SAMU.
119.
Nambame embena mawa pii dupwa mona nyepala yuu peparae kaeya nao suu pyao karo. 
Embena mawa pii doko yuu peparae namba keta silyamo dokona dokome nambana yanda pimwai pipya namba nyuo mona palenge inginyi pyambulyamo. 
Nambame embena dopa pinya dapa pinya lao mana lenge dupwa poraiyuo suu pyao minyapu dokona mana lenge dupwa pipya mee mende ulipili ingyuo soo karo. 
Nambame embena mawa pii doko kamba laa nao karapala dokome akali andapae karaminyi dupwana nambana soo nyingi renge doko andake ingyuo palipyamo karo. 
Emba suu pingi doo minyalana suu pyapala Satanena kata dupwa wasinyi nembo karo. 
Emba rangeme namba mana langilini dokome embena mawa pii dupwa soo nemba nalyo. 
Embena pii doko nakanju sipunupa amburali ipwangena rende dupwa nyuo isa palyuo silyamo. 
Nambame embena lowana soo nyingi renge soo nyipundeme kata koo dupwa epe kanda nalyo. 
Embena pii doko lambeme pinginyili pyuo namba kata lasaka pingi. Dopa pyuo namba pelyono dokona kendali ingyuo namba rao lanyuo penge. 
Nambame embena mana pii rolae doko rape rape lao minyuo yaki nyii naroŋo lao pii lalu lao lenge ingyuo andakena palyuo lao retapunu pilyamo. 
Namba kopeta kapeta randa nyilyu dokona Kamongo embame namba lete nyero lao lao kaene dokona palyuo pipi. 
Nambana sangyu lao leto pii doko Kamongo embame soo nyepala embena mawa pii dokona mana langipi. 
Randa ipyamo dokona mee mona kumapala pyuo karo. Embame lowadoko kame see nao pyuo karo. 
Akali koo dupwame nambapa randa jinya puu anga retaminyipape nambame embena mawa pii doko kamba laa nalyo. 
Embena mawa pii dupwa namba rangena ingyuo minyuo karalu kararo. Mawa pii dupwa nambana monarena raeme kumunginya renge doko ingyuo silyamo. 
Nambame embena mawa pii kuki dupwa rape rape lao minyuo paronopa kumarono dokopa otaraŋa lao suu pilyu. 
Embena mana pii dupwa kamame wakasa. Nambana monarename pii dupwa kamba laa nao karo. 
Embena mana lenge doko pano eŋa papala yakara pingi wambu dupwa soo nyingi renge maipinyipa soo karaminyi. 
Nambaembena mawa pii doko ipwa ingyuo nano pipyasa suwa ingyuo make make lyepala nanumi kumulyu. 
Embena mona retenge dupwa kando pingi dokosuu pyao namba lenge kambu joo sakame kumuo karape. 
Satanena kata dupwame namba nyuo anamasi minyuo isa nembena lao baa panda mai naro lalu lao leenyili pyuo mai napipi. 
Wambu namba keta randa jerami dokona kiiramo nyepe. Nyerenepa embena mawa pii dupwana rape rape lao piruwale. 
Embame namba eŋa nembapala embena lowa dupwa mana langipi. 
Wambu dupwame embena mawa pii doko minya namisa nambana ee doko ipwa ingyuo guu lao karapyamo karo. 
Kamongo emba rolaena renge dokona embena lowa doko rolaeyako ingyuo silyamo. 
Embena mawa pii kuki ingyuo lapo leene dupwa rolae dokona palyuo kapako ingyuo pelyamo. 
Nambana nyisu petenge dupwameemba lapinyi doko sili see nale lamisa imbu singi wakasa nyilyu. 
Namba embena lalu lao leene doko angi piraŋa doko soo kaepala mona nyuo karo. 
Namba embapa manda daa dokona nakamame namba kando ipyarami ingilya kande. Dopa pipyamopape embena mana piikuki ingyuo retenge dupwa yaki nyii nalyo. 
Embena rolaena renge dupwa mee kulisa pao sulu seramopa embena lowa dupwa yuu mendepape kyambo ingya nara. 
Namba keta randa renge simbuo sipyamosa mona randame kumulyu. Dopa pipunupape embena mawa pii dokome namba rae mainyi pyambulyamo. 
Embena mana langingi yulu dupwa katalunji nembo silyamo. Namba singinya renge jerenepa kararole lao pisilyu.