1 “Kwizatengeneza lupango lwa mibiki ya mkenge, kwa ichimu cha kusomela ubani. 2 Upango lwenyewo luwe lwa mulaba utali sentimita malongo mane na tano na ugalamu sentimita malongo mane na tano na chimo chake sentimita malongo kenda. Mahembe yake ya chila chingobweda yawe chinhu chimwe na lupango lwenyewo. 3 Kwizachihaka zahabu yelile, ubanzi wake wa uchanyha na banzi zake zose na mahembe yake, iviya kwizaitendela lukingo lwa zahabu. 4 Kwizaitendela mhete mbili za zahabu na kuziguma hasi muna ulukingo lwa mbavu zake mbili zoziilola, mhete izo zizasang'haniligwa kwamhilila mibiki lusita lwa kuipapila. 5 Mibiki iyo iwe ya mkenge na ihakigwe zahabu. 6 Lupango ulo lwike haulongozi wa panzia haulongozi wa disanduku da lagano, haulongozi ha ngubiko ya kuilumba, hondaniiting'hane na weye.

7 “Chila imitondo Haluni viyosasala vitasa, kezasoma ubani wili na mnung'ho unogile uchanyha ya lupango. 8 Haluni kolondeka kutenda ivo lusita voyokwacha vitasa ichigulogulo nguku zikwingila. Nhosa ino ya ubani izalavigwa siku zose kwa Mndewa Mulungu bila kuleka muna zinyelesi zenu zikwiza. 9 Muna ulupango luno, usome ubani uluhusigwa muhala na sekemulave nhambiko ya kutimbuligwa, hebu nhosa ya usage, hebu kugida nhosa ya ching'waji uchanyha yake. 10 Haluni kolondeka kuyasafya mahembe ya ulupango mwanza umwe kwa mwaka. Kezayasafya kwa damu ya nhambiko ya uhasanyi mwanza umwe chila mwaka muna zinyelesi zenu zose, mana lupango ulo lwela ng'hani kumwangu niye Mndewa Mulungu.”

11 Mndewa Mulungu kamulongela Musa, 12 “Vondauwapete Waisilaili, chila munhu kezamuliha maliho Mndewa Mulungu kwa ichimu cha ugima wake muladi hagati yawo sekekuwe na mitamu ihile lusita lwa kupetigwa. 13 Chila munhu yopetigwa kolondeka yalihe nusu shekeli ya hela, fana viipimigwe muna dihema da Mulungu. Ino niiyo nhosa yondayanilavile niye Mndewa Mulungu. 14 Chila munhu yopetigwa kwandusila miyaka malongo maidi na kugendelela, kezanilavila niye Mndewa Mulungu nhosa iyo. 15 Tajili sekeyalave kufosa nudu shekeli iyo ya hela hebu ngayengaye sekeyalave chidogo ya nusu shekeli iyo ya hela vomumulavila Mndewa Mulungu nhambiko ya kuilumba kwa ichimu cha ugima wenu. 16 Kwizahokela maliho yayo ya kuilumba kulawa kwa Waisilaili na kwizayasang'hanila kwa sang'hano za hema da Mulungu, nayo yawe lukumbuso kwa Waisilaili haulongozi wangu niye Mndewa Mulungu muladi kuwatendelani kuilumba.”

17 Mndewa Mulungu kamulongela Musa, 18 “Kwizatengeneza ziga dodiumbigwe kwa shaba da kunawila dili na kalilo da shaba, udike hagati ya dihema da Mulungu na ulupango, na kudiguma mazi mgati yake. 19 Haluni na wanage wezasang'hanila mazi yayo kunawa makono yawo na migulu yawo, 20 Lusita wang'hali hawanakwingila muna dihema da Mulungu hebu kukwenhuka habehi ya lupango muladi kumulavila Mndewa Mulungu nhambiko za kutimbuligwa kwa moto. Wezatenda ivo muladi sekewadanganike. 21 Wolondeka wanawe makono yawo na migulu yawo muladi sekewadanganike. Dino dizakuwa lagilizo jawo siku zose, kwandusila Haluni na wanage na kugendelela.”

22 Mndewa Mulungu kamulongela Musa, 23 “Kwizasola vilungo vinogile ng'hani fana vino, manemane ya mazi chilo sita, mdalasini uli na mnung'ho unogile chilo nhatu, vilungo vinung'hila goya chilo nhatu, 24 na modeli imwenga ya mdalasini chilo sita, ningo izo zose ziwe za kwiilinga na ningo za hema da Mulungu, iviya uyahanganye na lita nne za mavuta ya mzaituni. 25 Kwa vilungo ivo kwizatenda mavuta yelile na uyahanganye fana munhu yokwenga mavuta yonung'hila goya, mavuta yayo yela kwa kuhaka. 26 Maabaho mavuta yayo kwizayagida muna dihema da Mulungu na sanduku da lagano 27 na meza na via vake vose, chinala cha chitasa na via vake, lupango lwa kusomela ubani 28 na lupango lwa kutimbulila nhambiko na via vake vose na ziga na kalilo jake. 29 Kwizavibagula vinhu ivo, muladi veleng'hani. Chochose chondachidalise vinhu ivo, chizakuwa chela. 30 Maabaho umuhake mavuta yelile Haluni na wanage na kuwabagula muladi wanisang'hanile fana wakulu wa nhambiko. 31 Walongele wanhu wa Isilaili, ‘Yano yezakuwa mavuta yangu yelile ya kuhaka muna zinyelesi zenu zose. 32 Mavuta yayo sekemumgidile munhu imwenga yoyose, hebu sekemutengeneze mavuta yamwenga yalingile yano, mavuta yano yela na lusita lose yolondeka yele kumwenu. 33 Munhu yoyose yondayenge mavuta fana yano hebu kumuhaka munhu imwenga yoyose halondeka kuhakigwa mavuta yano, kezawingigwa na wanhu wake.’ ”

34 Mndewa Mulungu kamulongela Musa, “Sola vilungo vino vili umulile, natafi na shekelesi na kelibena, vilungo vili na mnung'ho unogile, hamwe na ubani unogile. Vinhu ivo vose viwe va ningo imwe. 35 Maabaho kwizasang'hanila via ivo kutengenezela ubani fana viutengenezigwa na munhu yotenda vinhu vonhung'hila goya, ubani uli na munyu na mzelu na wela. 36 Maabaho kwizaudunda uwe usage lunhili muladi usang'haniligwe muna dihema da Mulungu na kuwika haulongozi wa disanduku da lagano, hanhu hondaniiting'hane na weye, uwo kumwenu wizakuwa ubani welile ng'hani. 37 Sekemuitendele wenyewo ubani ulingile vino, ubani uwo wizakuwa wela kumwenu haulongozi wangu niye Mndewa Mulungu. 38 Munhu yoyose yoitengenezela ubani ulingile uwo na kuusang'hanila fana mavuta yonung'ha goya, kezawingigwa na wanhu wake.”