1 E Iesu i atai anuna kakak a asaerla mang, “Ning a tena gongon, anuna ning a tena titol i tai alar anuna ututnala, pa di tiu i mang i tol oros ka ana ututnala ana ningnigo anunai. 2 A tena gongon i kabah pasi, pa i dekeni mang, ‘Asa ne a longori hom? Ur tumus a warwara talapor ana numa titol na tai alar pa ur sarani tak, anasa bel ur tena tai alar ulak ma anuki.’ 3 Pa a tena tai alar ning i nuki mang, ‘Asa ning ar toli, ning anuka leklek ir kepsen tar iau kusun a titol ne? A palaok bel i rakrakai sur a kekel, pa ar meme otleng sur ar nunung utna. 4 I maining, a nuk pas ning a utna sur ar toli, sur a tarai lar gasgas pas iau ot ana nunla na rumaila, ning dir kepsen iau kusun a titol ne.’ 5 Pa i arsune sur la rop ning la ka dinau pas tana nuna leklek. Pa i deken a ningnigo na barsan mang, ‘Naisa ning u dinau pasi tana nuka leklek?’ 6 Pa i kelesi mange, ‘Takai a mar a tatatnan koto na wel a oliw.’ Pa a tena titol i atai mang, ‘Ur los pas anuma paka buk a dinau. Ur kes pa ur tumus kapit tar dilima na bonot ka onoi.’ 7 Pa i deken ulak takai, ‘Naisa ning u dinau pasi?’ Pa i kelesi mange, ‘Takai a mar a bek a wit.’ Pa i atai i, ‘Ur los pas anuma paka buk a dinau. Ur tumus tar siwal a bonot ka onoi.’

8 “Anuna ningnigo i tasmani mang a laulau a tena titol ne bel i momol ana nuna titol, ika i aleklek pasi anasa i tastasman kol sur ir alah kusun a mamahat. Anasa a taraila mite na rakrakan hanua, la tastasman kol ana urmatana ngas ana nunla na titol, ika a taraila miting na talapor bel la tastasman kol onoi. 9 A atai mulo, mulor amoro pas al halalimulo ana gongon mite na rakrakan hanua, sur ning ka rop, e God ir gasgas pas mulo ana rumaila ning lar tur tikin pa bel lar rarop.

10 “Esining i momol ana natar a utna ka, ir momol otleng ana tnan utna, pa esining bel i momol ana natar a utna, bel ir momol otleng ana tnan utna. 11 Ning bel mulo momol sur mulor tai alar wakak a ututnala mite lapiu, esi ir tortorot o mulo sur mulor tai alar a ututnala misaot? 12 Ning bel mulo momol ana ta utna anun tik, esi ir saran ulak anumulo na ututna tetek mulo? 13 Bel ta tena titol ir titol lar pas tetek ir naur a ningnigo. Ir nget ning a halindiau, pa ir mang sur ning a halindiau, ir katnan ning pa takai ir saran a kaba hina kusuni. Bel mulor titol lar pas tetek e God pa tetek a mani otleng.”

14 A Parisaiola la longor a warwarala ne, pa la morot o e Iesu, anasa la mang sur a mani. 15 Pa e Iesu i atai la, “Mulo, mulo atostos pas mulo namatana taraila. Ika e God i tasman a balamulo. Anasa a utna ning i ngangaten namatana taraila i bilbilor namatana e God.

16 “A Warkuraila pa a asasaerla anuna propetla i tuk tar o e Jon. Turpasi ana pukakiarla ning, mila warawai ana Wakak a Warwara ana matanitu ane God pa a taraila rop la ngongos sur lar kas tingia. 17 A langit pa a rakrakan hanua bel i ngangaten sur diar rarop, ika bel ta dia warwara ir rarop kusun a Warkuraila.

18 “Ning tik ir kepsen anuna hane pa ir taulai ta hane ulak, a barsan ning i tol a toltol laulau. Pa esining i taulai ta hane ning anuna barsan i kepsen seni, i otleng i tol a toltol laulau.

19 “Ning a gongon a barsan, i mermer ana wakak a kaenla, pa i sira tol a ngasa ana pukakiarla rop. 20 Di aborbor tar takai a barsan a tena nunung utna ting na taman tana, a risana e Lasarus, a palaona i masmasik. 21 I mang sur ir ien a mumut a utna na hangan ning i punga miting na logo na hangan anuna leklek. Pa a papla la damdam otleng a masmasikla ting na palaona.

22 “Lamur a tena nunung utna i mat, pa a angelola la los pasi pa la akesi ting na ris e Abaram. Pa a gongon a barsan kale i mat, pa di por seni. 23 Pa i kes ana tnan iah. I kankan kol a palaona pa i tandai usaot, i oroi e Abaram i bakbak kol, pa e Lasarus otleng ting na risna. 24 Pa i arkabah mange, ‘Tata Abaram, ur maris iau, ur sune e Lasarus sur ir tuk pas al siklik malum ana pitlai a kuna sur ir akotkoto tar a laigerek onoi, anasa a kilang a tnan kankan kol te na iah.’

25 “E Abaram i kelesi mang, ‘Natuklik, ur nuk pasi, ning kaning ot u laun, u kibas anuma wakak a ututnala, pa mang otleng larning tetek e Lasarus, i kibas a laulau a ututnala. Ika onone, i kibas a gasgas, pa u, u kilang a tnan kankan kol. 26 Ning a utna otleng, a tnan lawa kane na arpotor in dala. Bel tik mite ir tolsot pasi sur ir han uting tetek mulo, pa bel tik otleng miting ir tolsot pasi sur ir han ute tetek mila.’

27 “Pa a tena gongon ning i atongi mange, ‘Tata, a nunung u sur ur sune e Lasarus uting na rumai ane tata. 28 Anasa dilima na tastasik barsan la kaning ia, pa ir atumarang tar la, sakana la otleng lar han ute na hanua na kankan ne.’ 29 Pa e Abaram i kelesi mange, ‘A warwara ane Moses pa a propetla kaning i kes taum onla. I wakak sur lar longori.’ 30 A tena gongon ning i atai i mang, ‘Bel, Tata Abaram, ning tik ot tagun a minat ir hanot tetek la, lar lingir a nuknukinla.’ 31 Pa e Abaram i kelesi mang, ‘Ning bel la longor e Moses pa a propetla, bel tik otleng, ning ir kamtur kusun a minat ir atur lar pas anunla tortorot.’ ”