JONA.
2.
Oma dokona koko palyuo Joname banya Kamongo Anatu lao ateŋa piya. 
Ateŋa pyao dopa leya. O Kamongo namba keta randa ipyamo dokopa nambame emba pisapu dokopa embame isingi pyaka lao kumungi panda koko dokona palu nambame nyisa lao ee lapu dokopa embame nambana pii doko sipi. 
Embame namba nyuo koko isa pyambwapisa namba ipwa kota dokome koko kako pyapala nyuo yambe pyapya. 
Namba dopa lapu. Namba emba karene yuu doko yaki nyepala puu lapinyi dokona embena tembole anda poo pyasi keyange doko kamba kandarope daa? 
Ipwa kota dokome namba yambe pyalu pyao pyapya dokopa namba walu lapala kumalena pipu dee ipwa kota dokona isoko ipwa koko andenge dupwame nambana ayemba yaki pipya. 
Dopa pilyamo O nambana Kamongo Anatu namba lanyuo papala yuu kyau dupwana ama isarena kame kii palenge dokona saka nao kumungi panda dokona paleyo. Dopa piyunupape embame namba lete nyipi kandape, leya. 
O Kamongo namba repeta kumalena pipala dokopa emba suu pyao ateŋa lapu dokopa embena tembole anda poo pyasi keyange dokona karo sipi. 
Enda akalipi isa kanape kingimi wasapala anatu lao lakando karaminyi dupwa emba yaki nyuo kaelyaminyi. 
Dopa piminyipape nambame kenane pyao embena kingi minyalyuo bange rendamu pingi lapo yango jero. Pii lalu lao lapunuli pyuo piruŋu, leto. O Kamongo embame namwa pyuo lete nyingi renge jingi kandape, Joname dopa leya. 
Dokopa Kamongo dokome oma doko lamaiyuo, Jona baa kasinyi ipwa kota pete marenge dokona peena leyasa kasinyi peeya.