9
E Pol i bal maris sur anuna tarai
1 Bel a asongo, a atong ot a momolna ne namatana e Karisito. Pa a Talngan Tabu taum ana balak dia malmaling mang a warwara ne i momol. 2 A nuknukik i mamahat kol, pa anuka bal maris bel i manah. 3 Ngandek ning ar tolsot pasi, a mang sur ar tur keles anuka tarai, a tarai Israel, pa dir suah tar anunla warkurai na arkeles hok, pa dir kepsen iau kusun e Karisito, sur dir alaun pas la. 4 La a tarai Israel, ning e God i ras pas la sur la na natnatnala. I asangan tar anuna matatar tanla, i tol tar a kunubusla taum onla, i saran tar a Warkuraila tanla, i asangan tar la ana ngas na lotu momol, pa i lele tar tanla. 5 La na kaba tarai e Abaram, Aisak pa e Jekop. Pa ning e Karisito i hanot a barsan momol, i hanot onla. E Karisito i warkurai a ututnala rop, pa i ot e God. Dalar atong alekleki, onone pa lamur pa bel ir rarop. Amen.
A titol ane God tetek a tarai Israel
6 Ning a atongi larne, bel a atongi mang e God bel i tolsot pas anuna lele tetek a tarai Israel. Anasa bel a tarai Israel rop, la a tarai Israel momol namatana e God. 7 Pa bel otleng la rop ning la hanot o e Abaram, la na natnat e Abaram momol. E God i atai e Abaram mange, “La ka ning tagun a kaba tarai e Aisak, ning dir atong la mang anuma kaba tarai.” Stat 21:12
8 Bel la rop ning la hanot o e Abaram, dir atong la mang na natnat e God. La ka ning di agon la ana lele ane God, la ning e God i atong la mang na natnat e Abaram momol. 9 A lele ane God i mange, “Ning a pukakiar ir sot, ar ulak, pa e Sara kar agon pas a kaklik barsan.” Stat 18:10, 14
10 Bel i ka i ning, e Rebeka i agon pas a kasang, pa ning a tamandiau ka, e Aisak, a tubundala. 11-12 Ning belot di i agon e Esau pa e Jekop, e God i atai e Rebeka mange, “A ningnigo ir titol tetek a murmur.” Stat 25:23
A warwara ne i hanot ning naur a kaklik belot dia tol ta wakakna pa ta laulauna. E God i toli larning sur anuna aslang ir arlar ot ana nuknukna. E God i kabah pas esining i mang suri, bel ana ta titol ning ka tol tari. 13 Larning e God i atongi ting na Buk Tabu mang, “E Jekop a mang suri, ika e Esau a ngeti.” Mal 1:2-3
14 I maining asa dalar atongi? Mangasa, e God bel i tol a tostos a toltol? Gong dala atongi manglarning! 15 Anasa e God i atai e Moses mange,
“Ar maris tik ning a mang sur ar marisi,
pa ar tol a wakakna tana tik ning a mang sur ar tol a wakakna teteki.” Kisim Bek 33:19
16 I maining, ning e God i aslang pas a taraila, bel i kamkamna ana nuknukinla pa ana ta titol ning la toli. Anuna aslang i kamkamna ot ana nuna marmaris. 17 Larning di ka tumus tari ting na Buk Tabu mang, e God i atongi tetek a king mitimo e Ijip mange, “A suah tar u sur king sur ar asangan a rakrakaik ning ar tolsot pas u, pa sur a taraila rop ana rakrakan hanua lar tasmani mang iau ka e God.” Kisim Bek 9:16
18 I maining e God i maris a taraila ning i mang sur ir maris la, pa i arakrakai a balan a taraila, ning i mang sur ir arakakai a balanla sur gong la longor.
19 Sakana tik ir deken iau mang, “E God ot ning i arakrakai a balan a taraila, pa i mangasa ning i arup la? Bel tik ir sairas lar pas asaning e God i mang sur ir toli ting na nuna lalaun.” 20 Esi u ning u nuki mang ur keles a warwara ane God? U a barsan ka u. Ning tik i tol ta kuro ana piopap, mangmangasa, a kuro ning i topasi sur ir atongi tetek esaning i toli mang, “Asa kamkamna ning u tol iau larne?” 21 Ning a tena toltol kuro i mang sur ir tol ir naur a kuro tagun ning a diah piopap ka, ir mur ot a nuknukna. Ir tol ta wakak a kuro sur a tatatnan ngasala, pa tik otleng sur a pukakiarla oros ka.
22 Mangotleng larning e God i toli tetek a tarai. I mang sur ir asangan anuna balakut pa rakrakaina. Ika kaning ot i harnanai, pa bel i saran kapit a arkeles tetek a tarai ning la kes nahai a balakut anunai, la ning la ka sang sur lar hirua. 23 I toli larning sur ir asangan anuna tnan matatar tetek a tarai ning la kes nahai a marmaris anunai. La ning i sang tar la nating ot sur lar kes taum onoi ana nuna matatar. 24 Esi la? Dala ot, ning ka kabah pas dala. Mila ning tagun a tarai Juda, pa mulo ning tagun a tarai masik otleng. 25 I arlar ana warwara ane God ana tarai ning bel a tarai Israel, ning a propet Hosea ka tumus tari mang,
“A tarai ning bel anuki, ar atong la mang anuka tarai,
pa la ning bel a maris la, ar maris la.” Hosea 2:23
26 Pa e Hosea i atongi otleng mange,
“Ting na hanua ning nating e God i atong tari tanla mang,
‘Mulo bel anuka tarai,’
dir atong la mang ‘na natnat e God, ning i laun.’ ” Hosea 1:10
27 Ika ona tarai Israel, e Aisaia i warwara rakrakai mange,
“A tarai Israel la galis arlar ana woio tumo latasi,
ika a siklik tarai ka ning e God ir alaun pas la.
28 A Leklek ir tolsot rop pas anuna warkurai ting na rakrakan hanua,
ir tol kapit a warkurai na arkeles ning.” Ais 10:22-23
29 Larot ning e Aisaia i atong tari nating mang,
“A Leklek i rakrakai kol,
ngandek ning bel ir noren al tarai tagun anundala kaba tarai,
dala kar hirua rop arlar ana tarai miting e Sodom pa e Gomora.” Ais 1:9
A tarai Israel bel la tortorot
30 I maining asa dalar atongi ana ututnala ne? La ning bel a tarai Israel bel la rakrakai sur lar tostos namatana e God. Ika e God i atong la mang la tostos anasa ana nunla tortorot. 31 A tarai Israel la rakrakai sur lar atostos pas la ana mur warkurai, ika bel la tolsot pasi. 32 Asa kamkamna? Anasa bel la tortorot, la nuki ka mang lar tostos anasa ana nunla na wakak a titol. La buh a hanla ana hat ning la sira buh a hanla ono. 33 Larotning di ka tumus tari ting na Buk Tabu mang,
“Oroi! Ia ka suah tar a hat saot e Saion, a hat ning a tarai lar buh a hanla onoi,
pa lar punga onoi.
Ika tik ning ir tortorot onoi, anuna tortorot bel ir ame i.” Ais 8:14; 28:16