17 Nakama yuu Isipi yaki nyuo epapeyaminyi dokopa enakana ee kana lapona kana mupwa dokona yuu gii mupwa dokopa Kamongona komau anda doko kanda soo piyami. 18 Moseseme isa yuu dokona susa pyao isa retapala wangu dupwa isa pyano piya. Dopa pipala wangu dokona isa lapo palyiya. Palyapala komau anda dokona kambu dowa dokona isa pote lapo pyaneya. 19 Dopa pipala Kamongome pinya leyamuli pyuo baame komau anda doko komau mendeme wambo kaowapala dee enakana mendeme kamba lapo pyuo doko kao piya. 20 Kaowapala baame kana para dolapo nyepala Kana Minyuo Lalu Lao Lenge Pii Palenge Bokote dokona palyiya. Palyapala baame isa lama bokote pinjingi kingi minyingi dolapona pyambwapala bokote doko upi leya. 21 Upi lapala baame bokote doko minyuo pao komau anda dokona retapala komau mendeme nee pyuo yukunyi palyiya. Dopa piyamo doko baame Kamongome leyamuli pyuo Kana Minyuo Lalu Lao Lenge Pii Palenge Bokote doko yambe pyao reteya.

22 Baame misi anda komaumi wasisi dokona taepo doko komau yukwaro kareyamo dokona kamarena kingi kyairena reteya. 23 Kamongome leyamuli pyuo borete Kamongo kiso maingi dupwa taepo dokona ketae reteya. 24 Baame misi anda komaumi wasisi dokona lambe kisingi bange doko minyuo pao taepo kanda kanda kingi rolaerename reteya. 25 Retapala baame Kamongome leyamuli pyuo lambe dupwa Kamongona lenge kambu dokona kaiya. 26 Baame kana golome wasisi kana pyare lasi minyuo pao komau anda kambu konando penge dokona komau yukwaro kareyamo lenge kambusa andakare reteya. 27 Retapala Kamongome leyamuli pyuo rendamu kyaa keyange pingi bange dupwa dokona kisiya. 28 Komau anda kambu konandowame dokona komau doko yukunyi palyiya. 29 Doo komau yukuyamo dokona lenge kambusa kamarena mena pyao kiso maingi kana pyare lasi doko reteya. Reteyamo dokona baame Kamongome leyamuli pyuo mena pyao kiso maiyuo witi jingi dupwa kiso maiyuo piya. 30 Pipala mena pyao kiso maingi kana pyare dokope komau andape kanya dokona wate pingi disi warake doko retapala dokona ipwa kamuo simbuo reteya. 31-32 Kamongome lamaiyamuli pyuo Mosesemoo Eronemoo Erone banya ikinyingimoo yuu gii lapo nakama komau andape kana pyare lasi dokonape pena dokopa kingi kimbupi wate pipa pingi. 33 Komau anda dokope bange kiso maingi kana pyare dokope laparae nyuo sukusa palyuo kame awali lao piya. Pipala kambu konando penge dokona komau doko yukunyi palyiya. Dopa pipala Moseseme yulu peparae pyuo oteya.

34 Misi anda komaumi wasisi dokona kopa dokome epo yambe piya. Dokopa Anatunya yanga paupau lenge renge dokome leya leya piyamo dokome komau anda doko palyuo simbuya. 35 Dopa piyamosa Mosese komau anda dokona kolando paa naya. 36 Kopa komau anda dokona siyamo doko sipuro peyamo dokopa iki Isaraele wambu dupwa yuu paleyaminyi doko yaki nyuo yuu mendasa parapu paleyami. 37 Kopa doko mee dokona sulu siyamo dokopa nakama paleyaminyi yuu doko yaki nyuo paa nayami. 38 Yuu gii peparae korakama dokopa nakama kata papyuo kareyaminyi dokopa kopa dokome Kamongo karamo lao lasaka pyuo komau anda ketae siyamo doko kandeyami. Dee kukwa dokopa komau anda ketae isare rao kareyamo kandeyami.