JOPO.
41.
Embame oma kameya kemali pingi Lipaetane lenge doko ukumi kapa pyao nyerese? Panda banya kekenge doko puumi bwuakarese? 
Embame banya gyaa kata dokona puu pyambware panda banya angapu dokona uku puu dokome pyambwarese? 
Embame nembapili lao emba piso sokondali pirase? Embame baa sakame kumapili lapala angangi pii larase? 
Baame embapa lao palyapala embena yulu pyakao karalu kararo lao lalu lao larase? 
Embena kendemande wanake dupwa rae maiyuo kando karamili lao suu pyao embame yaka mondo nenge ipwape maiyuo rapu pinginyili pyuo baa rapu pirisi? 
Oma pingi akali dupwame baa kandapala akema lao kana kando mena belye pyuo isa nembo nyeramisi? Dee ropo pingi akali dupwame baa pyao kunjapala kana nyeramisi? 
Embena oma pingi kaku dokome banya yanenge dokona yalyarase panda kaku dokome banya ayemba dokona arekyarese? 
Embame yuu gii mendaki minyandare ramo doko dee minyandalana iki lara. 
Mendeme oma kameya kemali pingi Lipaetane doko kandaramo doko yamarangupala mee walu lao pao palira. 
Baa apu pingi dokopa mena nalana pingi ingyuo gasimwa pokelyamosa wambu mendemepe palenge dokona para ingya nange. 
Api mendeme baa minyapala nyera ramo wambu doko range lete kararase? Yuu muu dupwana peparae wambu mendemepe dopa pirami ingya nange. 
Nambame Lipaetanena kimbu dokona banya poraipi dee apa pyuo andake laope dolapona lao polo langiruwale. 
Mendemepe banya kapa porai pee pingi dokona arekeyo pyaa narami dee banya yanenge doko minyuo pilya naramiko. 
Apimi banya angapu nenge pakame kumuo karenge doko minyuo angapu lakirase? 
Banya mata doko konambe wasisi dopale ingyuo pao suu lapala kana ingingi. 
Mendaki mendaki lao mendena gii koo lao poraiyuo pakara pakara pyuo silyasa kanya ŋee soo kaka soope pii nange. 
Dupwa peparae nyuo minyarambwapala pyuo pyakondape pilyamosa mendemepe ipyuo wakale wakale pyuo nyii nange. 
Baa imaketa pilyamo dokopa yuu pele pipala yanga paupau lao rali pingi. Banya lenge doko neta potemenge dopale. 
Banya nenge kata dokona isare uliyapu nyuo yanga paupau lao epo dee lelenge dupwa lele pyale pyuo nyisa epo penge. 
Banya gyaa kata dokona isare sukwa epelyamo doko kulimbwanyi pelyamo dokopa isa yoko rapala kyau lenge dopale ingyuo epenge. 
Banya ŋee ŋae dokome isare ingyuo kanda soo relyamo dokopa lelenge dupwa banya nenge kata dokona pyakao epenge. 
Banya mange dokona porai renge wakasa palelyamosa wambu peparaeme kandelyaminyi dupwa kando paka renge nyingi. 
Banya yongo doko kuki pepalape dusa piku piku laa nange ama porai ane isa mendeme minyuo punjarami ingya nange dopale ingingi. 
Banya mona kana pokapala ipwa peta kana mundu ingilyasa paka nange. 
Baa roya karenge dokopa imambu wakale dupwame pakapala mende pinya saka nange. 
Wua gela mendemepe baa pyao ranjama nyuope wua kaku walekyape dupwame pyaraminyi kapa ingya nara. 
Baa keta ane isa porai dupwa mee kaka yau ingingi dee kana porai dupwa isa kupwa dopale ingyuo pingi. 
Baa kaku dupwa kando pyakao paa nange. Dee kaname baa pilyaminyi dupwa mee bange ingyuo penge. 
Baa keta akali dupwame kakumi pilyaminyi dokopa kando gilya giyana pyuo kusape dupwa mende ingya nange. 
Banya yamanji kinju dupwa galase kambasi waepala dopale dokome yuu warape dupwana kalyingi dokopa wara dupwa lumbalya lumbana pyuo koko palyuo karenge. 
Baame ipwa kota dupwa nyuo kapu kyuo sanena ipwape mambape kisilyamano bolo pingi dopale ingingi. 
Baa kata nyuo pelyamo dokopa matarena leya leya pingi. Ipwa kota doko maki maki manjo kasakole minyuo pinya lao nyuo kapu kyingi. 
Isa yuunya mena suwape mendepa manda manja nange. Baa iki keta paka renge mende pali nange. 
Baame mena suwape range mupwa lao suu pingi dupwa kandanyi isa palyapala mena suwape rae lenge rara wakale wakale wasiyamo silyamo dupwana baa iki kiŋi ingyuo karenge.