A Ningnigo na Pas
ane
Pita
A warwara talapor nigo
A pas ne e Pita i tumusi. E Pita a hala ning a bonot pa pisir naur a kakak a asaer ane Iesu. I tumus a pas ne tetek a tarai a lotu ning la kes na wasira ting na hananuala. I kes tumo e Rom pa i tumus a pas ne. I atong e Rom e Babilon, a warwara larlar ana toltol mite na rakrakan hanua ning i bukus tumo e Rom.
A tena tortorotla la barat a galis a mamahat miting na matanitu anasa la tortorot o e Iesu. Ana pas ne, e Pita i mang sur ir arakrakai anunla a tortorot. I atai la ana nunla a tona lalaun o e Karisito, pa ana toltol ane Iesu, anasa e Iesu otleng i barat a mamahatla. I atai la otleng ana wakak a toltolla ning lar muri.
A tinan ana Ningnigo na Buk ane Pita:
A kamkama buk ne (1:1-2)
Dalar harnanai ana tortorot sur a lalaun tikin (1:3-12)
A totoh a lalaun (1:13-2:12)
A wakak a toltol ning dalar muri (2:13-3:7)
A tarai ane Karisito lar kilang a kankan (3:8-4:19)
Dalar anatarna pas dala (5:1-11)
A ararop a warwara ane Pita (5:12-14)
1
1 Iau e Pita, a aposel ane Iesu Karisito, a tumtumus tetek mulo ning e God ka aslang pas mulo sur mulo anunai, pa mulo kes sarara arlar ana wasirala tumo na paparla Pontas, Galesia, Kapadosia, Esia pa e Bitinia. 2 E God a Tamandala ka aslang pas mulo ning ka tasman nigon tar mulo, pa a Talngan Tabu i atotoh mulo, sur mulor longor tetek e Iesu Karisito, pa dir lamir mulo ana sulukna.
A marmaris pa bal molmol ir kes tetek mulo, pa ir itna bolos.
Dala harnanai ana tortorot sur a lalaun tikin
3 Dalar atong aleklek pas e God, a Taman anundala Leklek e Iesu Karisito. Ana nun a tnan marmaris, i agon tona pas dala. I maining dala harnanai ana tortorot sur a lalaun tikin, anasa e Iesu Karisito i kamtur ulak kusun a minat, 4 pa dalar kibas a utna ning e God ka sang tari saot na langit, a utna ning bel ir marase, bel ir laulau pa bel ir rorom. E God ka sang tari sur mulo.
5 Pa i tai alar mulo ana rakrakaina, anasa mulo tortorot onoi. Ir tai alar mulo tuk ana ararop a pukakiar ning ir alaun mulo. Pa ana nuna titol ning, ir apuasa asaning ka sang tari sur mulo. 6 A utna ne ir agasgas kol mulo. I momol ot, a urmatana mamahat ning mulo kilangi onone ir saran a bal maris ta mulo, ika bel ir bongnan la. 7 A mamahatla ne la hanot sur dir toho anumulo a tortorot, sur dir oroi i mang i momol o bel. Di toho anumulo a tortorot arlar onoi ning di tun atotoh a gol ting na iah. Ika anumulo a tortorot i itna kol tana gol ning ir rop ka. Pa ning anumulo a tortorot i tur rakrakai lamur tana larlarla, e Iesu Karisito ir rakan aleklek pas mulo, pa ir aitna pas mulo, pa ir saran a hanrawai tetek mulo ana pukakiar ning ir hanot puasa. 8 Tur pasi nating tuk onone belot mulo oroi i, ika mulo mang kol suri. Onone bel mulo oroi i, ika mulo tortorot onoi. Pa mulo bukus ana tnan gasgas ning bel dir pak sot pasi ana ta warwara, pa i bukus ana matatar. 9 Anasa e God ka alaun pas a ingumulo, ine a wana numulo a tortorot.
10 A propetla tagun nating la warwara na propet ana titol ane God ning ir alaun mulo, arlar ana artabar ning ir tabar mulo onoi. La tatatai suri, pa la rakrakai sur lar tasmani. 11 A Inguna e Karisito i kes onla, pa i atai nigon la ana mamahatla ning e Karisito ir kilangi, pa ana nun a matatar lamur. La tiktikin mang nangse momol, pa esi na barsan ning a utna ne ir hanot onoi. 12 E God i apuasai tetek a propetla mang a ututnala ne, bel ir hanot tetek la. La warwara ka ana ututnala ning e God ir toli tetek mulo. Pa onone, mulo ka longor tari kusun a tarai ning la warawai ana Wakak a Warwara tetek mulo ana rakrakai a Talngan Tabu esaning di sunei misaot na langit. Pa a ututnala ne, na angelo otleng la mang kol sur lar oroi i.
A totoh a lalaun
13 I maining mulor sang a nuknukimulo sur anumulo a titol, mulor warkurai tostos anumulo a lalaun, pa mulor harnanai ana tortorot momol sur a utna ning dir tabar mulo onoi ning e Iesu Karisito ir hanot puasa. 14 Mulo na natnat e God, ning mulo sira longor tana, gong mulo mur a laulau a nuknukla ning mulo sira toli nating, ning bel mulo mananos. 15 Mulor totoh ana numulo na toltol rop, arlar o esaning i kabah pas mulo i totoh. 16 Anasa di ka tumus tari ting na Buk Tabu mang, “Mulor totoh, anasa iau, a totoh.” Liwai 11:45
17 Mulo sira atong Tamamulo o e God. Pa i wakak ning mulor laun taum ana matmataut namatana, ana numulo a keskes a wasira te lapiu, anasa ir warkurai a taraila rop, ana ututnala rop ning la ka tol tari, pa bel ir purpurngis. 18 Mulo ka tasmani mang e God ka lou langolango pas mulo kusun na toltol orosla ka, ning mulo kibasi tana tamamulola. Bel i lou langolango pas mulo ana utna ning ir rorom ka, arlar ana silwa o a gol. 19 I lou langolango pas mulo ana wakak a sulukna e Karisito, esaning i arlar ana nat a sipsip ning i totoh pa bel ta tinsaman kaning onoi.* A tarai Israel la sira artabar tetek e God ana nat a sipsip ning i totoh pa bel ta tinsaman kaning onoi, sur e God ir kepsen anunla na toltol laulau. Oroi a Wok Pris 22:17-25. 20 E God ka aslang pasi nating ot ning belot i akes a rakrakan hanua, pa ana ararop a pukakiarla ne, ka hanot sur mulo. 21 O e Karisito, mulo tortorot o e God, ning i akamtur ulak pasi kusun a minat, pa i saran tar a matatar teteki. Larning mulo tortorot o e God pa mulo harnanai ana tortorot sur a utna ning ir toli lamur.
22 Pa onone, ning mulo ka longor ana momol a warwara, mulo ka totoh, sur mulor mang momol sur na tastasimulo ana tortorot. Larning mulor mang artalai sur mulo ana marmaris momol ting na balamulo. 23 Anasa di ka agon ulak pas mulo. Pa anumulo a tona lalaun, bel i kamna pas on tik mite lapiu, anasa tik mite lapiu ir rarop ka. Di agon tona mulo ana utna ning bel ir rarop, i a warwara ane God, ning i laun pa ir kes tikin.
24 I arlar larning di ka tumus tari ting na Buk Tabu mang, “A taraila rop la arlar ka ana wulai,
pa anunla na mermer i arlar ka ana purpur ning i sar.
A wulai ir marang, pa a purpur ir punga,
25 ika a warwara ana Leklek ir kes tikin.” Ais 40:6-8
Pa a warwara ne, i a Wakak a Warwara, ning di ka warawai tar onoi tetek mulo.
*1:19: A tarai Israel la sira artabar tetek e God ana nat a sipsip ning i totoh pa bel ta tinsaman kaning onoi, sur e God ir kepsen anunla na toltol laulau. Oroi a Wok Pris 22:17-25.