1 E Pol i tai tostos sur a tarai a kiwung, pa i atai la mange, “Na tastasik, tuk onone ia ka han tostos namatana e God, pa a balak bel i arup iau ana ta utna.” 2 Pa e Ananias a ningnigo na tena artabar tetek e God, i sune la ning la tur milau e Pol sur lar pasar a pahana. 3 Pa e Pol i atai i mange, “E God ir pasar u, u arlar ana ris a rumai di sabar tari ana kokok, ika tingui i laulau kol. U kes sur ur warkurai iau arlar ana Warkuraila, ika u kutus a Warkuraila ning u arsune sur dir pasar iau.” 4 La ning la tur milau i la atongi mange, “Mangasa, u asa u, sur ur atong laulau a ningnigo na tena artabar tetek e God?” 5 E Pol i keles la mange, “A tastasikla, bel a tasmani mang i a ningnigo na tena artabar tetek e God, anasa di ka tumus tari ting na Buk Tabu mange, ‘Gong u atong laulau ta ningnigo ana num a taraila.’ ” Kisim Bek 22:28

6 Ning e Pol i tasmani mang dingla na tarai tagun la, a Sadusila, pa dingla a Parisaiola, i kukuk ting na kiwung mange, “A tastasikla, iau a Parisaio, pa a nat a Parisaio, onone di arup iau kamna ana nuka tortorot ana lalaun ulak kusun a minat.” 7 Ning ka atong tari larning, a Parisaiola pa a Sadusila la turpas a arlak, pa a kiwung i taptapagal. 8 Anasa a Sadusila bel la tortorot ana lalaun ulak kusun a minat, pa angelola, pa motla, ika a Parisaiola la tortorot on ditol rop. 9 Pa la turpas a tnan arbalakut, pa dingla na Parisaiola, la ning a tena asaerla ana Warkuraila, la tur, pa la arlak kol, pa la atongi mange, “Bel mila pastek ta laulau a utna ning a barsan ne i rongo ono. Sakana ta mot, pa ta angelo kar awarwara tari.” 10 Ning a arlak ka itna pa la turpas a harum, a tnan ningnigo anuna tena harumla i matmataut, sakana lar dat kakahal e Pol. I sune a tarai a harum, sur lar han pa lar dat pasi kusun a taraila, pa lar beni usaot na rumai anuna tarai a harum.

11 Ana morom ning, a Leklek i hanot tetek e Pol, pa i atai i mange, “Gong u matmataut, ur tur rakrakai. U ka warwara talapor tar hok te e Jerusalem, mangotleng larning ur warwara talapor hok tumo e Rom.”

12-13 Ana kabakiar kobot ulak, dingla na te Judala, i arlar ona diat a bonot pa i apapisir, ning la warwara taum sur lar lele, mang bel lar hangan, pa bel lar gang, tuk ot ning lar umkol tar e Pol. 14 La han tetek a leklek a tena artabarla tetek e God, pa a ningnigola tagun a lotu, pa la atongi mange, “Mila ka lele tar mang bel milar ien ta utna tuk ot ning milar umkol tar e Pol. 15 Mila mang sur mulo pa a tarai a kiwung, mulor saran a warwara tetek a tnan ningnigo anuna tena harumla pa mulor asongo pas e Pol kusuni, sur ir sune i tetek mulo. Mulor atongi mang mulo mang sur mulor longor ta warwara talapor ulak tana. Pa mila ka sang sur milar umkoli ting na ngas ning bel ot ir hanot tetek mulo.”

16 Ning a etna ane Pol i longor a pinpidaiwol ne, i han sur a rumai anuna tena harumla, pa i atai e Pol ono. 17 Pa e Pol i kabah pas ning a ningnigo ana tena harumla, pa i atai i mange, “Ur ben a barman ne tetek anumulo a tnan ningnigo, anasa i mang sur ir atai i ana ning a warwara.” 18 Pa i beni tetek a tnan ningnigo, pa i atai i mange, “E Pol, ning i dodot, i arsune sur iau, pa i nunung iau sur ar ben tar a barman ne tetek u, anasa i mang sur ir atai u ana ning a warwara.” 19 A tnan ningnigo i tong pas a kuna pa i ben masik pasi, pa i dekeni mange, “Asa ning u mang sur ur atai iau ono?” 20 Pa i atongi mange, “A tarai Juda la ka pinpidaiwol pas sur lar asongo pas e Pol kusun u, sur ur tulani latu tetek a tarai a kiwung, sur lar longor ta warwara talapor ulak tana. 21 Gong u longor tanla, anasa diat a bonot pa i apapisir, la mumun suri. La ka lele tar mang, bel lar hangan pa bel lar gang, tuk ot ning lar umkol tar e Pol. Pa la harnanai kama sur ur malmaling.” 22 Pa tnan ningnigo i atumarangi mang, “Gong u atai tar tik mang u ka atai tar iau ana utna ne.” Pa lamur i sune seni.

23 A tnan ningnigo anuna tena harumla, i kabah pas naur a ningnigo teteki pa i atai diau mange, “Mur sang naur a mar a tena harum, pa mais a bonot a tena harum ning la kas ana hosla, pa naur a mar a tena harum ning la los a turaila, pa mulor han ana siuk a matana kamis onone na morom uto e Sisaria. 24 Mur ben ir naur a hos, sur e Pol ir han ono. Mulor tai alar wakaki tuk mulor hanot onoi tetek e Feliks, a tnan ningnigo ana matanitu.” 25 Pa i tumus a pas mange teteki:

26 Iau e Klodius Lisia, a tumtumus tetek u Feliks, a tnan ningnigo ana matanitu.

A marmaris tetek u.

27 A barsan ne a sune i tetek u, a tarai Juda la tong akes pasi, pa milau lar umkoli. Ika mila pa a tena harumla, mila hanot, pa mila alaun pasi, anasa ia ka tasman tari mang i a te Rom. 28 Pa a mang sur ar tasman asaning di arupi ono, pa a ben tari ana nunla kiwung. 29 Onone a talapor onoi mang di arup orosi ka ana toltol ana warkuraila tagun anunla na lotu, ika bel i tol ta laulau a utna sur ir dodot ono, pa dir umkoli ono. 30 Ning di atai iau ana pinpidaiwol sur a barsan ne mang lar umkoli, a sune kapiti tetek u. Pa a atai la ning la arupi, sur lar atalapor anunla na ararup tetek u. Ai ka i ning. Ka rop.

31 Pa a tarai a harum la ben pas e Pol ana morom uto e Antipatris, larning di atai tar la. 32 Ana pukakiar lamur, a tarai a harum ning la kas ana hosla, la bolos taum o e Pol, pa a tarai a harum otleng la ulak usaot e Jerusalem. 33 Ning la hanot ting e Sisaria, la saran tar a pas tetek e Feliks, a tnan ningnigo ana matanitu, pa la saran tar e Pol ana kuna. 34 Ning e Feliks ka was tar a pas, i deken e Pol mange, “U tagun esi na papar?” Pa ning ka tasman tari mang e Pol a te Silisia, 35 i atai i mange, “Ning a tarai a ararup lar hanot ute, ar longor a utna ning lar arup u ono.” Pa i arsune sur dir tai alari ting na rumai ane Herot.