2 Timoti.
2.
Timoti, a natuklik ana tortorot, ur tur rakrakai ana marmaris ane God tetek dala, ning dala kes o e Karisito Iesu. 
A asasaerla ning u ka longor pasi kusun iau namatana galis a tarai, ur asaer al barsan onoi, la ning u tortorot onla mang lar tolsot pasi sur lar asaer al tarai otleng onoi. 
Ur kilang a mamahat taum omila, arlar ana wakak a tena harum ane Karisito Iesu. 
A wakak a tena harum bel i molot ana titol anuna tarai oros ka. Ir tol ot anuna titol sur ir agasgas anuna ningnigo. 
Mang otleng larning a tena ardune ning i dun ana arsoksok, bel ir kibas ta arlou ning bel i mur a warkurai ana arsoksok. 
A tena omomai ning i titol rakrakai, i ot ir sol nigon a utna na hangan ting na barim ning ir makos. 
Ur nuk akes pas a ututnala ne a tumusi tetek u, anasa a Leklek ot ir atalapor a kamkamna tetek u. 
Ur nuk pas e Iesu Karisito, esaning tagun a mangis a tarai ane Dewit pa i kamtur ulak kusun a minat. A Wakak a Warwara ning a warawai onoi ine. 
A kilang kankan pa di dot iau otleng arlar ana tena laulau, anasa a warawai ana Wakak a Warwara. Ika a warwara ane God bel dir dot lar pasi. 
Pa kane ma a kilang kankan, ika a tur rakrakai ot, sur la ning e God ka aslang pas la. A tur rakrakai sur la otleng lar kibas a arlaun ning i kes o e Karisito Iesu, taum ana matatar tikin. 
A warwara ne ar atongi tam, i momol kol: Ning dalar mat taum o e Iesu Karisito, dalar laun taum otleng onoi. 
Ning dala kilang kankan taum onoi, dalar warkurai arlar ana king taum otleng onoi ana nuna matanitu. Ning dala puain seni, i otleng ir puain sen dala. 
Ning bel dala tolsot pas anundala lele sur dalar mur e Iesu Karisito, i ot ir tur rakrakai ana nuna lele, anasa bel ir tolsot pasi sur ir kutus anuna lele, belal. 
Gong u manah ana atatai tetek anuma tarai ana asasaerla ne. Ur atumarang la namatana e God, sur gong la arlak ana warwara oros ka. A arlak bel i to pas ta utna pa i alaulau otleng la ning la longori. 
Ur saran tar u tetek e God pa ur rakrakai sur u a momol a tena titol namata e God, ning bel ta utna ning ir ame i ana nuna titol, anasa i sira asaer wakak a taraila ana momol a warwara ane God. 
Ur han masik kusun a warwarala ning bel i sot ana nuknuk e God, anasa a tarai ning la molot ana asasaer larning la ka han bakbak kol kusun e God pa la han amon ot. 
Anunla asasaer ning ir han sarara arlar ana laulau a masik ning i marase amon. E Himeneus pa e Piletus naur tagun la, 
ning dia ka han rongo kusun a momolna. Dia atongi mang dala ka kamtur ulak pas kusun a minat, pa dia alaulau a tortorot anuna dingla na te Karisito. 
Ika, e God ka suah tar a kama tortorot ning bel ir gulgule, pa di ka tumus tar a warwara onoi mange, “A Leklek i tasman la ning anunai.” Pa di ka tumus tari otleng mange, “Esining i atongi mang ai anuna Leklek ir gilam kusun a toltol laulau.” 
Ona ning a tnan rumai, dingla na kap di tol la ana silwa pa ana gol, pa dingla otleng di tol la ana rakai pa ana piopap. Dingla na kap sur a tatatnan pukakiar ka, pa dingla otleng sur a dur a ututnala ka. 
Ning tik i atotoh pas anuna lalaun kusun a toltol laulaula, ir arlar ana kap ning di gang kusuni ana tatatnan pukakiar. Anasa ka totoh sur a Leklek ir titol ting na lalaun anunai sur ir tol a titol anunai, pa ka sang sur ir tol a wakak a titol. 
Ur han masik kusun a nuknuk na barman, pa ur mur a tostos a toltol, a tortorot, a marmaris pa a bal molmol, taum onla ning la nunung tetek a Leklek ana totoh na nuknukinla. 
Ur han masik kusun a kutkut a warwarala ning bel ta kamkamna, anasa la agomo ka a arlak. 
A tena titol anuna Leklek gong i arlak, ir wakak a tena asaer. Ir tol a wakakna tetek a tarai rop, pa ir asangan anuna molmol a toltol tetek a tarai ning i atostos la. 
La ning bel la mang sur anuna asasaer, ir atostos la ana molmol, sakana e God ir atalapor a matanla sur lar lingir a nuknukinla, pa lar tasman a momol a asasaer, 
pa lar tastasman wakak, pa lar purum kusun a kun ane Satan, ning la ka hirua tar onoi sur lar sira mur a nuknukna.