7
Di suah tar a akinalang ana 144 a rip miting na tarai Israel
1 Lamur tana, a oroi diat a angelo la tur ting na diat a matmatana wuwu te na rakrakan hanua. La tong alar pas diat a matmatana wuwu sur gong la wus a hananuala, pa na puka tasi, pa na rakai. 2 A oroi pas ning angelo kaleng i hanot miting namatana tobar pa i tong pas a akinalang ane God, esaning i laun. I arkabah ana tnan elngena tetek diat a angelo ning di ka saran tar a rakrakai tanla sur lar alaulau na hanua pa puka tasi. 3 I atongi larne, “Gong mulo alaulau na hanua, pa puka tasi pa na rakai, tuk ning milar suah tar a akinalang ting na patar a tena titol orosla ane God anundalai.” 4 Pa longor a wawasinla ning di ka aslang tar la, kane la: 144 a rip miting na mangis a tarai Israel rop.
5 Di ka aslang tar 12 a rip miting a mangis a tarai Juda,
12 a rip miting a mangis a tarai Ruben,
12 a rip miting a mangis a tarai Gat,
6 12 a rip miting a mangis a tarai Aser,
12 a rip miting a mangis a tarai Naptali,
12 a rip miting a mangis a tarai Manase,
7 12 a rip miting a mangis a tarai Simion,
12 a rip miting a mangis a tarai Liwai,
12 a rip miting a mangis a tarai Isakar,
8 12 a rip miting a mangis a tarai Sebulon,
12 a rip miting a mangis a tarai Josep,
12 a rip miting a mangis a tarai Benjamin.
A kunum a tarai la lotu tetek e God
9 Lamur tana, a tai, pa a oroi pas a tnan kunum a tarai ning bel tik ir was lar pas la. A tarai miting na matanitula rop, pa miting na mangis a taraila rop, pa miting na hananuala rop pa miting na urmatana ngas a warwarala rop, la tur salanigo na keskes a king pa Nat a Sipsip. La mermer ana kokok a kaenla, pa la tong a paka baibaila. 10 La woiwoi ona tnan elngenla larne,
“E God anundalai,
esaning i kes ting na keskes a king
pa Nat a Sipsip,
dia alaun pas dala.”
11 Na angelo rop la tur talilis pas a keskes a king pa na ningnigo pa diat a lalaun na akakes. La punga hanrawai ana matanla ting na piu salanigo na keskes a king, pa la lotu tetek e God, 12 la atongi mang,
“Amen!
Dalar atong aitna pas e God anundalai, dalar aitna pasi, dalar atong wakak teteki pa dalar hanrawai i.
I tong akes a tastasmai, pa warkurai pa rakrakai,
bel ir rop, pa bel ir rop.
Amen!”
13 Pa takai a hal a ningnigola i deken iau mang, “Esi la ne la mermer ana kokok a kaenla? Pa la han mitahaia?” 14 Pa kelesi mang, “Leklek, u ot u tasmani.” Pa i atongi tak mang, “La ne, la ning la ka laun ot miting na tnan kankan ning i monong la. La ka gos kokok pas anunla na kaen ana suluk a Nat a Sipsip. 15 Manglarning,
la tur salanigo na keskes a king ane God,
la titol teteki ting na nuna rumai a artabar
ana kamisla pa moromla.
Pa esaning i kes ana keskes a king ir pol alar la sur lar kes taum onoi.
16 Bel lar murak,
pa bel lar mos ulak ma.
Pa a kamis bel ir alaulau la,
pa bel ta utna otleng ir rang sakan la.
17 Anasa a Nat na sipsip ning i kes na arpotor a keskes a king, ir hanot anunla a tena tai alar.
Ir nigon la sur na matmatana malum a lalaun.
Pa e God ir sah sen na luru matanla rop.”