1 Na tastasik, onone ar atai mulo ana artabarla anuna Talngan Tabu, anasa a mang sur mulor talapor ono. 2 Mulo tasmani mang, ning belot mulo tortorot, di ben rongon pas mulo ana urmatana ngas, tetek a asasongo na godla, ning bel la sira warwara, pa mulo lotu tetek la. 3 I maining ar atongi tamulo larne, bel tik ning a Inguna e God ir nigoni, ir atong lar pasi mang, “E Iesu ir hirua tikin.” Pa bel tik ir atong lar pasi mang, “E Iesu a Leklek,” ning a Talngan Tabu bel i nigoni.

4 A urmatana ngas a artabarla, ika takai ka a Talngan Tabu, ning i tabar dala ono. 5 A urmatana ngas a titolla na harnangai, ika takai ka a Leklek, ning dala titol teteki. 6 A urmatana ngas a titolla, ika takai ka a God, ning i tol na titol ning, ting na lalaun anuna taraila rop.

7 A titol ana Talngan Tabu i hanot puasa ting na lalaun anunla taktakai, sur lar nangan a taraila rop. 8 A Talngan Tabu i tabar takai ana tastasim sur ir warwara onoi, pa a Talngan Tabu ning, i tabar takai otleng ana wakak a nuknuk sur ir warwara onoi. 9 Pa a Talngan Tabu ning, i tabar takai otleng ana tortorot, pa a Talngan Tabu ning, i tabar takai otleng ana artabar sur ir alangolango a tinsamanla. 10 Pa i tabar takai otleng ana rakrakai sur ir tol a ututnala na kulkulan, pa takai otleng ana warwara na propet. Pa i tabar takai otleng ana tastasim sur ir tasman lalan a Talngan Tabu pa na ingun masik otleng, pa takai otleng ana tastasim sur ir warwara ana urmatana ngas a warwara, pa takai otleng ana tastasim sur ir pak a kama urmatana ngas a warwara. 11 Takai ka a Talngan Tabu ning i tol na titol rop ne. Pa i tabar taktakai onla, arlar ana nuknukna ot.

12 A barsan i takai ka, ika a galis a didiah palaona. Na didiah palaona la galis, ika di apatap taum pas la sur takai a palaona. I mangotleng larning o e Karisito. 13 Anasa takai ka a Talngan Tabu i baptais dala rop, sur dala takai ka palaona e Karisito, dala a tarai Juda, pa dala ning bel a tarai Juda, dala na tena titol oros pa dala ning bel dala tena titol oros. Pa e God i saran takai ka a Talngan Tabu tetek dala rop sur dalar gang ono.

14 A palaon a barsan belsur takai ka diah palaona. A galis a didiah palaona ot. 15 Ning a hana ir atongi mang, “Bel iau a diah palaona, anasa bel iau a kuna,” i momol mang, belsur a kuna, ika, a diah palaona ot ning. 16 Pa ning a talngana ir atongi mang, “Bel iau a diah palaona, anasa bel iau a matana,” i momol mang, belsur a matana, ika a diah palaona ot. 17 Ning a kidol a palaona a matana rop ka, ir longor ma mangmangasa? Ning a kidol a palaona a talngana rop ka, ir isisong ma mangmangasa? 18 Ika e God ka suah taum tar a didiah palaondala rop taktakai, arlar ot ana nuknukna. 19 Ning a didiah palaondala rop la arlar ka, ir kidol ma mangmangasa? 20 Ika i mangot larning, a galis a didiah palaondala, ika takai a palaondala.

21 A matana bel ir atong sot pasi tan a kuna larne, “Bel a kapan u!”, pa pukulna otleng, bel ir atong sot pasi tan naur a hana mang, “Bel a kapan mu!” 22 Bel i manglarning! A didiah palaondala ning dala nuki mang bel la rakrakai, anunla a titol kaning ot. 23 Pa a didiah palaondala ning dala nuki mang bel la tatatai wakak, dala amermer wakak la. Pa a didiah palaondala ning dala meme onla, dala pipis alar la. 24 Pa didiah palaondala ning la tatatai wakak, bel la kapan sur ta utna. Ika e God ka suah taum tar a didiah palaondala, pa a didiah palaondala ning dala nuki mang bel la wakak ka saran tar a matatar tetek la. 25 I toli larne sur gong a palaondala i tapagal sarara. A didiah palaondala lar nangan artalai la, pa a harnangai ning, ir arlar tetek la rop. 26 Ning ta diah palaondala i kankan, a didiah palaondala rop lar kilangi taum onoi. Ning di atong aitna pas ta diah palaondala, a didiah palaondala rop lar gas taum onoi.

27 Mulo ot a palaona e Karisito, pa mulo rop taktakai a didiah palaona. 28 E God ka suah tar a taraila arpotor tan a tarai a lotu larne: a ningnigona ot na aposel, a munaurna na propet, a munatolna na tena asaer, pa la otleng ning la tol a ututnala na kulkulan, pa la ning la kibas a artabar sur lar alangolango pas a tinsamanla, pa la ning la nangan a taraila, pa la ning la sira nigon a taraila ana titolla, pa la ning la warwara ana urmatana ngas a warwara. 29 Mangasa, la rop na aposel ka? Bel. Mangasa, la rop na propet ka? Bel. Mangasa, la rop na tena asaer ka? Bel. Mangasa, la rop la tol a ututnala na kulkulan? Bel. 30 Mangasa, la rop la kibas a artabar sur lar alangolango pas a tinsamanla? Bel. Mangasa, la rop la warwara ana urmatana ngas a warwara? Bel. Mangasa, la rop la sira pak a kama urmatana ngas a warwara? Bel. 31 Ika, mulor mang kol sur na artabar ning i itna kol.

Onone ar asangan mulo ana ngas ning i wakak kol tanla rop.