SAMU.
63.
Anatu emba nambana Anatu dokoŋo. Namba embapa role pyao karapuli yaka. Nambana suu pingi peparaeme emba keta karapuli yaka lao suu pilyu. Yuu penda penda ipwa pali nange dopale ingyuo karapala nambana imambu dokome embapa karalana ipwa ingyuo nano pipyamo karo. 
Nambame emba porai ingyuo yanga paupau lao karene doko misi anda dokona karo kandalana suu pyao karo. 
Embame yaki nyii nao mona reto puu penge doko angi ingyapyasa isa yuu dakena piso karo pingi doko mee ingyuo pelyamo dokona embena kingi ketae pyambuo lakando kararo ingilyamo. 
Namba kararo mange dupwa pipya emba kando ange lao nambana kingi ketae pyambuo ateŋa laro ingilyamo. 
Nambana imambu doko imambunya nenge nao sikya pira dokopa nambame emba kenane pyao lakandaro. 
Nambana luu palenge panda dokona palyuo soo dokopa embena lao suu pyao palyuo singi. Kukwa peparae namba embapa lao suu pyale pyale palenge. 
Renge dokona lao embame namba yuu peparae nyisingi. Embena arapu dokona karenge dokona lao rae maingi kenane dupwa pyao karo. 
Nambame emba poraiyuo minyaro soo pelyo. Dokona namba kyawa minyuo karene kande. 
Wambu lapome namba pyao kumakalana pilyaminyi dupwa kumasi wambunya yuu dokona isa parami. 
Nakamame yanda pipala pyaraminyipa nakamana yanenge kakapange doko suwa rae lenge dupwame nao kararami. 
Anatumi pyao anamasi minyakamira dokona kiŋi baa rae maira. Wambu Anatupa pii kana minyuo lengedupwame banya kingi lakandaraminyipa kyambo lenge wambu dupwa pii pali naramo parami.