1 Isilaili kandusa mwanza wake hamwe na vinhu vake vose kahita Belisheba, uko kalava nhambiko kwa Mulungu wa tati yake Isaka. 2 Mulungu kalonga na Isilaili muna yamalaguso ichilo na kamtanga, “Yakobo, Yakobo!” Nayo kamwidika, “Yemwe, aino hano.”

3 Mulungu kalonga, “Niye niiyo Mulungu, Mulungu wa tati yako.” “Sekeudumbe kuhita Misili, vondauwe uko, nizakutenda uwe makabila mengi. 4 Niye mwenyewo nohita na weye uko Misili, na nizakubweleza muna iisi ino. Yosefu kezakuwa na weye baho vondaudanganike na mkono wake wizamfumba meso yako.”

5 Yakobo kahasegela Belisheba. Wanage Isilaili wamguma Yakobo tati yawo muna imituka yoyailavile mfalume wa Misili hamwe na iwana iwadododo na wake zawo. 6 Iviya wasola mifugo na vinhu vawo vose, viwakalile wapata muna iisi ya Kanaani, maabaho wahita Misili. Yakobo kasola welesi wake wose, 7 wanage wa chilume na wachike na wazukulu zake na welesi wake kaugala Misili.

8 Yano yayo mazina ya wana wa Isilaili wowahitile muna iisi ya Misili, wakala Yakobo na wanage na Lubeni chaudele wa Yakobo, 9 na wanage Lubeni wakala Henoki na Palu na Heziloni na Kalimi, 10 na wanage Simeoni wakala Yemueli na Yamini na Ohadi na Yakini na Sohali na Shauli yoyelekigwe na mwanamke Mkanaani. 11 Wanage Lawi wakala Gelishoni na Kohasi na Melali. 12 Wanage Yuda wakala Eli na Onani na Shela na Pelesi na Zela. Mbali Eli na Onani wadanganika muna iisi ya Kanaani. Wana wa Pelesi wakala Hesiloni na Hamuli. 13 Wanage Isakali wakala Tola na Puva na Yobu na Shimuloni. 14 Wanage Zabuloni wakala Seledi na Eloni na Yaleeli. 15 Wano ni wana wa chilume waja Leya woyamwelekele Yakobo kuja Padani Alamu, hamwe na Dina mndele wake. Pete ya wanage, wandele zake na wabwanga zake wakala malongo matatu na watatu.

16 Wanage Gadi wakala Zefoni na Hagi na Shuni na Esboni na Eli na Alodi na Aleli. 17 Wanage Asheli wakala Imina na Ishiva na Ishivi na Belia na Sela yeli lumbu jawo. Na wanage Beliya wakala Hebeli na Melikieli. 18 Wano longo na sita ni wana wa Yakobo na Zilipa, mtumwa niiyo Labani yamwing'hile Leya mndele wake.

19 Laheli, muke wa Yakobo kamwelekela wana waidi wa chilume, Yosefu na Benjamini. 20 Muna iisi ya Misili Yosefu keleka wana waidi, Manase na Efulaimu, kwa Asenati mndele wa Potifela, mkulu wa nhambiko wa Oni. 21 Wanage Benjamini wakala Bela na Bekeli na Ashibeli na Gela na Naamani na Ehi na Loshi na Mupimu na Hupimu na Alidi. 22 Wanhu wana longo na wane ni wana na wazukulu wa Yakobo na Laheli muke wake.

23 Mwanage Dani kakala Hushimu. 24 Wanage Nafutali wakala Yaseeli na Guni na Yaseli na Shilemu. 25 Wawo saba ni wana na wazukulu wa Yakobo na Biliha msang'hani wa chike iyo Labani kamwing'ha mndele wake Laheli.

26 Wanhu wose wa welesi wa Yakobo wowahitile nayo kuna iisi ya Misili, bila kuwapeta wake wa wanage, wakala wanhu malongo sita na sita. 27 Uko kwiisi ya Misili Yosefu keleka wana waidi. Ivo peta yose ya welesi wa Yakobo wengile Misili wakala malongo saba.

28 Yakobo kamulongoza Yuda kwa Yosefu muladi yamulaguse nzila mbaka Gosheni. Ivo weza mbaka hanhu ha Gosheni. 29 Yosefu kakwela mtuka wake na kahita kumkimilila Isilaili tati yake uko Gosheni. Viwaiting'hane na tati yake, waigeleka zisingo na kalila kwa lusita lutali. 30 Isilaili kamulongela Yosefu, “One nahadanganika sambi si chinhu bule, kwaviya nichiwona chihanga chako na kuvimanya kuwa weye kwa mgima.”

31 Hamala baho Yosefu kawalongela ndugu zake na wanhu wose wa tati yake, “Nolondeka kuhita na kumulongela mfalume kuwa ndugu zangu na wanhu wose wa tati yangu wokala mwiisi ya Kanaani, wanizila. 32 Nizamulongela kuwa mweye mwawadimaji wanyama kwaviya mukala wafugaji, na kwaviya mufika hamwe na luti na ng'hondolo na ng'ombe na vinhu venu vimulinavo. 33 Ivo mfalume yahawatanga na kuwauza sang'hano yenu choni, 34 longeni, ‘Mwenevale, cheye wasang'hani wako chawafugaji wanyama kwandusila udodo wetu mbaka diyelo, kwaviya niivo viwakalile wasaho zetu.’ Longeni ivo muladi mudahe kutogoligwa kukala mkowa wa Gosheni.” Yosefu kalonga ivo kwaviya kwa Wamisili wadimaji wa ng'hondolo si chinhu bule.