1 Mndewa Mulungu kamulongela Musa, 2 “Walongele Waisilaili wakugalile fimbo longo na mbili, chila mulangulizi wa chila kabila fimbo imwe. Yandika zina da chila mulangulizi muna ifimbo yake, 3 na zina da Haluni jandikigwe muna ifimbo ya kabila da Lawi. Kwizakuwa na fimbo imwe kwa chila mulangulizi wa kabila. 4 Zigale fimbo izo hana dihema da Mulungu na kuzika haulongozi wa sanduku da lagano, hanhu honiiting'hana na weye. 5 Fimbo ya munhu yondanimsagule izasuka. Kwa kutenda vino nizawatenda Waisilaili waleke kumulongelelani.”

6 Ivo Musa kawalongela Waisilaili na walangulizi wawo wamwing'he fimbo, chila mulangulizi fimbo imwe kwa kusondelela makabila yawo. Zose zikala fimbo longo na mbili, fimbo ya Haluni ikala hamwe na fimbo izo. 7 Musa kazika fimbo izo haulongozi wa Mndewa Mulungu hana dihema da Mulungu.

8 Igolo yake Musa kengila muna dihema da Mulungu. Umo kaifika fimbo ya Haluni wa kabila da Lawi, isuka na kulava maluwa na kwima matunda yevile ya alimondi. 9 Maabaho Musa kazilava kunze zifimbo zikalile haulongozi wa Mndewa Mulungu na kawalagusila Waisilaili wose, nawo wawona chiya chilawilile. Chila mulangulizi kasola fimbo yake.

10 Maabaho Mndewa Mulungu kamulongela Musa, “Bweleza fimbo ya Haluni haulongozi wa sanduku da lagano. Iyo izakwikigwa goya hanhu baho muladi iwe lamulo kwa Waisilaili wowomulema Musa, one hawalekile kunilongelelela wezadanganika.” 11 Musa katenda fana Mndewa Mulungu viyamulagilize.

12 Waisilaili wamulongela Musa, “Chizadanganika! Chikomelezeka! Chikomelezeka! 13 Munhu yoyose yondayakwenhuke habehi ya hanhu hema da Mulungu kezadanganika. Vino chizadanganika chose?”