4
E Satan i lar e Iesu
(Mk 1:12-13; Lk 4:1-13)
1 Lamur a Talngan Tabu i nigon e Iesu uting na hanua bel sur e Satan ir lari. 2 Ning ka tamai pas diat a bonot a pukakiar a morom pa diat a bonot a pukakiar a kabakiar, i murak. 3 Pa a tena alam i hanot teteki, pa i atongi tana mang, “Ning u a Nat e God, ur atai a hatatla ne sur lar hanot a bret.” 4 E Iesu i kelesi mange, “Di ka tumus tari ting na Buk Tabu mang, ‘A tarai bel la laun ka ana utna na hangan, la laun ana warwarala rop ning i purum kusun a pahana e God.’ ” Lo 8:3
5 Lamur e Satan i ben pasi usaot e Jerusalem, a hanua ane God, pa i atur tari sot ot na pukul a rumai a artabar. 6 Pa i atongi tana mang, “Ning u a Nat e God, ur sirok purum, anasa di ka tumus tari ting na Buk Tabu mang,
‘Ir sune anuna angelola sur lar tai alar u.
Lar tong pas u ana kunla,
sur gong u buh a ham ana ta hat.’ ” Buk Song 91:11-12
7 E Iesu i kelesi mang, “Di ka tumus tari otleng ting na Buk Tabu mang, ‘Gong u lar a Leklek anuma God.’ ” Lo 6:16
8 E Satan i ben ulak pasi usaot lamagit ana tnan mangir, pa i asangan tar a hananuala rop ana rakrakan hanua pa a matatarinla rop otleng tana. 9 Pa i atongi tana mang, “Ning ur kes ana bokona ham pa ur lotu tetek iau, a ututnala rop ne ar sarani tam.” 10 E Iesu i atongi tana mang, “Satan, ur han masik, anasa di ka tumus tari ting na Buk Tabu mange, ‘Ur lotu tetek a Leklek anuma God, pa ur longor ka tana.’ ” Lo 6:13
11 Lamur e Satan i han pas kusuni, pa a angelola la han teteki, pa la nangani.
E Iesu i turpas anuna titol a warawai ting na papar Galili
(Mk 1:14-15; Lk 4:14-15)
12 E Iesu i longori mang, di ka akas tar e Jon uting na rumai a dodot, pa i ulak utumo na papar Galili. 13 Pa i han mitumo e Nasaret, i kes tingia e Kapernaum, a hanua ning i kes ting na hang napir a puka tasi Galili, ana piu anuna mangis a tarai Sebulon pa mangis a tarai Naptali, 14 sur ir tolsot pas a warwara ane God ning a propet Aisaia ka warwara nigo tar onoi mang,
15 “A piu anuna mangis a tarai Sebulon pa a piu anuna mangis a tarai Naptali,
milau a ngas ning i han utumo latasi, ana ris a malum Jodan utumo,
dia kes ting na papar Galili, ning a tarai ning bel a tarai Juda la kes ia.
16 A tarai ning la kes ana mormorom
la ka oroi a tnan talapor,
pa la ning a mormorom a minat i poroi alar la,
a talapor ka hanot tetek la.” Ais 9:1-2
17 Turpasi ana rau ning, e Iesu i warawai mang, “Mulor lingir a nuknukimulo, anasa a matanitu misaot na langit ka milau.”
Diat a kakak a asaer ning e Iesu i kabah nigon pas la
(Mk 1:16-20; Lk 5:1-11)
18 Ning a pukakiar e Iesu i asal ana hang ana puka tasi Galili, pa i oroi tetek e Saimon, di atongi otleng o e Pita, pa e tasnalik e Endru. Dia minggen a uben tisa latasi, anasa diau naur a tena minggen uben. 19 I atongi tandiau mang, “Mu lamut, mu mur iau, sur ar asaer mu sur mu naur a tena ben tarai.” 20 Ono otning, dia kamtur pas kusun a ubenla, pa dia muri.
21 Ning i han mitingia, i oroi pas maleng naur a tas, e Jems pa e Jon, naur a nat e Sebedi. Latamana kes tar ting na mon pa ditol suk anunditol a ubenla. Pa e Iesu i kabah diau. 22 Ono otning, dia kamtur pa dia han kusun a mon pa e tamandiau, pa dia mur e Iesu.
E Iesu i alangolango a tinsamanla
(Lk 6:17-19)
23 E Iesu i han taltal ting na papar Galili rop, pa i asaer a tarai ting na nunla na rumai a lotula. I warawai ana Wakak a Warwara ana matanitu misaot na langit. Pa i alangolango pas a taraila kusun a urmatana ngas a tinsamanla rop. 24 Pa a warwara o e Iesu i han sarara ting na papar Siria rop. Pa la ben rop pas a tarai ning a urmatana ngas a tinsaman i alaulau la, a tarai ning a rakrakai a kankan i alaulau la, pa la ning a motla kaning onla, la otleng ning la sira mat lalang pa la ning a palaonla i mat. Pa e Iesu i alangolango pas la rop. 25 Pa a tnan kunum a tarai mitisa na papar Galili pa miting na papar Dekapolis, pa misaot e Jerusalem, pa misaot na papar Judia pa mitumo na ris a malum Jodan la mur e Iesu.