JOPO.
31.
Nambame kinyi kinyi lalu lao lapala lamaiyuo, Wanake dupwa kandapala kepo pyuo nyuo reto palipuli lao suu pyaa naro, leyo. 
Anatu Porai Wakasa dokome namwa kando aki mende pirase? Wambunya yulu koo pilyaminyi dupwana apa pyuo baame yano pyarase? 
Wambu lapo koo pirami dupwa baame randa andake maiyuo koo keta palyara. 
Anatumi nambana yulu pilyu dupwape kata papilyu dupwape soo karamo. 
Nambame yulu koo mendepe pipala wambu menge dupwa minyako pii nange lao kingi ketae nembo leto. 
Anatumi sikyali angi rolae mendena namba sikyali pipala namba koo mendepe pali nalyamo doko kandara. 
Namba kata keyange dokona yaki nyero ramo panda yulu koo pinya wangu lakaro ramo dee nambana kingi dokome koo piru ramo 
dokopa nambana ee dupwa kokwa sinyi nembena lao dee wambu lapo dupwame nambana nenge wara pingi dupwa manjo nena lareko. 
Nambana parali maki palenge akali dokona enda doko auwapala nambapa palimbwali lao suu pyapala enda banya anda kambu dokona yalu pyuo maa palyuo karapuli 
dokopa nambana enda dokome akali wakale mende nenge maiyuo baapa palyuo pipyali. 
Kepo yulu dopale dokome kanya pyapo lao kuma lao kyawa yaki nyasara. 
Koo doko Satanena panda isareme rao karenge dopale ingyuo nambana bange peparae rao pyalingi nyera. 
Nambana kendemande dokona mendeme namba kando mumu laramo dokopa nambame sepala mondo lao nyisaro. 
Nambame dopa pii naro ramo doko Anatu kando apa larose? Namba keta kote laramo dokopa aki pii larose? 
Anatu mendaki namba wasiyamo dokomeko nambana kendemande dupwa wasiya. 
Nambame pendewa dupwa nyisalana maka suku suku nengende daa. Enda waiya dupwa pee lombanyi karalyo sinya lapala kaengende daa. 
Dee namba nenge napala dokopa muiyane dupwa lopome kumuo pena lapala kaengende daa. 
Yuu gii peparae nambame nakama poraiyuo suu pyao rapu pyuo karenge. 
Wambu muiyane mende komau yangyaramo dupwa nyelana saka naramo kandaro ramo dokopa 
komau rangena mena sipisipi yamanji wapusi keyange doko mairu. Dokopa baame banya mona andarename peparae piso rae maiyuo nambana kingi minyalyara. 
Nambame kote lao wini piroŋo lao sepala wambu muiyane dupwa minyako piyuli 
doko nambana kingi doko roo piyali dee nambana lange dokona piso rekya lao yuku nyisa epeyali. 
Renge doko namba Anatumi kote lara ingilyamo dokona soo paka renge ipyasa namba yulu dopalepe mende kamame pii napuli lao suu pyao karo. 
Namba isa bange kamongonge dupwana mona nyii nange 
Nambana mena bangepe dee kana malupi retenge dupwana namba range mupwa lao suu pyaa nange. 
Neta rao yanga paupau lenge dokona lao nambame neta doko lakandengende panda kana rao kendapuli minyingi dokona lao kana doko lakandengende daa. 
Namba nyuo isoko kata nembaramopa dupwa kingi lakando ketae pyambulyu lao nambana kingi dupwana makando lapo pyuope pinginde daa. 
Koo dopale dokome Anatu Porai Wakasa doko mata maipala kumuo randa nyingi. 
Nambana nyisu petenge dupwa yasu nenge dokopa namba rae maiyuo karengende daa. Dee nakama randa andake nyingi dokopa namba kapaŋa lao rae mainginde daa. 
Nambame koo pyuo wambu dupwa kuminya lao ateŋa pyakami nange. 
Akali nambana yulu pyakange dupwame wambu upunili dupwa yuu peparae yako lao nenge pilyunu doko kandenge. 
Wambu kata londe pena epenge dupwa katana palena lao kaeya napala nambana anda yako lao nyuo palyingi. 
Akali menge dupwame nakamana koo dupwa yalu pipala kaenge. Dopa pilyaminyipape nambana koo dupwa pano polo lao karenge. 
Namba wambumi mende larami dupwana paka nange. Nakamana pii koo lao giyalya giyana pyuo larami dupwana pakapala namba elya kalo andakare kara nange. 
Namba pii leto dokona mendemepe aki letene lao see naramisi? Pii peparae kinyiŋi lao lalu lao leto. Anatu Porai Wakasa dokome isingi yano pyakana. Nambana koo pingi dupwana lao nambana nyisu petenge dupwame yango palyuo minyuo eparaminyi dokopa namba randa nyereŋe lao pepana pyasi sipyali 
Dupwa peparae nyuo nambana lange dokona mona kare kare embo kyawa rarange ingyuo kyawana pee pyuo wambu peparaeme kandena lao dupwa ketae minyalyapuli. 
Nambame yulu pipunu dusipa peparae Anatu lamaipala banya lenge kambu dokona namba enamba see napala karapuli. 
Nambana ee nenge reto mena minyuo pilyunu yuu doko waa nyepala 
wambu mendena wakalende nyepala dokona nenge ando karamo dupwa napala yuu range pama yulu pingi akali doko mee lopo karena lapuli 
dokopa witi jingipi bali jingi andenge doko suu pyao yuu dokona mano jingipi rano pisi api pyapyali. Jopona pii dupwa oteya.