5
Chitabu na Mwanang'hondolo
1 Maabaho niwona chitabu muna umkono wa kulume wa ija yakalile muna ichigoda cha chifalume, nacho chikala chandikigwa mgati na kunze na kusingigwa mihula saba. 2 Nimuwona Msenga wa kuulanga yeli na ludabwa yoyopetela kwa dizi kulu, “Yelihi yolondeka kubandula mihula na kuchivugula chitabu icho?” 3 Mbali hapatike munhu yoyose kuulanga hebu muna isi, hebu muna dikombo ditali dilibule uhelelo yoyodaha kuchivugula chitabu icho hebu kuchilola mgati. 4 Niye nilila kwa usungu kwaviya hawoneke munhu yalondeke kuchivugula chitabu icho hebu kuchilola mgati. 5 Na imwe wa walala waja kanilongela, “Sekeulile! Lola simba wa kabila da Yuda, lukolo lwa Daudi, kahuma. Yeye kodaha kubandula mihula saba na kuchivugula chitabu chiya.”
6 Maabaho niwona Mwanang'hondolo kema haja hagati ya chigoda cha chifalume, kazungulukiligwa na viumbe weli na ugima wane na walala. Kawoneka fana kachinjigwa. Kakala na mahembe saba na meso saba, niiyo Mihe saba ya Mulungu yoitumigwe muna isi yose. 7 Mwanang'hondolo kahita, kachisola chitabu icho kulawa kuna umkono wa kulume wa ija yokala muna ichigoda cha chifalume. 8 Na viyachisolile chitabu icho, viumbe weli na ugima wane na walala malongo maidi na wane, watumbala mavindi haulongozi wa Mwanang'hondolo. Chila imwe kamha putikalanga na mahamha ya zahabu yamemile ubani, yano niiyo nhambiko za wanhu wa Mulungu. 9 Na wemba wila wa sambi,
“Weye kolondeka kubandula mihula na kuchisola chitabu.
Kwaviya kuchinjigwa, na kwa damu yako kumulopolela Mulungu wanhu,
wanhu kulawa chila kabila na ulonzi na welesi na isi.
10 Kuwatenda fana ufalume na wakulu wa nhambiko wamsang'hanila Mulungu wetu,
na wezatawala muna isi yose.”
11 Vinikalile nolola, nihulika madizi ya wasenga wa kuulanga mvunyo. Wema wachizunguluka chigoda cha chifalume, na viumbe weli na ugima wane na walala, 12 na walonga kwa kulandula dizi,
“Mwanang'hondolo yachinjigwe
kolondeka, kuhokela ludabwa na kuwa na vinhu vingi na ubala na udahi,
hishima na ukulu na nhogolwa.”
13 Iviya nihulika viumbe vili na ugima viya vose vili kuulanga na muna isi na hanhu howokala wanhu wadanganike na muna ibahali. Ona! Vinhu vose vili muna isi yose vomwimbila,
“Ukulu na hishima na nhogolwa, na ludabwa viwe,
kumwake yeye yokala muna ichigoda cha chifalume na kwa Mwanang'hondolo
siku zose.”
14 Viumbe weli na ugima waja wane wedika, “Ivo.” Na waja walala watumbala mavindi na kutambika.