwe na chimwenga uhelelo wekaidi, tenda vilumbe ivo vidi chinhu chimwe na ngubiko. 20 Vilumbe wawo wezailola, mabawa yawo yakunjuka kuigubika ingubiko, vihanga vawo vizailola ingubiko iyo. 21 Mgati mudisanduku kwizakwika vibawo vidi va mabwe va ukalangama na kuika ngubiko iyo uchanyha yake. 22 Nizaiting'hana na weye baho, kulawa hachanyha ya ngubiko iyo, hagati ya vilumbe wawo waidi weli mchanyha ya sanduku da lagano, nizakwing'ha malagilizo yangu kwa ichimu cha wanhu wa Isilaili.

23 “Songola meza ya mibiki ya mkenge, yili na utali wa sentimita malongo manane na nane na ugalamu sentimita malongo mane na nne chimo sentimita malongo sita na sita. 24 Meza iyo kwizaihaka zahabu yelile na kuizungulusila lukingilo lwa zahabu. 25 Maabaho kwizaizungulusila lukingilo lwili na ugalamu wa sentimita nane. 26 Kwizaitendela mhete nne za zahabu na kuzika kuna zimhembe zake muna imigulu yake. 27 Mhete izo zizakuwa habehi na lukingilo luja lwa kuzunguluka meza na zizakuwa za kwamhilila mibiki ya kupapila imeza iyo. 28 Tenda mibiki ya kupapila ya mkenge na kuihaka zahabu, mibiki iyo izakuwa ya kuipapila meza iyo. 29 Tengeneza vyano na nhungo na mabuyu na vihamha va kugidila. Tengeneza via ivo vose kwa zahabu yelile. 30 Chila siku ika magate yelile hana imeza haulongozi hangu.

31  “Kwizatenda chinala cha chitasa kwa zahabu yelile. Itendigwe kwa kuhonda, kalilo jake na mbiki wake na nhungo zake na matumba yake na maluwa yake, vose vizatendigwa kwa chihande chimwe. 32 Matambi sita yezalawilila hana umbiki wa ichinala, matambi matatu ubanzi umwe na matambi matatu ubanzi umwenga. 33 Muna ditambi kuna nhungo nhatu zilingile fana matumba na maluwa yotangigwa alimondi, muna ditambi disondelela kuna tumba jake na luwa jake. Matambi yose sita yawe fana ivo. 34 Na muna ichinala kwizakuwa na nhungo nne zozitendigwe zilingile fana maluwa yotangigwa alimondi, hamwe na ving'honyo va maluwa yake. 35 Hanhu hondahalawilile chila jozi ya matambi yaja sita, hasi yake hezakuwa na tumba dimwe dimwe. 36 Matumba yayo na matambi yake yezakuwa chinhu chimwe. Chinala icho chose chizahondigwa kwa zahabu yelile. 37 Iviya kwizatenda vitasa saba kwa ichimu cha chinala icho na kuvika uchanyha yake muladi vimwemwese kuulongozi. 38 Tengeneza makoleo yake na vyano vake kwa zahabu yelile. 39 Sang'hanila chilo malongo matatu na tano va zahabu yelile kutengeneza chinala cha chitasa na via vake vose. 40 Hakikisha uvitengeneze fana viya vinikulaguse kuja kumulima.