Aposel.
2.
Ning a pukakiar na Pentikos i hanot, a tena tortorotla rop la kes taum ona ning a rumai. 
Pa a rurung misaot ana langit ning i arlar ana rurung ona tnan wuwu, i hanot kulkulan tetek la, pa i abukus pas a rumai ning la kes ono. 
Pa la oroi a ututnala la arlar ana irnga na iahla, la han sarara pa la kes saot onla taktakai. 
Pa la rop la bukus taum ana Talngan Tabu, pa la turpas a warwara ana urmatana warwarala, ning a Talngan Tabu i sarani tanla. 
Pa galis a te Judala otleng la kes tisaot e Jerusalem, la na tena lotu miting na hananuala rop ting na rakrakan hanua. 
Ning la longor a rurung ne, la dun ot taum, pa i loklokron a nuknukinla onoi, anasa la taktakai la longor anunla na warwarala, ning a tena tortorotla la warwara ono. 
Pa la rop la kulkulan pa la nuknuk kol ana utna ne, pa la atongi mange, “Oroi, la ne, ning la warwara, a tarai Galilila rop ka! 
Asa kamkamna ning dala rop taktakai, dala longor lalan anundala na warwarala? 
Dala na te Partiala, a te Midiala, a te Elamla, pa dala mitimo na paparla ne Mesopotemia, Judia, Kapadosia, Pontus, Esia, 
Prigia, Pampilia pa e Ijip. Dala mitimo na papar Libia ning i milau e Sairini, pa dingla na tarai mitimo e Rom. Dala na tarai Juda pa dingla ondala ning la kas ana lotu Juda. 
Pa dala miting e Krit pa a papar Arebia. Dala rop dala longor la ning la warwara ana tatatnan titolla anun e God ana nundala na warwarala.” 
Pa la kulkulan, pa i loklokron a nuknukinla, pa la deken artalai la mang, “Dalar tasman mangmangasa a utna ne?” 
Ika dingla na tarai la morot onla, pa la atongi mang, “La gang a wain pa la laulau ono.” 
Lamur e Pita i tur taum ana ning a bonot pa pisir takai aposella, pa i warwara kol tetek a taraila mange, “Mulo a tarai Juda, pa mulo rop ning mulo kes te Jerusalem, ar atalapor a utna ne ta mulo, pa mulor longor wakaki. 
Mulo atongi mang la sipak. Ika bel, anasa i 9 kilok ot ne ana kobot. 
A utna ne mulo oroi, a propet Joel ka warwara nigo tar onoi mang, 
‘E God i atongi mange: Ana ararop a pukakiarla ar saran purum a Inguk tetek a taraila rop. A natnatumulola, a taraila pa gurarala, lar warwara na propet. Anumulo na barmanla lar oroi a tatataila, pa anumulo na bun lar resnan a reresala. 
Ana pukakiarla ning, ar saran a Inguk tetek la otleng anuk na tena titol oros a taraila pa gurarala, pa lar warwara na propet. 
Par asangan a ututnala na kulkulan saot na langit, pa akinalangla te lapiu na rakrakan hanua, lar a suluk, a iah, pa a tnan sasawan. 
A kamis ir mormorom, pa a kalang ir kubar, lar a suluk, pa lamur a pukakiar ana Leklek ir hanot, a tnan pukakiar ning, a pukakiar a matatar. 
Pa la rop ning la nunung tetek a Leklek, ir alaun la.’ 
“A tarai Israel, mulor longor iau. Ar atai mulo o e Iesu, a te Nasaret. Mulo ot mulo tasmani mang ana rakrakai e God, i tol a ututnala na kulkulan, pa rakrakai a titolla pa akinalangla. I toli na arpotor ta mulo, sur e God ir asangani tetek mulo mang i ot i sune seni. 
Di saran tar e Iesu ta mulo, pa mulo taum ana laulau a taraila mulo sai ahati saot na rakai kutus. E God ka tasman nigon tari mang a ututnala ne ir hanot arlar ana nuknukna. 
Ika e God i akamtur ulak pasi, pa i kepsen a kankan ona minat kusuni, anasa a minat bel i toh pasi sur ir tong akesi. 
E Dewit ka atong tari o e Iesu mang, ‘A tasmani mang a Leklek i kes tetek iau. Bel ar koloron, anasa i kes te na sot a kuk. 
A balak i gas kol, pa a warwara taum ana gasgas, pa a tortorot mang a palaok bel ir laulau tikin, 
anasa bel ur noren sen iau ting na kulam a minat, pa bel ur saran tar esining anumi, sur ir marase. 
U ka asangan tar iau ana ngasla sur a lalaun. Ning ar kes taum hom, ur abukus iau ana gasgas.’ 
“Na tastasikla, ar warwara talapor tetek mulo o e Dewit, a tubundala tagun nating. I mat pa di akasi ting na kulam a minat, pa anuna kulam a minat kanet tan dala tuk onone. 
Ika e Dewit i a propet, pa i tasmani mang e God ka lele tar teteki mang i ot ir akes tar tik miting na mangis a tarai anunai, sur ir kelesi ana nuna keskes a king. 
E Dewit ka tasman nigon tar a utna ning ir hanot, pa i atong a warwara ne ana kamkamtur ulak ane Karisito, mang bel di noren seni ting na kulam a minat pa a palaona bel i marase. 
E Iesu ot ning, e God i akamtur pasi kusun a minat, pa mila rop mila oroi pa mila warwara talapor onoi. 
Di aleklek pasi pa di akesi ting na sot a kuna e God, pa e God e Tamana ka saran tar a Talngan Tabu teteki larning i lele tari, pa onone e Iesu ka saran purum tar a utna ne ning mulo oroi pa mulo longori. 
E Dewit bel i han usaot na langit, ika i atongi mange, ‘A Leklek i atongi tetek anuka Leklek, “Ur kes te na sot a kuk, 
tuk ning ar tolsot pas anuma hiruala sur lar kes nahaim.” ’ 
“Mulo a tarai Israel rop mulor tasman wakaki, mang e Iesu ning mulo sai ahati saot na rakai kutus, e God ka akesi sur ir Leklek pa ir Karisito otleng.” 
Ning la longor a warwara ne, i sot na balanla, pa la deken e Pita taum ana dingla na aposella mang, “Na tastasimila, asaning milar toli?” 
E Pita i keles la mang, “Mulo rop taktakai mulor lingir a nuknukim mulo, pa dir baptais mulo ana risana e Iesu Karisito, sur dir kepsen anumulo na toltol laulaula, pa mulor kibas a Talngan Tabu. 
Anasa a artabar ne ning e God ka lele tar ono, ir han tetek mulo, pa tetek na natnatum mulola, pa tetek la otleng ning la kes bakbak. Pa ir han tetek la rop, ning a Leklek anundala a God, ir kabah pas la teteki.” 
Pa i atumarang la ana galis a warwara otleng, pa i nung rakrakai la mang, “Mulor tai alar mulo, pa mulor tur masik kusun a toltol laulau anuna tarai tagun onone, sur gong e God i saran a warkurai na arkeles tetek mulo.” 
La ning la kibas a warwara ane Pita dir baptais la. La arlar ona natol a rip, pa di suah taum la ana tena tortorotla. 
Pa la saran tar la ana asasaer anuna aposella, ana kes taum ana marmaris, pa ana utna na hangan taum, pa ana nunung. 
A aposella la tol a galis a utna na kulkulan, pa galis a akinalang otleng, pa a taraila rop la hanrawai e God. 
Pa a tena tortorotla rop la kes taum, pa a ututnala rop ning anunla taktakai, anunla rop ka. 
La siuran anunla na puka kabalapiula, taum ana nunla na ututnala, pa a mani taguni, la salari tetek esining i kapan. 
La sira kes taum ting na rumai a artabar ana pukakiarla rop. La hangan taum ting na nunla na rumaila ana gasgas taum ana momolna ting na balanla. 
Pa la rakan aleklek pas e God, pa a taraila rop la gas onla. Pa ana pukakiarla rop a Leklek i alaun a galis a tarai, pa di was taman la ana tena tortorotla.