15
A tarai la anatarna pas a warwara ane God
(Mk 7:1-13)
1 Dingla na Parisaio pa tena asaerla tagun a warkurai la han misaot e Jerusalem tetek e Iesu, pa la dekeni mang, 2 “I mangasa sur anuma kakak a asaerla bel la sira mur a asasaerla ana nundala a tarai tagun nating? Bel la gos nigon pas a kunla ning la hangan.” 3 Pa i keles la mang, “Sur asa ning bel mulo mur a warkurai ane God? Mulo mur ka a asaerla ana numulo a tarai tagun nating. 4 Anasa e God i atongi mang, ‘Ur hanrawai e tamam pa e tnam,’ Kisim Bek 20:12
pa i atongi otleng mang, ‘Esining ir warwara laulau o e tamana pa e tana, dir umkoli.’ Kisim Bek 21:17
5 Ika mulo, mulo asaer a tarai mang, i wakak ka ning tik ir atongi ta e tamana pa e tana mang, ‘Asaning ar nangan mu ono, ia ka saran tari tetek e God.’ 6 Ika ning bel i nangan e tamana, bel i hanrawai i. Ning mulo toli larning, mulo anatarna pas a warwara ane God sur mulor mur ka a asaerla ana numulo na tarai tagun nating. 7 Mulo na tena asasongo. A warwara ane Aisaia i momol ot, ning i warwara na propet nigo tar o mulo mang,
8 ‘A tarai ne la hanrawai iau ka ana pahanla,
ika a balanla i bakbak kol kusun iau.
9 La lotu oros ka tetek iau,
anasa la asaer ka ana warkuraila anuna tarai.’ ” Ais 29:13
A ututnala ning ir adur a tarai namatana e God
(Mk 7:14-23)
10 E Iesu i kabah a kunum a tarai teteki, pa i atongi mang, “Mulor longor iau pa mulor talapor ana nuk a warwara. 11 Asaning ir kas uting na pahana barsan, bel ir aduri namatana e God. Ika, asaning i atongi ana pahana, i ning ir aduri namatana e God.”
12 Lamur anuna kakak a asaerla la han teteki pa la dekeni mang, “U ka tasmani mang a Parisaiola la bal mamahat ana num a warwara?” 13 I keles la mang, “A rakaila ning e Tata, ning i kes saot na langit, bel i oman la, dir gat arop sen la. 14 Mulor noren sen a Parisaiola. La a ningnigola, la arlar ka ana kutla. Ning ta kut ir ben ta kut, dia rop diar punga lorong ting na tung.”
15 Pa e Pita i atai i mang, “Ur pak a warwara larlar ne tetek mila.” 16 Pa e Iesu i kelesi mang, “I mangasa mulo otleng belot mulo talapor? 17 I mangasa bel mulo tasmani mang, a ututnala rop ning i kas ting na pahana tik, i kas ting na balana pa i apurum ulak seni? 18 Ika a warwarala rop ning i atongi ana pahana, i purum miting na nuknukna, i ning ir aduri. 19 Ine a ututnala ning i sira purum miting na nuknukna: a nuknuk laulau, umkol a mainla, a toltol laulau ana ta hane anuna tik o ta barsan anuna tik, na toltol a pamuk, a kinkinau, a artitiu asasongo, pa di anan saksakan tik. 20 A ututnala ne la adur a tarai. Ika ning la hangan pa bel la gos nigon pas a kunla, bel ir adur la namatana e God.”
A tortorot ana hane ning belsur a hane Israel
(Mk 7:24-30)
21 E Iesu i han mitingia, pa i hanot milau a hanua Tair pa e Saidon. 22 Ning a hane Kenan miting na papar ning, i hanot pa i kabah e Iesu mang, “Leklek, a Nat e Dewit ur maris iau. A natuk hane, a mot kaning ono, pa i sira alaulau i.” 23 Ika e Iesu bel i kelesi. Anun kakak a asaerla la han teteki, pa la atai rakrakai i mang, “Ur sune seni, anasa i woiwoi tumo lamur tandala.”
24 E Iesu i keles la mang, “E God i sune sen iau ute sur a tarai Israel ka, ning la rongo lar a sipsipla.” 25 Ika a hane ning i han tetek e Iesu, i kes ana bokona hana salanigo tana pa i atongi tana mang, “Leklek, ur nangan iau.” 26 Pa e Iesu i kelesi mang, “Bel i tostos sur dir los a utna na hangan ana kakakla, pa dir minggeni tana papla.” 27 A hane ning i kelesi mang, “Leklek, a momolna ot ning. Ika, a papla otleng la sira ien a mumut a utna na hangan ning i sira punga miting na logo na hangan anuna tamtamanla.” 28 Pa e Iesu i kelesi mang, “Lak, i itna kol anuma tortorot! A utna ning u mang suri, ar toli ot tetek u.” Pa ana puka kamis ot ning, e natnalik i langolango.
E Iesu i alangolango a tinsamanla
29 E Iesu i han mitingia, pa i asal amon tumo na hang ting na puka tasi Galili. Lamur i han kas usaot na mangir pa i kes. 30 Pa a tnan kunum a tarai la han teteki. La ben la ning a hanla i mat, pa na kut, na pio, na ngat, pa a galis a tinsaman otleng teteki. Pa la aborbor tar la napirna, pa i alangolango pas la. 31 A kunum a tarai la oroi na ngat la warwara, pa na pio la langolango, pa la ning a hanla i mat la han tostos, pa a kutla otleng la tai. La kulkulan kol pa la rakan aleklek pas e God anuna tarai Israel.
E Iesu i tabar diat a rip a tarai
(Mk 8:1-10)
32 E Iesu i kabah pas anuna kakak a asaerla teteki pa i atongi tanla mang, “A maris kol a taraila ne, anasa la ka kes taum hok te natol a pukakiar, pa belal utna sur lar ieni. Bel a mang sur ar sune oros sen la taum ana munurak, sakana lar suah mat ting na ngas.” 33 Anuna kakak a asaer la atai i mang, “A pukna ne, belal tarai ono. Mitaha ma al utna na hangan sur dalar tabar a kunum a tarai ne ono?” 34 E Iesu i deken la mang, “Naisa a bret kaning mulo losi?” La kelesi mang, “A mais a bret pa a siklik nanatar a sis.”
35 Pa i atai a kunum a tarai sur lar kes ting na piu. 36 I kibas pas mais a bret pa naisa na sis ning, i atong wakak pas onoi tetek e God, pa i tibiki pa i sarani tetek a kakak a asaerla sur lar tabar a taraila ono. 37 A tarai rop la hangan pa la masur. Lamur a kakak a asaerla la song bukus pas mais a rat ana mah a utna na hangan. 38 A wawas ana tarai ka i arlar ana diat a rip, ika a gurarala pa kakakla otleng la hangan taum onla.
39 Lamur e Iesu i sune sen a kunum a tarai, i kas uting na mon, pa i han utumo na papar Magadan.