Luk.
24.
Ana kobot ning ot, ana ningnigo na pukakiar ana wik, a gurarala la han uting na kulam a minat, pa la los a ututnala ning i tomtoboh ning la ka sang pasi. 
Pa la oroi i ning di ka lakir sen tar a hat kusun a matana kulam a minat. 
La kas, ika bel ma la oroi a minat a Leklek e Iesu. 
Ning a nuknukinla i loklokron onoi, naur a barsan, anundiau naur a kaen i pil kol, dia hanot kulkulan tetek la. 
La matmataut pa la kes tudu, la suah purum a matanla ting na piu. Dia atongi tanla, “Sur asa ning mulo tai sur a lalauna te napir a minatla? 
Bel ma kane, ka laun ulak. Mulor nuk pas a warwara ning ka atong tari ta mulo, ning i kes ot tumo e Galili. 
I atong tari mang, ‘Dir saran tar a Nat a Barsan tetek a kuna laulau a taraila, pa dir sai ahati saot na rakai kutus, pa ana atol a pukakiar lamur ir laun ulak.’” 
Pa gurara ning, la nuk pas a warwara ane Iesu. 
Ning la ulak kusun a kulam a minat, la atatai ana ututnala rop ne tetek ning a bonot pa takai a kakak a asaerla pa tetek la rop otleng ning la sira mur e Iesu. 
A gurarala ning la atai a aposella ana ututnala ne, la ne: E Maria Magdalen, e Joana, pa e Maria e tana e Jems, pa dingla na gurara otleng ning la han taum on ditol. 
Ika a aposella la longor a warwara ana gurarala arlar ana warwara oros ka, pa bel la tortorot onla. 
Ika e Pita i tur, i dun sur a kulam a minat. I roh purum, pa i sidok pa i oroi a kaenla kama, la borbor masik tar. Pa i ulak, pa i nuknuk kol ana utna ne i hanot. 
Ana pukakiar ot ning, naur onla ning la sira mur e Iesu, dia han uting na hanua a risana e Imaus. A barah ana ngas ning i arlar ana ning a bonot pa takai a kilomita misaot e Jerusalem. 
Ning dia han amon dia warwara ana ututnala rop ne ka hanot. 
Ning dia warwara, pa dia deken artalai diau, e Iesu ot i hanot tetek diau, pa ditol han taum. 
Ika ning a utna i poroi alar pas a matandiau pa bel dia oroi lalan pasi. 
E Iesu i deken diau mang, “Asa ning mu warwara amon ono ting na numu a tinan?” Dia tur tar ka pa dia tatatai na bal maris. 
Pa ning a halindiau a risana e Kliopas, i dekeni mang, “Ngandek u ka esaning u kes saot e Jerusalem, pa bel u tasman a ututnala di toli saot ana pukakiarla ne?” 
Pa i deken diau, “A ututnala na sa?” Pa dia kelesi mang, “A ututnala o e Iesu a te Nasaret, a propet, ning i asangani mang i rakrakai ana nuna titolla pa anuna warwarala otleng, ana matana e God pa a taraila rop. 
A leklek a tena artabarla tetek e God pa anundala ningnigola la saran tari ana warkurai sur ir mat, pa di sai ahati saot na rakai kutus. 
Mila tortorot ono mang i ning ir alangolango e Israel. Pa onone otleng, ka natol a pukakiar alar a ututnala ning la toli. 
Ine otleng, dingla na gurara omila, la akulkulan mila. Ning la han kobot uting na kulam a minat, 
la tatatai panai tar sur a minatna. Ning la ulak la atongi mang la oroi tar naur a angelo ana tatatai, pa dia atai la mang ka laun ulak. 
Lamur dingla na tarai otleng omila, la han pas uting na kulam a minat, pa la oroi tar a utna manglarning a gurarala la atatai ono, ika bel la oroi e Iesu.” 
Pa e Iesu i atongi tandiau, “Mu longlong ka, bel mu tortorot kapit ana warwarala rop ning a propetla ka atong tari. 
La atongi mang a Karisito ir kilang a kankanla ne, pa lamur ir kas ana nuna matatar.” 
Turpasi ana bukla ane Moses pa a propetla, e Iesu i papak tetek diau ana ututnala rop di ka tumus tari onoi ot ting na Buk Tabu. 
Ning ditol han milau a hanua ning dia han sur uting ia, e Iesu i tohi sur ir han bolos ka. 
Pa dia sairasi, dia atongi mang, “Ur kes taum o miau, anasa ka rah, a kamis kamang ir sup ne.” I kas pa i kes taum on diau. 
Ning ditol kes sur ditol ar hangan, e Iesu i los pas a bret, i atong wakak pas ono, i kibik pasi, pa i tabar diau ono. 
Lamur, a matandiau i tapalas, pa dia bot oroi lalan pasi, pa i rorom pas kusun diau. 
Pa dia warwara artalai tetek diau mang, “I momol ot, a balandau i pirok ana gasgas ning i warwara tetek dau ning datol han ting na ngas, pa i pak tar a warwara na Buk Tabu tetek dau.” 
Ana pukakiar ot ning, dia kamtur pa dia ulak usaot e Jerusalem, pa dia han tetek ning a bonot pa takai a kakak a asaerla pa dingla na tarai otleng ning la kes taum. 
La atongi mang, “I momol ot! A Leklek ka laun ulak, pa ka hanot pas tetek e Saimon.” 
Lamur dia atatai ana sa ning i hanot tetek diau ting na ngas, pa ana nundiau a ororoi lalan ono ning i kibik a bret. 
Ning kaning ot dia warwara ana ututnala ne, e Iesu ot i tur potor tanla, pa i atongi mang, “A bal molmol tetek mulo!” 
La matmataut kol pa palaonla i suren ono, la nuki mang a inguna ka ning la oroi i. 
Pa i atongi tanla mang, “Sur asa ning mulo matmataut pa mulo urmatana nuknuk? 
Mulo oroi naur a kuk pa naur a hak. Iau momol ot ne. Mulor tuk iau, pa mulor oroi iau. A ingun belal palpalna, pa belal sursurna otleng. Ika mulo oroi i mang iau a palaok ot pa a sursurik otleng.” 
Ning ka atong tari larne, i asangan tar naur a kuna pa naur a hana tanla. 
La gas pa la kulkulan, ika belot la tortorot. Pa i deken la mang, “Bel ta utna kane sur ar ieni?” 
Pa la tabari ana dia sis ning di ka tun tari. 
Pa i los pasi, pa i ieni namatanla. 
Pa i atongi tanla, “Ning a kes ot taum mulo, ia ka atong tar a warwara ne tetek mulo mang: A ututnala rop ning di ka tumus tari hok, ana warkuraila ane Moses, ana warwara anuna propetla pa ana Saksakla dir tolsot pasi.” 
Pa e Iesu i atalapor a nuknukinla sur lar tastasmai ana Buk Tabu. 
I atongi tanla mang, “Di ka tumus tari mang, a Karisito ir hirua, pa ana natol a pukakiar lamur ir laun ulak kusun a minat, 
pa dir warawai ana risana tetek a taraila miting na matanitu rop, turpasi saot e Jerusalem. Dir warawai tetek la mang lar lingir a nuknukinla pa e God ir kepsen anunla na toltol laulau. 
Mulo a tena warwarala ana ututnala ne mulo ka oroi tari. 
Oroi i, ar sune sen esaning e Tata ka lele tar ono. Mulor kes ot te na hanua ne, tuk ning dir mermer tar mulo ana rakrakai misaot.” 
Lamur i ben purum pas la kusun a hanua Jerusalem, pa la hanot ting na ning a pukna milau e Betani, pa i tuslan tostos naur a kuna, pa i atong angis la. 
Ning kaning ot i atong angis la, i han kusun la, pa e God i los kas pasi usaot na langit. 
La lotu teteki, pa la ulak usaot e Jerusalem ana tnan gasgas. 
Pa la keskes tingui na rumai a artabar, la atong aleklek pas e God.