Aposel.
8.
E Sol i malmaling taum onla sur dir umkol e Stiwen. Ana pukakiar ning, a tarai la turpasi sur lar alaulau a tarai a lotula saot e Jerusalem, pa a tarai a lotula la han sarara ana naur a papar e Juda pa e Samaria. Ika, a aposella bel la han. 
A momol na tena lotula la por e Stiwen, pa la domos rakrakai suri. 
Ika e Sol i alaulau a tarai a lotula, i kas ana nunla na rumaila, pa i rih a taraila pa gurarala, pa i akas la ting na rumai a dodot. 
Pa la ning la han sarara misaot e Jerusalem, la warawai ana Wakak a Warwara ting na hananuala ning la han ia. 
Pa e Pilip i han uting na tnan hanua tumo na papar Samaria, pa i warawai o e Karisito tetek la. 
Ning a kunum a tarai la longor a warwara ane Pilip, pa la oroi a ututnala na kulkulan ning i toli, la mang kol sur lar longor a warwarala ning i atongi. 
I kepsen a motla kusun a galis, pa ning a motla la purum, la kukuk rakrakai. Pa i alangolango pas a galis ning a palaonla i mat, pa la ning bel la tolsot pas a tinan. 
Pa a taraila misaot na hanua ning, la gas kol. 
Ning a barsan mitingia, a risana e Saimon, i sira wah pa i akulkulan a tarai Samaria ana ututnala ning i toli. Pa i iaunani namatana taraila. 
Pa a taraila rop, a leklekla taum ana tarai oros ka, la hanranwai i, pa la atongi onoi mang, “A barsan ne i tong akes a rakrakai ane God, a rakrakai ning di atongi mang A Tnan Rakrakai.” 
Pa la longor wakaki, anasa ka bongnan la la sira kulkulan ana nuna toltol na wahla. 
Ika onone, a taraila pa gurarala la tortorot ana Wakak a Warwara ning e Pilip i warawai onoi, ana matanitu ane God, pa ana risana e Iesu Karisito, pa di baptais la. 
E Saimon otleng i tortorot, pa ning di ka baptais tari, i mur mokos e Pilip. Ning e Saimon i oroi a akinalangla pa a ututna na kulkulan i toli, i kulkulan kol onoi. 
A aposella ning la kes saot e Jerusalem, la longori mang a tarai Samariala otleng la ka longor ana warwara ane God, pa la sune e Pita pa e Jon tetek la. 
Ning dia hanot, dia nunung sur la, sur lar kibas a Talngan Tabu, 
anasa belot i kes ona tik ta halinla, di baptais tar la ka ana risan a Leklek e Iesu. 
Pa e Pita pa e Jon dia suah a kundiau saot onla pa la bot kibas a Talngan Tabu. 
Ning e Saimon i oroi mang di tabar la ana Talngan Tabu ning naur a aposel dia suah a kundiau saot onla, i los a mani tetek diau. 
Pa i atongi mang, “Mur saran a rakrakai ning tak, sur iau otleng ar suah a kuk saot on tik, pa dir tabari ana Talngan Tabu.” 
Pa e Pita i kelesi mang, “U taum ana numa mani mur hirua, anasa u nuki mang ur lou a artabar ane God ana mani. 
Bel anum ta tiniba pa ta tukna ana titol ne, anasa a balam bel i tostos namatana e God. 
Ur lingir a nuknukim kusun a laulau a ginim ne, pa ur nunung tetek a Leklek. Ngandek ir kepsen a laulau a nuknukim. 
Anasa a oroi u mang u bukus ana laulau a nuknuk, pa a laulau a ginim i dot akes u.” 
Pa e Saimon i kelesi mang, “Mur nunung tetek a Leklek sur iau, sur gong ta utna ning mu atong tari, ir hanot hok.” 
Ning e Pita pa e Jon dia ka warwara talapor tar ana ututnala ning a Leklek i toli, pa dia ka warawai tar ana nuna warwarala, dia ulak usaot e Jerusalem. Ning dia han, dia warawai amon ana Wakak a Warwara ting na galis a hanua ana papar Samaria. 
Ning a angelo anuna Leklek i atai e Pilip mang, “Ur tur, pa ur han utumo ana matana tobar sur a ngas misaot e Jerusalem utumo e Gasa, a ngas ning i han potor a hanua bel.” 
Pa e Pilip i kamtur, pa i han. Pa dia arsongo taum ana ning a barsan mitimo e Itiop, a ningnigo na tena tai alar ana ututna anuna Kandake, a kwin anuna tarai Itiop. A barsan ne i han usaot e Jerusalem pa i lotu tetek e God. 
Ning i ulak ma sur anuna hanua, i kes ana keskes a tinan, pa i was a buk ane propet Aisaia. 
Pa a Talngan Tabu i atai e Pilip mang, “Ur han milau a keskes a tinan ning, pa mur armuri.” 
Pa e Pilip i dun teteki, pa i longor a barsan ning i was a buk ane propet Aisaia, pa i dekeni mang, “I mangmangasa, u talapor ot ana sa ning u wasi?” 
Pa i kelesi mang, “Ar tasman mangmangasa i, ning bel tik ir atalapori tetek iau?” Pa i nunung e Pilip sur ir abit teteki pa diar kes taum. 
Ine, a warwarala ting na Buk Tabu ning i wasi: “Di beni arlar ana sipsip, sur dir umkoli. Bel i warwara, arlar ana nat a sipsip ning i tur longoroi tetek esining ir kot a hihna. 
Di ame tari, pa bel di atostos a warkurai onoi. Esi ir warwara ana nuna kakakla? Anasa di kepsen anuna lalaun mite ana rakrakan hanua.” 
A te Itiop i deken e Pilip mange, “Ur atai iau, a propet i warwara o esi? Ono i ot, o ana tik masik?” 
Pa e Pilip i turpas a papak teteki. I atai i ana Wakak a Warwara o e Iesu, turpasi ot ana buk ning a te Itiop i wasi. 
Ning dia han amon ana ngas, dia hanot ana ning a malum, pa a te Itiop i atai e Pilip mange, “Oroi, a malum ne. Asa ir sairas iau sur gong di baptais iau?” 
Pa i sairas a keskes a tinan sur ir tur. Pa dia han purum uting na malum pa e Pilip i baptaisi. 
Ning dia saur kusun a malum, a inguna Leklek i kepsen e Pilip. Pa a te Itiop bel ma i oroi ulaki, pa i han ana nuna tinan taum ana tnan gasgas ting na nuna lalaun. 
Pa e Pilip i oroi mang i kanumo ma na hanua Asdot. Pa ning i han mitingia, i warawai amon ana Wakak a Warwara ting na hananuala tuk i hanot tumo e Sisaria.